دەزگەهێ خێرخوازی یێ بارزانی ل زاخۆ هاریكاری پێشكێشی نەخوەشان كرن

زاخۆ، دلۆڤان هالۆ:

محەمەد مەهدی، بەرپرسێ نڤیسینگەها زاخۆ یا دەزگەهێ خێرخوازی یێ بارزانی بۆ ڕۆژناما ئەڤرۆ دیاركر كو دەزگەهێ خێرخوازی یێ بارزانی ب هەڤكاری ل گەل نوونەرییا دەزگەهێ خێرخوازی یێ بارزانی ل ئەمریكا، هاریكاریا دارایی پێشكێشی دو نەخوەشێن ئیدارەیا سەربخوە یا زاخۆ كر.
بەرپرسێ نڤیسینگەها زاخۆ یا دەزگەهێ خێرخوازی یێ بارزانی گۆت: «ئەڤ هاریكاریا دارایی پێكهاتیبوو ژ هزار و 300 دۆلاران بۆ هەر نەخوەشەكی، ئەڤ هاریكاریە د چارچۆڤەیێ پڕۆژەیێ هاریكاریا دارایی یێ مرۆڤایەتی یێ دەزگەهێ خێرخوازی یێ بارزانی دایە ژ بۆ هاریكاری و پشتەڤانیكرنا نەخوەشان كو دابینكرنا تێچوویێ چارەسەریا نەخوەشی و نشتەرگەیێن وان».
گۆت ژی: «پێشكێشكرنا ڤان جۆرە هاریكاریان ب مەرەما كێمكرنا بارگرانیێ یە ل سەر ملێ نەخوەشان و پشتەڤانییە ل ماف و پێدڤیێن وان یێن ساخلەمی».

کۆمێنتا تە