ڕێكێ نادەین ڕەشنڤیسا بودجەی ب زیان گەهاندن ب مافێن گەلێ كوردستانێ دەرباز بیت
جێگرێ سەرۆكێ جڤاتا نوونەرێن ئیراقێ ئاشكەرا دكەت كو د ڕەشنڤیسێ یاسایا بودجەی دا چەندین خالێن نەرێنی و سزایێن نەدادی بەرامبەر هەرێما كوردستانێ هاتینە بنەجهكرن، د هەمان دەم دا دوپاتیێ ل سەر وێ چەندێ دكەت كو وەك فراكسیۆنێن كوردی د بزاڤێن بەردەوام دانە بۆ دروستكرنا هەلوەستەكێ ئێكگرتی ب مەرەما داكوكیلیكرنێ ل شایستەیێن دارایی یێن كوردستانێ.
فەرهاد ئەتروشی، جێگرێ سەرۆكێ جڤاتا نوونەرێن ئیراقێ، ڕاگەهاند، «بزاڤێن مە بەردەوامن بۆ وێ چەندێ كو هەموو فراكسیۆنێن كوردی ل دۆر پرسا شایستەیێن دارایی یێن هەرێما كوردستانێ ببنە خودان هەلوەست، د ڤی چارچۆڤەیدا ب بەرهەڤبوونا نوونەرێن فراكسیۆنان ئەم ل گەل وەزیرێ دارایی كۆمبووینە. پشتی هووربینی كرنێ ل كۆپییەكا ڕەشنڤیسێ بودجەی، مە تێبینی كر كو گەلەك خالێن نەرێنی بەرامبەر هەرێمێ د ناڤ دا هەنە، لەوڕا لەزاتی د دەربازكرنا وێ دا ناهێتە كرن و دەمێ پێدڤی دێ بۆ هێتە تەرخانكرن هەتا دانوستاندنێن هوور ل سەر دهێنە كرن و ئاستەنگ دهێنە چارەسەركرن، ب تایبەتی مادەیا 10 یا كو پەیوەندیدارە ب هەرێما كوردستانێ و هووركاریێن ئالۆز د ناڤ دا هەنە».
جێگرێ سەرۆكێ جڤاتا نوونەران ڕۆهن ژی كر، «ڕەشنڤیس ژ 22 بەرپەران پێك دهێت و گەلەك تێبینی ل سەر هەنە، ژ كۆما 217 ترلیۆن دینارێن بودجەیا گشتی، بتنێ 13 ترلیۆن دینار بۆ هەرێما كوردستانێ هاتینە دیاركرن، كو ژ بەر باسكرنا قەران، ئەڤە ژی ب تمامی ناگەهیتە هەرێمێ. ژ بلی وێ چەندێ، د دەمەكێ دا 47 ترلیۆن دینار بۆ كەرتێ كارەبێ هاتینە دانان كو هەرێم مفای ژێ نابینیت، بودجەیا سیادی ژی كو ب گۆتنا وەزیرێ دارایی 72 ترلیۆنە، د ڕەشنڤیسی دا ئاماژە پێ نەهاتییە كرن و بهایێ بەرمیلەكا نەفتێ ژی نەهاتییە دیاركرن. د هەمان دەم دا كۆمەكا مەرج و سزایێن دژوار ب سەر هەرێمێ دا هاتینە سەپاندن».
د دووماهیێ دا فەرهاد ئەترووشی دوپاتی ل وێ چەندێ كر»ئەم د پەرلەمانی و حوكمەتا هەرێما كوردستانێ دا ب هەموو شیانێن خوە ڕێگێ نادەین بودجە ب ڤی شێوەیی دەرباز بیت و ئەم دێ ب تمامی داكوكیلیكرنێ ل شایستە و مافێن دەستووری یێن گەلێ كوردستانێ كەین».
