ئەڤرۆ شەمەندەفڕا چامپیۆنزێ دێ گەڕا ئێكێ ب دووماهی ئینیت
د بەردەوامییا یاریێن گەڕا ئێكێ یا قارەمانییا یانەیێن ئۆرۆپا قارەمانێن خولا چامپیۆنز لیگ، بڕیارە ئەڤرۆ ژی شەش یاریێن مایی دناڤبەرا یانەیێن مەزن ب دیرۆكا خوە و یانەیێن خودان هیڤی بهێنە كرن كو دێ یاریێن ڤێ گەڕێ ب دووماهی ئینیت و بڤی شێوەیی هێنە كرن.
بایرن بەرانبەر تیمەكا پێشكەڤتی
جەماوەر و پشتەڤانێن وەرزشی دێ چاڤەڕێ ئێك ژ بهێزترین یاریێن ئەڤ شەڤە یێن چامپیۆنزێ بن، دەمێ یانەیا بایرن میونخ یا ئەلمانی هەلگرا شەش ناسناڤان ل یاریگەها خوە ئاریانز ئارینا مێڤاندارییا یانەیا بۆدۆ گلیمێنت یا نەرۆیجی ل دەمژمێر 10ی شەڤ دكەت، بایرن ئێك ژ بەربژارێن بهێزە بۆ ناسناڤێ ئەڤ سالە، هەكە ئاماران دیاركەین هیچ جارەكێ خوسارەتیەك د قووناغا ئێكێ دا نەدایە بۆ ماوەیێ 20 سالێن بۆری، سەرباری ئەڤ یارییە دبیتە یا ئێكێ دناڤبەرا واندا، لێ یانەیا نەرویجی ژی تیمەكا پێشكەڤتییە و ئاستەنگە، د چار وەرزێن بۆری دا ل دووڤئێك هاتیە دناڤ چامپیۆنزێ دا.
مانچستەر و ترسا سۆپرایزا مێڤانا خوە
ژلایێ خوەڤە یانەیا مانچستەر یۆنایتد یا ئنگلتەرایێ دێ دناڤ ئەرد و جەماوەرێ خوە دا بۆ جارا ئێكێ یانەیا سەباح یا ئازەربێجانی مێڤان كەت، ئەو یانەیا بۆ جارا ئێكێ یە ژی دهێتە چامپیۆنزێ، هەرچەندە ل سەر لاپەری ئامار و بووچوون د بەرژوەندییا مان یۆنایتدێ دا نە ئەوا سێ ناسناڤێن چامپیۆنزێ هەین و دو جاران یا دویێ هاتیە سەرجەمێ وێ 31 جاران پشكداری كرییە، بەرۆڤاژی یانەیا ئازەربێجانی بێ دیرۆك و ئامارە، لێ د هەر یارییەكێ دا پێشبینییا سۆپرازیان ژی دهێتە كرن، ئەڤ یارییە ژی دێ ل دەمژمێر 10ی شەڤ هێتە كرن.
فەنەربخشە دێ شێت گرێیا سەركەڤتنان ڤەكەت؟
بڕیارە ئەڤرۆ ل دەمژمێر 7:45 شەڤ یانەیا فەنەر بەخشە یا توركی ل یاریگەها خوە یانەیا رۆما یا ئیتالی مێڤان كەت كو دهێتە هژمارتن یارییەكا ب حەق و حسابات، یانەیا توركی دناڤا ئەردێ خوە دا بوویە هەڤڕكەكا بهێز بۆ یانەیێن ئۆرۆپایێ د نەهـ یاریێن دیرۆكی دا حەفت سەركەڤتن ئیناینە، لێ هەردەم یانەیێن ئیتالی بوویە ئاستەنگ، دبیت پشكداریێن رۆما د چامپیۆنزێ دا پتربن كو گەهشتییە 13 جاران و گەهشتییە فینالێ لێ نەشیایە ناسناڤی بدەستڤە بینیت، ژلایێ خوەڤە فەنەر بەخشە حەفت جاران پشكداربوویە، باشترین ئەنجامێ وێ گەهشتییە چارێك دووماهیێ.
