رێناس جانۆ: ریێا پارچەبوونا عیراقێ یا خۆش دبیت
ئەڤرۆ:
دووھی د روونشتنا خوە یا ئاسایی دا ھەموو پەرلەمانتارێن کورد و سونە ژ ھولا پەرلەمانێ عیراقێ دەرکەفتن پشتی ھەڤپەیمانیا شیعی پێشنیارا کونگرێسێ ئەمریکی ئەوا بۆ پرچەک کرنا ھێزێن کوردی و سونی کری، رەتکری و نەرازیبوونا خوە ل سەر دیارکری، پەرلەمانتارەکێ کورد ژی دیار دکەت کو ئالیێ شیعی ھەموو ئەو پێشنیارە رەتکرن و بێ کو تێبگەھن، ئالایێ (نەخێر) راکر.
رێناس جانۆ ئەندامێ پەرلەمانێ عیراقێ ل سەر لیستا پارتی دیموکراتی کوردستان دیار کر کو ئالیێ ھەڤپەیمانیا نیشتمانی رێکنەکەفتن ل سەر دارشتنا بەیاننامەکێ و بۆ ئەڤرۆ گوت” ئەم ژ ھولا پەرلەمانی دەرکەفتین ب ھەموو ئالیێن کوردی و سونی پشتی کو ھەڤپەیمانیا شیعی ئەو پێشنیارا کونگرێسێ ئەمریکی دای بۆ پرچەککرنا ھەردو ھێزێن کوردی و سونی ڤە رەتکری و ب چو رەنگان قەبوول نەکری”.
رێناسی ئاماژە ب وێ چەندێ کر کو کەس ھندی کوردان و سونیان زیاندار نەبویە و گوت” د شەڕێ داعشێ دا پشکا شێری یا زیانان ب کوردان و سونیان کەفتیە و مافێ مەیێ رەوایە کو ھەموو دەولەتێن جیھانێ چەکی ب ھێزێن پێشمەرگەی بدەن و نە منەتە، چونکی ئەم نوکە نوونەراتیا ھەموو جیھانێ دکەین و داعشێ ژناڤ دبەین”.
رێناسی ئەو چەندە دیارکر کو بەھانەیا ھەڤپەیمانیا شیعی نەیا رەوایە و گوت” شیعە وەسا دیار دکەن کو پێدڤیە چەک ب رێیا دەزگەھێن قانووندانانێ ڕا بگەھیتە ھەرێما کوردستانێ و ب رێیێن دستووری رەفتار ل گەل بھێتە کرن کو ئەڤە ژ دەستپێکا شەڕێ مە ل گەل داعشێ مە سەربۆر یێن ھەین کو بەغدا خەمساری د ھاریکاریێن لەشکری دا بەرامبەر پێشمەرگەی کریە “.
ئەندامێ پەرلەمانێ عیراقێ وێ چەندێ دیار دکەت کو ئێدی ئەم ب کریار ھەڤدو قەبیل ناکەین و گوت” پرۆژێ پارچەبوونا عیراقێ ژ مێژە دەستپێکری و ب تایبەت پشتی ئازادیا عیراقێ کو ھەموو بەرپرسیارێن عیراقی ب چو رەنگا ھەڤدو قەبوول ناکەن، نە ب رێیێن دستووری و نە ب رێیێن دیالۆکێ کو ئەڤە ژی دبیتە رێخوەشکەر بۆ پارچەبوونا عیراقێ بۆ سێ ھەرێمان”.
رێناس جانۆی دیارکر کو ھەر ژ دەنگدانێ ل سەر دستوورێ عیراقێ و ھەتا نوکە، کورد د پێگیرن و گوت” چو ئالیان وەکو ھەرێما کوردستانێ پێگیری ب دستووری نەکریە و ھەر دەمەکی ئالیێ دی ڤیایە ئەرکێن وان یێن بەرامبەر کوردستانێ پێشێل بکەن و بھێنە پشت گوە ھاڤێتن”.
ناڤبری دیارکر کو ھەموو ئالیێن کوردی ل سەر وێ چەندێ د رژدن و گوت” ھەموو ئالیێن کوردستانی د پەرلەمانێ عیراقێ دا د رژدن کو پێدڤیە جیھان ئێکسەر چەکی ب پێشمەرگەی بدەت”.
ئاشکەرا کر ژی کو چ پەیوەندیا پرچەککرنا پێشمەرگەی ژلایێ ئەمریکا ڤە ب پرۆژێ دەولەتا کوردی ڤە نینە، چونکی ئەڤە خواستەکا بەردەواما خەلکێ کوردستانێ یە، لێ دەم و جە ھاتینە گۆھارتن و بو ھەموو جیھانێ ژی یا دیار بووی کو کورد کیانەکن دشێن خوە برێڤە ببەن و پێدڤیە رەفتار ئێکسەر ل گەل بھێتە کرن.
ئه‌ڤ ديداره چه‌كدار ئه‌ترووشى بۆ رۆژناما ئه‌ڤرۆ به‌رهه‌ڤكريه