خەتاب عومەر: ڤەگەڕیانا خولا باسكێت بۆلا كوردستانێ گەشبینی دناڤا یاریزانان دا پەیدا كرییە
شاهۆ فەرید:
د داخویانیەكێ دا خەتاب عومەر ڕاهێنەرێ تیما باسكێت بۆلا یانەیا گارە دیاركر ڤەگەڕاندنا خولا كوردستانێ وەكو پێنگاڤا ئێكێ گەشبینی دناڤا یاریزانان دا پەیداكرییە و دەلیڤەیە جارەكادی دەست ب ڤەوەژانییێن خوە بكەت پشتی ڤەقەتیانەكا درێژ ژ چالاكییان.
زێدەتر ناڤهاتی گۆت: هەموو ئەو كەسێن دناڤا ڤێ وەرزشێ دا دلخوەشبووینە ب ڤەگەڕیانا وێ لەوما ژی مە پشكدارییا خوە ڕاگەهاندییە و بەرهەڤییێن بەردەوام دكەین كو حەفتییانە سێ هەتا چار رۆژان ڕاهێنانان دكەین، ئارمانجا مە ب تنێ پشكداریە و یاریزان بخوە شارەزایێ وەربگرن و ڤەگەڕنە گەشێ قارەمانیان، دێ بزاڤێ كەین یاریێن ب ئاست بلند نیشان بكەین و هیچ گڤاشتنەكێ ل سەر یاریزانان ناكەین بۆ دەستڤەئینانا ناسناڤی، ژبەركۆ تیمێن بەرامبەری مە باشتر خوە بەرهەڤكرینە و یاریزانێن شارەزاتر هەنە تایبەت ئەوێن پشكداری د خولا ئیراقێ كرین، یاریزانێن مە هەموو خەلكێ دهۆكێ نە و خوەبەخش یارییێ دكەن، دێ بەرێ خوە دەمە تەكتیكا یاریزانان ئەگەر لاوازی د جهەكێ دا هەبیت دێ داخوازێ ژ یاریزانەكێ دەرڤەیی پارێزگەهێ كەین سەرەرایی مە شیانێن یاریزانێ پیشەكار نینن.
هەروەسان خەتابی گۆت: ئارمانجا مە ڤەگەڕاندنا ناڤێ یانەیا گارە و باسكێت بۆلێ یە، ئەڤ یانە خودان خزمەتەكا درێژە و چەندین یاریزانێن ستێر بەرهەمئیناینە، تاكە یانەیە یا بێ پشتەڤانی، داخوازێ ژ جهێن پەیوندیدار دكەین پشتەڤانییا ڤێ یانەیێ بكەن دا پتر بشێت خزمەتا یاریزانێن باژێرێ خوە بكەن، سپاسییا بەرێزان مەتین عەلی و بەریز سەگڤان ژ سكرتارەتییا قوتابی و لاوێن كوردستانێ دكەین كو هەردەم پشتەڤانێن مە بووینە.
