نووكريه: داخۆيانيا پۆليسێن دهۆك ل سه‌ر كێشا كه‌له‌كچى
ئه‌ڤرۆ نيوز، بارزان مزوورى:
رێڤه‌به‌رێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك راگه‌هاند كو د شه‌رێ ئه‌ڤرۆ د ناڤبه‌را دو خێزانان دا ل كه‌له‌كچى روودايى، كه‌سه‌كى گيانێ خوه ژ ده‌ست دايه و دو ژى بريندار بوويه و هنده‌ك تۆمه‌تبار هاتينه ده‌سته‌سه‌ركرن.
نه‌قيبێ مافپه‌روه‌ر، هێمن سلێمان، رێڤه‌به‌رێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك، د داخۆيانيه‌كێ دا بۆ ئه‌ڤرۆ نيوز راگه‌هاند كو ژ ئه‌نجامێ كێشه‌كا جڤاكى ئه‌ڤرۆ ده‌مژمێر 2:30 شه‌روپێكدادان د ناڤبه‌را دو خێزانان دا روودا.
هێمن ساێمان گۆت: “د ڤى شه‌رى دا، كه‌سه‌ك هاته كوشتن و دو كه‌ش ژى بۆ نه‌خۆشخانا ته‌نگاڤيان ل دهۆكێ هاتينه ڤه‌گۆهاستن و هنده‌ك كه‌س ژى وه‌كو تۆمه‌تبار هاتينه ده‌سته‌سه‌ركرن”.
رێڤه‌به‌رێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك ئاماژه ب وێ چه‌ندێ ژى كر كو ژ ئه‌گه‌رێ كێشه‌كا جڤاكى بوويه، به‌رى نوكه ژى هنده‌ك كێشه د ناڤبه‌را هه‌درو لا دا هه‌بوون و گۆت: “ئه‌ڤ كێشه ل بنگه‌هێ پۆليسێن كه‌له‌كچى هاتيه تۆماركرن”.