توركیا غازا هه‌رێما كوردستانێ ل شوینا غازا روسی دێ كڕێت
ئه‌ڤرۆنیۆز، ئه‌یاد به‌رواری
رۆژنامه‌كا توركی به‌لاڤكر كو توركیا چاره‌ك یا دیتی هه‌كه روسیا فرۆتنا غازێ بۆ توركیا ڕاگریت و حوكمه‌تا هه‌رێما كوردستانێ هزر د فرۆتنا غازا سروشتی بۆ توركیا دكه‌ت.
رۆژناما (سه‌باح) یا توركی دبێژیت” سه‌ره‌رای دوپاتیا شاره‌زایان كو روسیا ژبه‌ر ڕێككه‌فتنان، نه‌شێت هنارتنا غازا سروشتی بۆ توركیا ڕابگریت، به‌لێ نوكه دلته‌نگی ل توركیا یا په‌یدابووی ل دۆر وێ پرسێ، د ده‌مه‌كی دا به‌رسڤ ژ حوكمه‌تا هه‌رێما كوردستانێ هات كو دیاركر ئه‌و یا به‌رهه‌ڤه غازا سروشتی بۆ توركیا هنارده بكه‌ت”.
رۆژناما توركی دیاركر ژی” حوكمه‌تا هه‌رێما كوردستانێ هزر د هنارتنا غازا سروشتی بۆ جیهانێ دكه‌ت و بۆ خوه جهه‌كی د بازارێ جیهانی دا ببینیت و ب ڤێ چه‌ندێ ژی پشتبه‌ستنا توركیا ل سه‌ر غازا سروشتی یا روسی دێ كێم بیت”.