ئایندهۆڤن و شاختار بەرانبەر دوبارەكرنا سیناریۆیێ
د چارچووڤەیێ یاریێن ئەڤرۆ دا بڕیارە ل دەمژمێر 7:45 شەڤ یانەیا ئایندهۆڤن یا هۆلەندی ل یاریگەها خوە یانەیا شاختار دۆنێتسك یا ئۆكرانی بكەت كو دهێتە هژمارتن سیناریۆیا دویێ دناڤبەرا هەردو یانەیان دا، ل وەرزێ 2024-2025ێ ئێكەم جاربوو بەرانبەری ئێكبووینە ل هەمان یاریگەهێ، یانەیا شاختار ب دو گۆلان پێشكەڤتبوو، لێ یانەیا ئایندهۆڤنێ ڤەگەڕیانەكا دڕاماتیكی هەبوو ب ڕیمۆنتادا كو شیا د خولێن 87، 89 و 90+4 سێ گۆلان ل دووڤ ئێك بینیت، پشكداریێن یانەیا ئۆكراینی گەهشتینە 21 جاران و هەتا قووناغا چارێك دووماهیێ چوویە، ئایندهۆڤن 18 جاران پشكداربوویە ل سالا 1988ێ ناسناڤێ چامپیۆنزێ بدەستڤە ئینایە.
ئێكەم شەڕێ دو یانەیێن ئیتالی و ئەلمانی
د یارییەكا دی یا چامپیۆنزێ دا ئەوا بڕیارە ل دەمژمێر 10ی شەڤ بهێتە كرن یانەیا كۆمۆ مێڤانا نوو یا چامپیۆنزێ دێ ل یاریگەها خوە یانەیا لایبزیك یا ئەلمانی مێڤان كەت ئەوا ب سەرپەرشتییا ڕاهێنەرێ ناڤدار سیسك فابریگاس كو د خولا ئیتالیایێ دا زنجیرەیا هەشت سەركەڤتنێن ل دووڤ ئێك یێن هەین، د بەرانبەر دا لایبزیك ب شارەزاهی و سەربۆرا خوە یا چامپیۆنزێ حەفت جاران هاتییە ڤێ قارەمانیێ، هەرچەندە نەگەهشییە قووناغێن دووماهیێ لێ هەردەم تیمەكا بهێز و هەڤڕك بوویە.
سلاڤیا و لانس د دیدارەكا هەڤسەنگ دا
دووماهی زنجیرەیا یاریێن ئەڤرۆ ل دەمژمێر 10ی شەڤ یانەیا سلاڤیا براگ یا چیكی دێ یانەیا لانس یا فرەنسی مێڤان كەت كو دبیتە جارا ئێكێ د دیرۆكا هەردو یانەیان بەرانبەر ئێك یاریێ د چامپیۆنزێ دا بكەن، لێ دیدارەكا كۆپا فدراسیۆنا ئۆرۆپا ل سالا 1996ێ هاتیە كرن، هەروەسان هەردو یانە سێ جاران پشكداری د ڤێ قارەمانیێ دا كرینە دگەل ڤێ چاپێ دبیتە یا چارێ.
پێزانینەكا گرنگ بزانە
ب پشكدارییا 36 یانە هەر یانەیەك دێ هەشت یارییان كەن ب شێوەیێ خول ئێك قۆناغ، چار دناڤ ئەردێ خوە دا و چار ژ دەرڤەیی یاریگەها خوە، خودانێن ڕێزێن ئێكێ هەتا هەشتێ ئێكسەر دێ دەربازبنە قۆناغا دویێ- یاهەشتێ-، ئەو یانەیێن ل رێزێن نەهێ هەتا 24ێ هاتین دێ دو یاریێن ڤەبر بەرانبەری ئێك كەن ژبۆ دەربازبوونا هەشت یانەیان بۆ تمامكرنا قۆناغا هەشتێ، ئەو یانەیێن ل ڕێزا 25 هەتا 36 دهێن دێ هێنە دووركرن، یارییا دووماهیێ دێ ل پێنجی گۆلانا سالا 2027ێ ل یاریگەها ئەتلەتیكو مەدرید هێتە كرن.
