عه‌بادى: ناهێلين رومادى ب كه‌ڤيت
ئه‌ڤرۆ نيوز:
سه‌رۆك وه‌زيرێن عيراقێ ته‌كست ل سه‌ر وێ چه‌ندێ كر كو ئه‌و رێ ناده‌ن رومادى ب كه‌ڤيت و د چه‌ند ده‌مژمێرێن بهێت دا، ره‌وشا وى باژێرى دێ د به‌رژه‌وه‌ندا هێزێن ئه‌منى دا بيت.
د گۆتاره‌كێ دا كو كه‌نالێ عيراقيه په‌خشكريه، حه‌يده‌ر عه‌بادى، سه‌رۆك وه‌زيرێن عيراقێ ته‌كست ل سه‌ر وێ چه‌ندێ كر كو ئه‌و رێ ناده‌ن باژێرێ رومادى بكه‌ڤيته ده‌ست تيرۆرستێن داعش، د سه‌ر هندێ را كو پشكه‌كا هه‌ره مه‌زنا وى باژێرێ د ده‌ستێن داعش دايه.
ب گۆتنا عه‌بادى د چه‌ند ده‌مژمێرێن بهێت دا، ره‌وشا ئه‌منى يا وى باژێرى دێ گوهۆڕين ب سه‌ر دا هێن د به‌رژه‌وه‌ندا هێزێن ئه‌منى يێن عيراقى و خه‌لكێ دلسۆزێ ئه‌نبار دا.
ژ لايه‌كێ دى ڤه فه‌رماندێ ئۆپه‌راسيۆنێن هه‌ڤپشك د به‌ياننامه‌كێ به‌لاڤكريه كو هێزێن ئه‌منى يێن عيراقى هێرشێن هه‌ڤدژى ل گه‌ل داعش ل رومادى ئه‌نجام داينه.
د چارچۆڤێ سۆپايێ ئه‌مريكا دا، د به‌ياننامه‌كێ دا به‌لاڤكريه كو فرۆكێن شه‌ركه‌رێن هه‌ڤپه‌يمانان د 24 ده‌مژمێرێن بۆرى دا، 24 هێرشێن ئه‌سمانى كرينه سه‌ر بنگه‌هـ و باره‌گايێن داعش ل عيراقێ و سوريا و 12 ژ وان هێرشان ل بێجى و فه‌لۆجه و رومادى بووينه.
ژ لايه‌كێ دژى ڤه كۆچكا سپى يا ئه‌مريكا به‌لاڤكر كو جۆن بايدن، جێگرێ سه‌رۆك كۆمارێ ئه‌مريكا، د په‌يوه‌نديه‌كا تله‌فۆنى دا ل گه‌ل حه‌يده‌ر عه‌بادى، سه‌رۆك وه‌يزيرێن عيراقێ ل دۆر ره‌وشا ئه‌منى يا پارێزگه‌هێ دانوستاندن كرينه و ژ لايێ بايدن ژى ڤه ته‌كست ل سه‌ر وێ چه‌ندێ هاتيه كرن كو ب له‌ز دێ هاريكاريێن له‌شكرى بۆ هێزێن ئه‌منى يێن عيراقى ره‌وانه كه‌ن.