دڤێت هێزێن کوردی ببنە پشکەک ژ پرۆژەیێ چارەسەریێ
پارتا سوسیالیست یا باکورێ کوردستانێ دوهی د داخویانیەکێ دا راگەهاند کو بابەتێ چارەسەرکرنا پرسا کوردی ل تورکیا بابەتەک گەلەک مەزنە و بابەت تنێ ژناڤبرنا چەکان نینە، بەلکو دڤێت سیستەمێ سیاسی ل تورکیا بهێتە گوهۆڕین و دڤێت سیستەمێ تورکیا ببیتە فیدرالی و کورد دەڤەرێن خوە برێڤە ببەن.
پارتا سوسیالیست ئەو یەک ژی دیار کر، دڤێت هەموو هێزێن سیاسی یێن ل باکورێ کوردستانێ ببنە پشکەک ژ پرۆژەیێ چارەسەریێ و ژ بۆ چارەسەرکرنا پرسا کوردی دڤێت ژی دڤێت بلەز هندەک تشت بهێنە کرن و بەری هەر تشتەکێ ژی دڤێت دستوورێ نها یێ تورکیا بهێتە گوهۆڕین و د دستوورێ نوو دا ب فەرمی هەبوونا گەلێ کورد بهێتە قەبوول کرن و زمانێ کوردی ببیتە زمانێ فەرمی یێ پەرەوەردێ.
ل ئالیێ دی گەلەک ژ پارتی و هێزێن سیاسی یێن ل باکورێ کوردستانێ ژی وەسا دیار دکەن، قووناغا نها ب رەنگەکێ نهێنی برێڤە دچیت و رایا گشتی یا کوردستانێ ژ روودانان ئاگەهدار نینە و دڤێت راستیێن هەی بۆ خەلکی بهێنە ئاشکرا کرن و هەروەسا گرنگە هەموو هێزێن سیاسی و کەسایەتیێن کورد یێن ل باکورێ کوردستانێ ژی د پرۆژەیێ چارەسەریێ دا جه بگرن، هەروەسا گرنگە ب جهێ قووناغا تورکیا بێ تیرۆر بەرپرسێن تورکیا بێژن قووناغا ئاشتیێ و چارەسەرکرنا پرسا کوردی، چونکی هەتا پرسا کوردی ل تورکیا نەهێتە چارەسەرکرن قووناغا نها چو رامانا خوە نابیت و هەکە کورد نها پشتەڤانن چونکی گەلێ کورد داخوازا مافێن خوە یێن رەوا دکەت و هەتا کورد نەگەهنە مافێن خوە ژی بێگومان ئالۆزیێن هەی ل تورکیا ژی ب تەمامی چارەسەر نابن.
