د. هەکار برقی: هه‌بوونا پشته‌ڤانان ل سلێمانییێ دێ هێزێ ده‌ته یاریزانێن مه و ڕژدین بۆ ناسناڤی
راپۆرت: تاهر رێكانی
دهێته چاڤه‌رێكرن ئه‌ڤرۆ ل باژێرێ سلێمانییێ كچێن یانه‌یا سه‌نحاریب ئێكه‌م پێنگاڤا خۆ به‌ر ب پاراستنا ناسناڤێ خولا ڤولیبۆلا ئیراقێ هاڤێژن، ده‌مێ یاریا خۆ یا ئێكێ به‌رامبه‌ر كچێن یانه‌یا ئه‌مانه‌ت به‌غدا ئه‌نجام بده‌ت، داكو بزانین نوونه‌را پارێزگه‌ها دهۆكێ بۆ ڤان یاریان چ به‌رهه‌ڤی كرینه د ڤێ راپۆرتێ دا بخوینن:
ل ده‌ستپێكێ د. هه‌كار برقی راهێنه‌رێ تیمێ گوت: تاراده‌كێ باش مه به‌رهه‌ڤیێن كرین و تیم و یاریزان بشێوه‌یه‌كێ گشتی گه‌هشتینه ئاسته‌كێ گه‌له‌ك بلند، گه‌له‌ك باشتره ژ ئاستێ قووناغا ڤاڤارتنان، بێ گۆمان هه‌ر تیمه‌كا گه‌هشتیه ڤێ قووناغێ یا بهێزه بتایبه‌ت هه‌رسێ یانه‌یێن ئه‌مانه‌ت به‌غدا، ئه‌كاد عه‌ینكاوه و قه‌ره‌قۆش، كارگێریا یانه‌یا سه‌نحاریب و سه‌رۆكێ وێ هه‌ر تشته‌كێ پێدڤی ژ هه‌موو لایه‌كێ ڤه یا بۆمه كری، ئەڤە دبینە خالێن ئەرینی بۆ باشکرنا ئاستێ جەستەیی و دەرونی.
هه‌روه‌سان ناڤهاتی گۆت: مه گه‌له‌ك بزاڤكرن یارییێن دووماهییێ بینه پارێزگه‌ها دهۆكێ چونكه بۆمه دكه‌فت و ئه‌ڤه پێنج ساله ئه‌ڤ غه‌دره لمه دهێته‌كرن و سێ جاران ل سلێمانییێ و دو جاران ل هه‌ولێرێ دهاتە رێكخستن بێ گۆمان نه‌دادپه‌روه‌رییه ژلایێ فدراسیۆنا ئیراقێ ڤه دهێته‌كرن.
لدووماهیێ ناڤبری دخوازیت چه‌وا پشته‌ڤانێن فوتبۆلێ ل هه‌ر باژێره‌كێ ئیراقێ دگه‌ل تیمێن خوە نه وه‌سا پشته‌ڤانێن پارێزگه‌ها دهۆكێ ل یاریێن تیما خۆ سه‌نحاریب به‌رهه‌ڤبن داكو بۆمه ببیته پالده‌ره‌كێ بهێز دا ناسناڤێ خۆ یێ وه‌رزێ بۆری ب پارێزین.
ژلایه‌كێ دویڤه بریڤا رزگار یاریزانا تیمێ گۆت: بێ گۆمان مۆرالا یاریزانێن مه گه‌له‌ك یا بلنده و باش یێ خۆ به‌رهه‌ڤكری بۆ ڤان یاریان، ئه‌و شاشی و كێماسیێن مه ل ڤاڤارتنان په‌یدابووین یێن هاتینه چاره‌سه‌ركرن، ئەو تیمێن گه‌هشتینه ڤێ قووناغێ دێ هه‌می هزرا بۆ كه‌ین و نابیت خه‌مساریێ د یاریا به‌رامبه‌ر واندا بكه‌ین چۆنكه ئه‌وژی تیمێن بهێزن یاریزانێن بهێز دناڤدانه و ب ئاسانی نه‌گه‌هشتینه ڤێ قۆناغێ له‌وا هه‌ر تیمه‌كا دكه‌ڤیته به‌رامبه‌ری مه دێ هزر كه‌ین یاریا دوماهیێ یه ژ قاره‌مانیێ.
بۆ زانین یاریێن قووناغا دووماهیێ یا قاره‌مانیا ڤولی بۆلا ئیراقێ لسه‌ر ئاستێ كچان دێ ب شێوی خول ئێك قۆناغ ل هۆلا پێشمه‌رگه ل باژێرێ سلێمانیێ ب پشكداریا شه‌ش یانه‌یان ئه‌وژی، سه‌نحاریب، قه‌ره‌قوش، ئه‌كاد عه‌ینكاوه، ئه‌فرۆدێت، ده‌ربه‌ندیخان و ئه‌مانه‌ت به‌غدا.
یاریێن ئه‌ڤرۆ دێ هێنه برێڤه‌برن.
سه‌نحاریب- ئه‌مانه‌ت به‌غدا، ده‌مژمێر دویێ پشتی نیڤرۆ.
ئه‌ڤرۆدێت- ئه‌كاد، ده‌مژمێر،چارێ ئیڤاری.
قه‌ره‌قۆش- ده‌ربه‌ندیخان، ده‌مژمێر شەشی مەغرەب.