کریزا(قەیرانا) باوەریێ!!
نەوزاد ئامێدی
گەلەک جارا ئەم بەحسێ هندەک کێماسیێن چڤاکی دکەین و نڤێسینێن درێژ ل دۆر دنڤێسین، بێ کو بزانین کا ئەگەر چنە، یان بێ کو مە هیچ ئامار یان خواندنێن تایبەت و فەرمی هەبن دەربارەی وان ئاریشە و کێماسیێن چڤاکی دناڤا وەڵاتێ مەدا؛ و بتایبەت کوردستانا باشور.
ل ڤێرە ئاریشە و کێماسی گەلەکن لێ دێ هەوڵدەین چەند نموونەیەکێن بچویک و پێش چاڤ دیارکەین دا گۆتارا مە گەلەک درێژ نەبیت.
بۆ نموونە گوهۆڕینا دەهوەتێن کوردی و شەڤێن خەنایێ یێن کوردی و یێن گەلەک خۆش و پڕی جوانی، ب کولتۆرێن مللەتێن دی وەک تورکان یان عەرەبان و بکارئینانا ناڤێن تورکی یان عەرەبی بۆ ناڤلێنانا کەل و پەلان وەک: قەهوێ، شوینا بێژین قەهوا کوردی دێ بێژین یا عەرەبی یان تورکی. یان گوهۆڕینا ناڤێ ئیپراخێ کو بناڤودەنگترین خوارنا کوردیە، بناڤێ دۆلمە کو ناڤەکێ بیانیە تا رادەکە مەزن. حەتا جارەکێ برادەرەکی گۆتە من خەبیس نەیا ئامێدیایە، بەلکو یا ژدەڤ ل نک عەرەبان هاتی چونکی وان شرینیەکا هەی بناڤێ (خبیصە) ئانکو یەکسەر مە ئەو کرنە خودانێن بەرهەمی نەک کورد. هەروەسا بۆ نموونە دێ بینی کەسەکێ بەحسێ زمانێ کوردی دکەت، و دێ دەسپێکەت بێژیت ئەڤ پەیڤە عەرەبیە و ئەڤ پەیڤە فارسیە و ئەڤ پەیڤە تورکییە، بۆچی چونکی وان ژی تشتەک یان پەیڤەکا نێزیکی پەیڤا کوردی یا هەی. لێ شوینا وان ژمە وەرگرتبیت، یەکسەر و بێ ئێک و دو دێ بێژین مە یا ژوان وەرگرتی.. و بدەهان نموونێن دی.
لڤێرە من دڤێت بدەنگەکێ بلند و ب باوەریەک مەزن ب بێژم؛ ئەڤ کریزە، یان قەیرانا ژوێ چەندێ دهێت ئەوا ئەم دبێژینێ نەباوەری ب خۆ و ب کولتۆرێ خۆ و ب نەتەوا خۆ. و ئەڤ نەباوەریە ئەنجامێ ئێکسەر یێ وێ پەروەردەیا نەتەویی یا سەقەتە؛ و هەروەسا کەفتنە دداڤێن چاڤلێکرنا کۆرە یا هەر تشتەک بیانی دا. و ئەڤ چەندە هەمی دزڤریتە ڤە بۆ سێ ئەگەرێن سەرەکی:
ئێک: رەوشەنبیرەکێ کۆرە فەهم و گەندەل. ئەوێ چ بوهایێن هزری و هەستا نەتەوی و نشتیمانی ل دەف نەمای.
دو: راگەهاندنەکا بێ مفا و بێ ناڤەرۆک. کارێ وان بوویە تژیکرنا لاپەڕان و ئەکرانان بێ کو بشێین بەرهەمەکی یان هزرەکێ پێشکێشکەین کو بشێت کارتێکرنەکا ئەرینی لسەر خەلکێ بکەت.
سێ: سیاسیەکێ ئینتهازی و گەندەل، کو هەمی تشت قوربانی من و من و من بیت. ئێدی وەڵات و کولتۆر و پاشەرۆژ بوونە نان پێخوارن.
لەوما پەیاما من ڤێ جارێ بۆ رەوشەنبیرانە؛ . دەستپێ بکەن و کار ل سەر پرسێن مەزن و هزری بکەن، بێژن ئەم کوردین و ئەرکێ پاراستنا ناسنامەیا کوردینیێ ل وەڵاتێ رۆژێ پیرۆزترین و گرنگترین ئەرکێن مەنە
