پێشینێن، نڤیسەران و سەندیکایێن ھونەرمەندان و رۆژنامەڤانان دێ ھێنە ڤەگەراندن
ئەڤرۆ نيوز:
رێڤەبەرێ گشتیێ رەوشەنبیری و ھونەری ل پارێزگەھا دھۆکێ بۆ بەرپەرێ ھونەری یێ رۆژناما ئەڤرۆ دیارکر کو کومبوونەەک ل سەر ئاستێ ئەنجوومەنێ وەزیران ل حوکمەتا ھەرێما کوردستانێ ھاتبووکرن، دەست ھەلات ب وەزیرێ دارایی و ئابووری ھاتبوونەدان، پێشینێن سەنتەر و گرۆپێن ھونەری بێی وەزارەتا رەوشەنبیری بھێنەبرین، نەبتنێ بیاڤێ رەوشەنبیری بەلکو ھەموو بیاڤان، ئەڤە بریارەکا د جھێ خوە دابوو کو دڤێت چاڤ خشاندنەکێ د خوە دا بکەین،
ئەیوب رەمەزان رێڤەبەرێ گشتیێ رەوشەنبیری و ھونەری بۆ بەرپەرێ ھونەری ئاشکراکرکو ل سەر ھەمان بابەت ئەنجوومەنێ وەزارەتا رەوشەنبیری ل گەل وەزیرێ رەوشەنبیری کومبوونەک ئەنجام دا، پشتی ڤەکۆلین ل سەر ھاتیەکرن گەھشتینە وی ئەنجامی کو دڤێت سەردەری ل گەل کاودانێن نوکە بھێتەکرن و پێداچوونەک دکارێن رەوشەنبیری دا بھێتەکرن، ھەتا ل سەر ئاستێ قەزایان ژی ئەڤ گرۆپ و سەنتەرێن رەوشەنبیریێن زێدە پێداچوون تێدا بھێتەکرن و گرۆپ و سەنتەر بھێنەلێکدان و ھەموو پێکڤەکاربکەن، ئارمانج نە پشت گوە ھاڤێتنا ئەوا کەسانە یێن دناڤ گرۆپان دا، بەلکو دێ گوھۆرین دھەیکەلێن کارگێری دا ھێنەکرن ب مەرەما پتر خزمەتا بیاڤێ ھونەری ل باژێری.
رێڤەبەرێ گشتیێ رەوشەنبیری ھونەری ئاشکراکر ژی کو پشتی ھەموو پێشنیار ھاتینە وەرگرتن، لژنەک ل سەر ئاستێ وەزارەتێ ژ رێڤەبەرێن گشتی ھاتە پێکئینان، و ل سەر حەفت خالان گەھشتینە ئەنجامەکی، مە ب رێکا وەزارەتا رەوشەنبیری و ھونەری رادەستی نڤێسینگەھا وەزیرێ دارایی کریە، مە خواستیە پێشینێن سەندیکا ھونەرمەندان، ئێکەتیا نڤیسەران، سەندیکا رۆژنامەڤانان، گرۆپێن مۆزیکێ، ل گەل ھندەک سازیێن تایبەمەند، بھێنە ڤەگەراندن، سەنتەر و گرۆپێن ھونەری، کریێن وان ھەتا ١/٧ بھێنەمەزاختن، چونکە ئەڤە مافێ خەلکی یە، دیسان ئەڤ سەنتەر و گرۆپە ژ کرێیان دەر کەڤن و ھەر چو گرۆپ و سەنتەر نەھا تینەلادان و دەستووردان ژ چو سەنتەران نەھاتیەکێشان، بتنێ ب دەمی ھاتینە ڤەگوھاستن کو کرێ ل سەر گران نەبیت، دیسان مە خواستیە ئەو سەنتەر و گرۆپێن مە پێ باش و یێن چالاک پێشینێن وا بمینن و بھێنە ڤەگەراندن، ھەکە ئەڤە نەھێتە بجە ئینان، ل گەل پێشنیارا دی نە کو ئەڤ پێشینە ببیتە بۆدجە بۆ رێڤەبەریا گرۆپ و سەنتەران وەک رێکخراوێن جڤاکێ مەدەنی سەردەری ل گەل کاری بھێتەکرن و دێ ڤێ چەندێ ئەنجامێن باش ھەبن، دیسا دچارچووڤێ ئەوان خالان دا مە خواستیە مووچێ رێزلێنانێ یێ ٦١٩ نڤیسەر و ھونەرمەندان بھێتەڤەگەران، چونکە ئەڤان چو ژێدەرێن دارایی نین.
