حەفتیا بهێت بەغدا دێ گازا سپی بۆ هەرێمێ هنێریت
هەولێر، قائید میرۆ:
ژێدەرەكێ ئاگەهدار ل پەڕلەمانێ ئیراقێ ئاشكراكر، بڕیارە حەفتیا بهێت گازا سپی ژلایێ بەغداڤە بۆ هەرێما كوردستانێ بهێتە هنارتن و پشتی تەمامكرنا ریكاران ل سەر وەلاتیان دێ هێتە بەلاڤكرن، وەزارەتا سامانێن سرۆشتی ژی دیاركر، ل دەستپێكێ ل دەڤەرێن چیایی گاز دێ هێتە بەلاڤكرن.
وی ژێدەری ل پەرلەمانێ ئیراقێ بۆ رۆژناما ئەڤرۆ گۆت: «رێڤەبەریا بەلاڤكرنا گازا سپی ل ئیراقێ سۆزدایە حەفتیا بهێت پشكا هەرێما كوردستانێ یا گازا سپی بهێتە هنارتن، پشتی رێكارێن كارگێڕی، ئێكسەر دەست ب بەلاڤكرنا گازێ لسەر وەلاتیان دێ هێتە كرن، گازا دهێتە بەلاڤكرن ب بهایێ پالپشتی كریە و هەر خێزانەك دێ بەرمیلەكا گازێ وەرگریت».
ژ لایێ خۆڤە، ژێدەرەكی ل وەزارەتا سامانێن سرۆشتی یا هەرێما كوردستانێ بۆ رۆژناما ئەڤرۆ گۆت: «هەموو بەرهەڤی بۆ بەلاڤكرنا گازا سپی هاتینە كرن، ئەم چاڤەرێی بەغدا دكەین بۆ هنارتنا پشكا هەرێما كوردستانێ، مینا سالێن بۆری، ل گورەی پلێتا ئەلكترۆنی گاز دێ هێتە بەلاڤكرن و ل دەستپێكێ گاز ل دەڤەرێن چیایی دێ هێتە بەلاڤكرن، ژ بەركو پلەیێن گەرمێ زووتر نزم دبن».
