كورد د پۆستێن ئەمنی و كارگێڕی یێن كەركووكێ دا هاتینە پشتگوهـ هاڤێتن
شاندەكێ فراكسیۆنا پارتی دیموكراتی كوردستان د جڤاتا نوونەرێن ئیراقێ دا ب مەرەما ژ نێزیك ئاگەهداربوون ل سەر كێشە و ئاریشەیێن باژێڕی سەرەدانا كەركووكێ كر. د كۆنگرەیەكێ ڕۆژنامەڤانی دا، شاخەوان عەبدوللا، سەرۆكێ سەرۆكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕاگەهاند، كورد د فەرمانگەهێن حوكمەتێ و دەزگەهێن ئەمنی یێن كەركووكێ دا ب تەمامی هاتینە پشتگوه هاڤێتن و كار بۆ ڤەگەڕاندنا هەڤسەنگیێ دكەن.
شاخەوان عەبدوللای گۆت ژی» پارتی ژ بەر سەنگ و پێگەهێ خوە د ناڤ جڤاتا نوونەران دا، هەروەسا هەبوونا ئەندامان د هەموو لیژنەیێن گرنگ وەك (پەترۆل، دارایی، خواندنا بلند، چاندن و بازرگانی) دا، دشێت ڕۆلەكێ كارا بگێڕیت و ببیتە هاریكارەكێ باش بۆ چارەسەركرنا ئاریشەیێن كەركووكێ».
ناڤبری ڕەخنەیێن توند ل ڕەوشا ئەمنییا باژێڕی گرتن و گۆت»ژ فەرماندەیا ئۆپەراسیۆنان بگرە هەتا خوارێ، چ كوردەك بەرپرسێ فەرمانگەهەكا ئەمنی نینە، ئەڤ چەندە ژی نەدادییەكا گەلەك مەزنە».
دەربارەی پرسا داگیركرنا زەڤییێن چاندنێ ل بن ناڤێ «وەبەرهێنانێ»، ئاشكرا كر كو پڕۆسەیەكا نەشرین دەست پێكرییە و ب تەمامی دژی ڕێنمایێن ماددەیێ 140ێ نە. بۆ ڤێ مەرەمێ ژی گۆت «ب فەرمی مە نڤیسار ئاراستەی سەرۆكوەزیرێن ئیراقێ كریە دا كو پڕۆسەیا وەبەرهێنانێ ل سەر وان زەڤییان بهێتە ڕاگرتن». هەڤدەم د بەرسڤا سكالایا وەلاتییەكێ دا ل سەر هەمان پرس، ئاشكرا كر كو ب مخابنی ڤە د هندەك پڕۆژەیێن داگیركاریێ دا دەستێ كوردی تێدایە، لێ دوپات كر كو دێ ب توندی ڕێگریێ لێ كەن و هەر وێ ڕۆژێ ژی ل سەر ڤێ پرسێ دگەل فەرماندەیێ ئۆپەراسیۆنێن كەركووكێ كۆم دبیت.
دەربارەی بۆشاییا ئەمنی، ڕۆهن كر كو لڤینێن تیرۆریستان زێدە بووینە و ڤالاهی نەك بتنێ ل كەركووكێ یە، بەلكو هەتا سنۆرێ شنگالێ درێژ دبیت. دیاركر ژی كو هەكە هێزا هەڤپشك ژی نەبیت، پێدڤییە ئۆپەراسیۆنێن هەڤپشك هەبن یان ژی هێزا پێشمەرگەی بزڤڕیتە وان دەڤەران بۆ پاراستنا ئاسایشێ. ئاماژەكر ژی كو هێزەكا هەڤپشك یا سێ هزار و 777 كەسی هاتییە پێكهینان و ل سالا 2024ێ دا ل سنۆرێ سەرگەڕان هاتینە بەلاڤكرن، و بڕیارە فەوجەك ژ وان ژی بهێتە هنارتن بۆ سنۆرێ پردێ.
دەربارەی پۆستێ پارێزگارێ كەركووكێ، دووپات كر كو دڤێت بڕیاردان ل سەر پۆستێ پارێزگاری و پۆستێن كارگێڕی ل سەر بنەمایێ ئیرادەیا خەلكێ كەركووكێ بیت. گۆت ژی « ل نێزیك دا دێ گوهۆڕینێن كارگێڕی هێنە كرن، هەكە ئیرادەیا كەركووكییان بۆ هەلبژارتنا پارێزگاری و جڤاتان ل بەر چاڤ بهێتە وەرگرتن، مە ژی وەك پارتی دێ ئاخڤتنا خوە هەبیت».
شاخەوانی سۆز دا كەركووكییان كو ل گەل زڤڕینا وان بۆ بەغدایێ و ب پشتبەستن ب دەستبەكاربوونا هەموو وەزیرێن پەیوەندیدارێن كابینەیا حوكمەتێ، ب جدی كار ل سەر ڤان كەیسان بكەن و ئەنجامان بگەهیننە وەلاتییان، ژ بەر كو پارتی كێشەیێن كەركووكێ ئێخستینە د ستۆیێ خوە دا.