ئەیوب رەمەزانی گۆت ژی: ل پارێزگەھێ دو گرۆپێن ھونەرێ مللی ھەنە، گرۆپێ (دھۆکێ و شاریا) ل دەور بەران ھەنە لێ نەفەرمی نە، نوکە بۆ ھەر ھەلکەفتەکێ دبەرھەڤن، ژێرخانا رەوشەنبیری دھۆکێ یا لاوازە و ھەکە قەیرانا نوکە نەھاتبا دبەرنەمێ مەدا بوو ھەتا سێ ھولان ل پارێزگەھێ بھێنە دروستکرن، ھەکە ژێرخان ھاتەچێکرن مە بەرنامە ھەیە رۆژانە بزاڤێن کەلتوری ھەبن .
رێڤەبەرێ گشتیێ رەوشەنبیری و ھونەری ھێشتا گۆت: سەنتەرێن چالاک دێ ھەر مینن و گرۆپێن ھونەری دەستھەلاتێن رێڤەبەریا گشتی یا رەوشەنبیری و ھونەری نە و ھەر دەمێ مە دیت پێدڤی پێ ھەیە دێ ھێتەدروستکرن.
ھەمبەر تیپێن مۆزیکێ ژی، رێڤەبەرێ گشتی گۆت: مە چوو تیپ لانەداینە، تیپێن دھۆکێ، روباد بەھدینان ناھێنەلادان و دبیت بھێنەلێکدان و ھەر ھەموو ئەندامێن تیپێ دێ کار کەن یێن و رۆلێ خوە بینن و جھێ ھەر مۆزیکژەنەکێ دھۆکێ دێ تێدا ھەبیت، بتنێ نوکەیێن ژ کرێیان ھاتینە دەرخستن بۆ جھەکێ دی ھاتینە ڤەگوھاستن، ئەیوبی گۆت ژی: گرێبەستێن ئەڤان مۆزیک ژەنان ل سەر پێشینێن وان بوو و پێشینە ھاتنەبرین گرێبەست ژی ھاتنەبرین و بتنێ گرۆپێ روباد گرێبەست پێشت وەخت ھەبوون ل سەر دەمێ پارێزگەرێ دھۆکێ یێ بەرێ (عەبدولعەیز تەیب)ی بۆ ھاتبوونە چێکرن و دێ بزاڤان کەین بۆ ھەر دو گرۆپێن دی ژی ل پاشەرۆژێ گرێبەستێن فەرمی بھێنە دروستکرن.
ھەمبەر رەوشا شێوەکاری ژی، ئەیوبی گۆت: ل گەل نینم گرۆپێن شێوەکاری ھەبن، بەلێ ل گەل زێدەکرنا گەلەریا مە ل ھەموو قەزایێن پارێزگەھێ مە، ھەمبەر سینەمایێ ژی گۆت: ھەمان شێوە پشتەڤانێن گرۆپێن سینەمایێ ناکەین و مە رێڤەبەریا سینەمایێ ھەیە، پشتەڤانی ل ھەبوونا کومپانیێن بەرھەم ئینانێ یێن سینەمایێ دکەین و ب خوەشحالی ڤە سێ کەسان بزاڤ کرینە کومپانیێن سینەمایێ یێن پرۆدەکشن ڤەکەن و بەرھەمێن سینەمایێ چێکەن و ئەڤە بار سڤکیە بۆ حوکمەتێ.
رێڤەبەرێ گشتیێ رەوشەنبیری ل دووماھیێ گۆت: داخازی ژ ھەموو ھونەرمەند و رەوشەنبیرا دکەم کو ئەڤە قۆناغەکا دەمکی یە و چو کەس ناھێنە پشت گوە ھاڤێتن و ھەر تشتەکێ بمینت بۆ ھەموو خەلکی یە .