سەیدو چەتو: ھەکە رزگارکرنا شنگال ب ھیڤیا عیراقێ ڤەبیت دێ مینت داگیرکری
ئه‌ڤرۆ نيوز:
نوونەرێ خەلکێ شنگال ل جڤاتا پارێزگەھا نەینەوا بۆ ئەڤرۆ ئاشکرا کر، سالەک ب سەر کارەساتا شنگال ڤە بۆری و ھیشتا ھاریکاریا ئێک ملیۆن دیناری ب دروستاھێ نەھاتیە دان و ل دووڤ دووماھیک ئامار ھەتا نھا ٢٥ ھزار ئاواران ھاریکاریا ئێک ملیۆن دیناری وەرنەگرتیە، ژ وان ئاواران ژی ١٨ ھزار ل دھۆکێ نە و پڕانیا وان خەلکێ شنگال ب خوە نە.
سەیدو چەتو سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا دیار کر، حوکمەتا عیراقێ د سالا بۆری و ئەڤ سالە ژی دا چ پێنگاڤێن رژد نەھاڤێتینە ژ بۆ رزگارکرنا شنگال و ھاریکاریا ئاواران و رزگارکرنا کچ و ژن و زارۆیێن ھەتا نھا ماینە د ناڤ دەستێن رێکخراوا تیرۆرستی یا داعش دا و گۆت “پێنگاڤێن حوکمەتا عیراقێ گەلەک د لاوازن و چ ناکەت و بەری نوکە چەندین جاران مە سەرا بەغدا دایە و داخوازیێن خەلکی گەھاندینە حوکمەتا عیراقێ لێ چ نەکریە”.
سەیدو چەتو زێدەتر گۆت “ئەڤە سالەک سەر داگیرکرنا شنگال و گەلەک دەڤەرێن دی یێن کوردستانێ ڤە چوو و ھەکە رزگارکرنا شنگال ب ھیڤیا حوکمەتا عیراقێ ڤەبیت رەنگە دەە سالێن دی ژی چ پلان نەھێنە دانان بۆ رزگارکرنا شنگالێ و حوکمەتا عیراقێ دڤێت ژێرخانا ئابووری یا شنگالێ بچیتە د بن سفرێ دا و ئەڤە چەندین ھەیڤ سەر رزگارکرنا ناحیا سنوونێ را چوون ھێشتا حوکمەتا عیراقێ بەرنامەک بۆ گەھاندنا خزمەتگوزاریان نەدانایە”.
چەتو ئاماژە دا وێ چەندێ ژی کو خەلکێ شنگال ئێدی نەڤێت سەر بەغدا ڤەبن و داخوازێ دکەن شنگال ببیتە پارێزگەە و سەر ب ھەرێما کوردستانێ ڤە بیت، چونکو ئەو باش دزانن ھەکە شنگال ب ھیڤیا ھەرێمێ ڤەبیت دێ ئاڤەدانی تێدا ھێتە کرن و دێ وەکو جاران شنگال ڤەگەریت.