پەرتووكێن ژیاننامەیێن شەهید و قەهرەمانان و دیتنەك
دلدار محەمەد
ئەگەر نەبێژین حەفتیانە، مسۆگەر مەهانە ل باژێرەكێ وەكی دهۆكێ مە گوهلێ دبیت یان ژی دكەڤیتە بەرچاڤێن من، ژیاننامەیا فلان شەهیدێ قەهرەمان یان فلان پێشمەرگەیێ دێرین بوویە پەرتووك. ئەڤە ژی، ژبلی پێنگاڤەكا سەردەمیانە یا جوان، گاڤەكا گرنگە بۆ پاراستنا دیرۆكێ؛ ژ بەركو هەر قەهرەمانەك ژ ڤان پشكەكا دیرۆكێ یا د سینگێ وی دا یان ژی یا د ناڤ رۆژێن بیرەوەریێن وی دا. بەلێ راستی ب دیتنا من ئەڤە بتنێ بەس نینە، بەلكو پێدڤی یە ئەڤ پەیامێن د ناڤ ڤان بەرپەران دا بگەهنە مللەتێن جیهانێ یان هەر چ نەبیت بگەهنە مللەتێن دەردور. بۆ ڤێ ژی پێدڤی یە خۆدانێن كەدا وەرگێرانێ ملێن خۆ بدەنە بەر ڤی باری، ب زمانێن وان بێژنە وان: «ئەڤەیە دیرۆكا مە! ئەوا وە بۆ حەزێن خۆ دەربارەی مە نڤیسی و ڤەگێرایی، دوورە ژ راستییێ.»
راستە دیرۆك یا مەیە و ڤان قەهرەمانان ئەم یێن پاراستین، بەلێ لادانا مژێ ژ پێشچاڤێن گەلێن هەڤسۆیی ژی، هەر چنەبیت، دێ نامەكێ گەهینیتە وان ژی كو نەبتنێ نهۆ، بەلكو د ڤەگێرانا دیرۆكێ ژی دا ستەم ل گەلێ مە هاتیەكرن.
رەنگە بزاڤێن وەرگێرانا پەرتووكێن دەربارەی ژیانا قەهرەمانان هەتا رادەیەكی هەبن، بەلێ بێگومان ل دویڤ یا خواستەكا پێدڤی نینە. ل وێ باوەرێ مە ئەگەر ئەڤ بزاڤە خورتتربوو، دێ ئەم ب نڤێسینێ دیرۆكێ ژ بەرزەبوونێ پارێزین؛ ژلایەكێ دیتر ژی، دێ نامەیێن ئاشتیخوازی، چاڤنەترسی و ستەملێكرنێ رۆهنتر گەهنە گوهـ و چاڤێن جیهانا نڤستی—ئەوا وێ ب خۆ گەلەك جاران چاڤێن خۆ ل ستەما ل گەلێ كورد دهێتەكرن گرتین.
