ئاژانسەکا ئەلمانیا: ناگەھیتە سالەکێ دێ رژێما بەشاری ژناڤ بچیت
ئه‌ڤرۆ نيوز:
ئاژانسەکا نووچەیان یا ئەلمانیا د راپۆرتەکێ دا دیار دکەت کو چەکدارێن حزبوللا لوبنانێ و ھێزێن بەشاری ل سووریێ رۆژ ب رۆژێ لاواز دبن و نھا ھێزێن بەرھنگار و چەکدارێن ھشکباوەر ل رەخ باژارێ دیمەشق ب ھێزتر بووینە و شیعێن لوبنانێ ژی پشتەڤانیێ ل سیاسەتا حزبوللاھێ ناکەن و دھێتە چاڤەرێن کرن کێمتر ژ سالەکێ رژێما بەشاری ژناڤ بچیت.
ئاژانسا DPA یا ئەلمانیا د راپۆرتەکێ دا دیار دکەت کو ھێزێن ھەڤپەیمان ب سەرۆکاتیا ئەمریکا کو شەرێ داعشێ دکەن نھا ب باشی چاڤدێریا رەوشا سووریێ دکەن، ھێزێن چەکدارێن بەرھنگارێ سووریێ نھا لاوازن و ژ بەر ھندێ ژی ئەمریکا و وەلاتێن ھەڤپەیمان دخوازن بلەز چەکدارێن بەرھنگاریێ ب ھێز بکەن دا کو ئەو بشێن پشتی ژناڤچوونا رژێما بەشاری دیمەشقێ کۆنترۆل بکەن، چونکو ئەمریکا و وەلاتێن ھەڤپەیمان کو نھا شەرێ داعشێ دکەن ناخوازن ب چو رەنگەکێ داعش و رێکخستنێن دی یێن ھشکباوەر خوە نێزیکی دیمەشقێ بکەن و ژ بۆ وێ یەکێ ژی دەمێ پێدڤی بیت ئەو دێ ھێرشی وان بکەن دا ئەو خوە نێزیکی دیمەشقێ نەکەن.
د پشکەکا دی یا راپۆرتێ دا ھاتیە دیار کرن کو ھێزێن رژێما سووریێ ئێدی نەشێن شەری بکەن و رۆژ ب رۆژێ ژی گەلەک ژ سەربازێن رژێما ئەسەدی درەڤن و دچن، ل ئالیێ دی چەکدارێن حوبوللا لوبنانێ کو ل سووریێ شەری دکەن ژی نھا لاواز بووینە و بەری نھا ل رەخ دیمەشقێ د ئەنجاما چەند ھێرشێن چەکدارێن سووریێ گەلەک ژ وان ھاتینە کوشتن و رەوشا وان ل سوووریێ نھا گەلەک خرابە، ل ئالیێ دی شیعێن لوبنانێ ژی پشتەڤانیێ ل سیاسەتا حزبوللاھێ ناکەن و وێ یەکێ ژی کاریگەریا خوە ل سەر شەرێ وان ل سووریێ کریە.
ل گۆر راپۆرتا ھەمان ئاژانسێ گەلەک ژ سەرکردێن شیعێن لوبنانێ دژی دەستێوەردانێن حزبوللاھێ ل سووریێ نە و دیار دکەن کو ئەو یەک دێ زیانەکا خوە یا مەزن بۆ لوبنانێ ژی ھەبیت و ژ بەر ھندێ دھێتە چاڤەرێ کرن کو کێمتر ژ سالەکێ حزبوللا ژی ل سووریێ تووشی شکەستنێ بیت.
د پشکەکا دی یا راپۆرتێ دا ھاتیە دیار کرن کو ئەمریکا ب چو رەنگەکێ ناھێلیت کو دیمەشق بکەڤیتە دەستێ داعش و گرۆپێن دی یێن تیرۆرستی و ژ بەر ھندێ فرۆکێن شەری دێ ب توندی ل ھەر ھێزەکێ بدەن کو بخوازن دیمەشقێ داگیر بکەن و نھا ئەمریکا و وەلاتێن ھەڤپەیمان دخوازن بلەز چەکدارێن بەرھنگاریا سووریێ ئامادە بکەن دا ئەو بشێن پشتی ژناڤچوونا رژێما سووریێ دیمەشقێ کۆنترۆل بکەن و پاشی ژی ئەمریکا و وەلاتێن ھەڤپەیمان دێ ل گەل بەرھنگاریا سووریێ شەرێ داعشێ و رێکخراوێن دی بکەن، چونکو مەرەما سەرەکی یا ھێزێن ھەڤپەیمان ئاڤاکرنا دەستھەلاتەکا دیموکراتیکە ل سووریێ و ھەموو بەرنامە ل گۆر قۆناغا پشتی ژناڤچوونا بەشاری ھاتیە ئامادەکرن و نھا پێنگاڤ ب پێنگاڤ ژی کار بۆ وێ یەکێ دھێتە کرن.
د دووماھیا راپۆرتا DPA یا ئەلمانی دا ئاماژە ب وێ یەکێ ژی ھاتیە کرن کو یا ل گرێ سپی ھاتیە کرن و نھا ژی ھێزێن کوردی بەر ب رەقە ڤە دچن ھەموو بەرنامێن ئەمریکا نە و کورد دێ ل سووریا نوو دا جھەکێ خوە یێ گرنگ ھەبیت و ئەمریکا و وەلاتێن ئوروپا ژی دخوازن کو کورد ببنە پشکەک ژ سیستەمێ نوو ل سووریێ.
ل ئالیێ دی سەرۆک کۆمارێ ئیرانێ حەسەن رۆحانی ژی دوھی د داخۆیانیەکێ بۆ ئاژانسا مێھر یا ئیرانێ ئاخڤی و دیار کر کو ئیران دێ ب ھەموو ھێزا خوە پشتەڤانیێ ل سووریێ کەت و ناھێلیت کو دیمەش ژناڤ بچیت، چونکو رەوشا نھا ل رۆژھەلاتا ناڤین مەترسیا خوە بۆ ھەموو وەلاتان ھەیە و ئەم ناھێلین کو ھندەک ھێز بگەھنە ئارمانجێن خوە و مەترسیا بۆ مە دروست بکەن.