ئـۆتـۆنـۆمی بـۆ كوردسـتانـێ و دیمۆكراسی بۆ ئیراقـێ
عەبدولسەلام شێخ مستەفا بۆسەلی
شۆڕشا ١١ ئیلۆنا سالا ١٩٦١ ئێك ژ مەزنترین و گرنگترین وەرچەرخانێن دیرۆكی یێن گەلێ كورد بوو ل باشوورێ كوردستانێ، قوربانیدان و بەرگرییا چەكداری یا پێشمەرگەیی و جەماوەرێ كوردستانێ ب سەركردایەتیا بارزانیێ نەمر و پارتی دیمۆكراتی كوردستان. ئەڤ شۆڕشە ب وەلامەكا ڕاستەوخۆ و ڕەوا هاتە مەیدانێ بەرانبەر پاشگەزبوونا دەستهەلاتدارێن بەغدایێ ژ بەلێن و مافێن نەتەوەیی یێن كوردان كو د دەستوورێ دەمكی یێ ئیراقێ دا ل سالا ١٩٥٨ دا هاتبوونە سەلماندن.
لێكەڤتی و دەستكەڤتیێن سەرەكی یێن شۆڕشا ئیلۆنێ؛
خەباتا بەربەلاڤبووی گوهۆڕی بۆ بزاڤەكا ڕێكخستیا سەربازی و سیاسی، كو تێدا پێشمەرگە بوویە سیمبۆلێ بەرگریێ و پاراستنا ئاخا كوردستانێ، سەردەمەكێ نوو یێ هشیاریا نەتەوەیی و باوەری بخۆبوونێ بوو كو بۆ جارا ئێكێ بوو شیا كێشەیا كورد ژ چارچووڤەیێ ناڤخۆیی، سنوورێن دەڤەرداری و خێلەكی تێكشكاندن و بوویە دەنگێ هەموو چین و توێژێن جودا یێن جڤاكا كوردستانی، ژ رۆناكبیر، گوندنشین و مامۆستایان.
ڕێككەفتنامەیا ١١ ئادارا سالا ١٩٧٠ ل سەر ئاستێ دیرۆكی و سیاسی ل ئیراقێ و باشوورێ كوردستانێ، وەك گرنگترین و مەزنترین بەلگەنامە و دەستكەفتێ سیاسی یێ شۆڕشێ دهێتە هژمارتن. ئەڤ ڕێككەفتنامەیە بەرهەمێ نێزیكی ٩ سالێن خەباتا بەردەوام، دانپێدان ب مافێ ئۆتۆنۆمی (حكومێ زاتی) بۆ جارا ئێكێ د دیرۆكا هەڤچەرخا دەولەتا ئیراقێ دا، دەستهەلاتا ناڤەندی ب شێوەیەكێ فەرمی دانپێدان ب وێ ئێكێ كر كو گەلێ كورد خوەدی مافێ ئۆتۆنۆمیێ یە ل سەر ئاخا خۆ د ناڤ سنوورێ دەولەتا ئیراقێ دا.
دانپێدان ب مافێن كوردان ڕێككەفتناما ١١ ئادارا ١٩٧٠ مەزنترین دەستكەفتێ سیاسی یێ شۆڕشێ حوكمەتا ئیراقێ ناچاركر بۆ جارا ئێكێ ب رەنگەكی فەرمی دانپێدانێ ب مافێ ئۆتۆنۆمی (حوكمێ زاتی) بۆ گەلێ كورد بكەت.
ب سایا ڕێكخستن و سەركردایەتیا شۆڕشێ، دەنگ و كێشا ڕەوا یا گەلێ كورد گەهشتە ناڤەندێن بڕیاردانێ یێن هەرێمی و نێڤدەولەتی.
پارتی دیموكراتی كوردستان وەك هێزا سەرەكی یا سیاسی و ئەندازیاریا شۆڕشێ، شیایە ئاراستەیا خەباتێ بەر ب ئارمانجێن نەتەوەیی ڤە ببەت.
پارتی پشتراستكر كو درووشم و داخوازێن كوردان بینە رۆژەڤەك ڕۆهن و دەستووری و شۆڕشەك بۆ هەموو دەستكەفتێن پاشەرۆژێ یێن گەلێ كورد هەتا دگەهیتە ئاڤاكرنا هەرێما كوردستانێ و حوكمەت و پەرلەمانی.
ڕێككەفتنامە ب شێوەیەكێ ڕۆهن دیاركر كو جڤاكا ئیراقێ ژ دو نەتەوەیێن سەرەكی (عەرەب و كورد) پێكهاتییە، و مافێن نەتەوەیی یێن كوردان ل دەستوورێ وەلاتی دا هاتینە جێگیركرن. زمانێ كوردی ب فەرمی ل دەڤەرێن كوردنشین ل كەنالێن خویندنێ، ڕاگەهاندنێ و كارگێڕیا میری دا هاتە پەسەندكرن، كو ئەڤ پێنگاڤە زێدە گرنگ بوو بۆ پاراستنا كوردان.
