وێنە ب گەلەک پیڤەران دهێتە هژمارتن
ئەڤرۆ، بێوار حمدی:
ئاری جەلال، هەر ژ سالا 1998 دەست بکارێ وێنەگرتنێ کریە و کارێ وێنەگریا ئاژانسێن ڕۆژنامەڤانی ژی ژ سالا 2012 دەستپێکریە د دیدارەکێ دا بۆ بەرپەرێ هونەری یێ رۆژناما ئەڤرۆ گۆت: کار و زەحمەتا وێنەگری ئەز کرمە وێنەگرەکێ جیهانی، لەوما پێدڤی یە وێنەگر گەلەک ل سەر خوە کار بکەت و رەوشەنبیریێ و هزرا ساخلەم دوێنەی دا بکاربینیت و دیسان دجورێ وێنەی دا شارەزابیت و بەردەوام پشکداریێ د بەریکانان دا بکەت داکو بشێت ببیتە تڕێندەکا جیهانی.
ناڤهاتی دبەردەوامیا ئاخفتنا خوە دا دیارکر کو گەلەک جاران وێنە بوویە فلم و دناڤا وێنان دا فلمەک هاتیە نیشاندان، بو نموونە: ل سالا 1962ێ فلمەک هاتە چێکرن بناڤێ « لاجێتی» کو وێنەیێن خوە کربوونە کورتە فلمەک، دیسان گەلەک جارێن دی بتایبەت دناڤا هولیودێ دا ژی فلم ب جورێ وێنەی هاتیە نیشاندان و ئەڤ جورە وێنەیە خۆشی وتامەکا دی ددەنە بینەری
ئاری ئەوچەندە ژی دازانین، وێنە ب گەلەک پیڤەران دهێتە هژمارتن، بو نموونە: بابەتێن « ڕۆژنامەڤانی یان هونەری یان پورتریت» ئەڤان جوداهیا خوە هەیە وهەر ئێک ل سەر هندەک پیڤەرێن تایبەت دهێتە دانان و گۆت” ئەز ل سەر کارێ خوە یێ بەردەوامم و من چەندین پێشانگەهێن کاری هەبووینە، نوکە ژی من پڕۆژەیەک هەیە کو نێزیکی 16 سالانە کار ل سەر دکەم لێ هێشتا ب دووماهی نەهاتیە، لێ من دڤێت بەردەوام بم ل سەر کارێن مرۆڤایەتی د ناڤ وێنەگریێ دا و ب ئانەهیا خۆدێ دێ من کار و پڕۆژەیێن گەلەک باشتر ل نێزیک هەبن.
