وه‌حيد كۆڤلى بۆ ئه‌ڤرۆ نيوز به‌حس ل داعش دكه‌ت
ئەڤرۆ، چەکدار ئەترووشی:
فەرماندەکێ ھێزێن پێشمەرگێ کوردستانێ ل میحوەرێ باتنایە و تلسقوف دیارکر کو پشتی کونترۆلکرنا زومار ورەیا تیرۆرستنێن داعش نەمایە و رۆژ بۆ رۆژێ ل کێمیێ د دەت.
لیوا وەحید کوڤلی ئاماژە ب وێ چەندێ کر کو رۆژانە پێشمەرگە بوردوەمانا داعش دکەن و بۆ رۆژناما ئەڤرۆ گوت” پشتی کونترۆلکرنا ناحیا زومار ژلایێ پێشمەرگێ کوردستانێ ڤە، ترسەکا مەزن کەفتیە دناڤ رێزێن تیرۆرستێن داع شدا و ورەیا وان نەمایە بتنێ نەبیت خوە بپارێزن ژ ھێرشێن پێشمەرگەی و توپبارانکرنا فرۆکێن ھەڤپەیمانان”.
کوڤلی ئەو چەندە دیارکر کو بەری چەند رۆژان پێشمەرگەی بوردومانا تیرۆرستێن داعش ل تلسقوف کر و گوت” بەری چەند رۆژان پێشمەرگەی کوردستانێ بوردومانا تلسقوف کرن و شیان چەند تیرۆرستێن داعش ب کوژن ئێک ژوان بەرپرسێ بەتنایێ و تلسقوفێ بۆ کو رەگەز سعودی بوو”.
ناڤبری ئەو چەندە دیارکر کو فرۆکێن ھەڤپەیمانان ھەتا نوکە بدروستی کارێ خوە ل تلسقوف نەکریە و گوت” ھەتا نوکە فرۆکێن ھەڤپەیمانان ب دروستی کارێ خوە ئەنجام نەدایە ل محیوەرێ تلسقوف کو بدیتنا من ئەگەر بۆ وێ چەندێ دزڤریت کو دەڤەرێن مەسیحی نە، ھەکە رۆژانە ئەم پێزانینان د دەینە جھێن بلند بۆ توپارانکرنا تیرۆرستێن داعش”.
ڤی فەرماندێ پێشمەرگەی گیروبونا کونترۆلکرنا تلکێفێ بۆ چەند ئەگەران زڤراندن و گوت” ھەتا قەزا شنگالێ نەھێتـە کونترۆلکرن، باوەرناکەم چو پێشڤەچون ھەبن بۆ تلکێفێ و وان دەڤەران”.
وەحید کوڤلی ئەو چەندە دا دیارکرن کو ھەتا نوکە چەکێ نوو بۆ وان نەچویە و گوت” ھەتا نوکە چو چەکێن نوو بۆمە نەھاتیە و ئەو شەڕێ دھێتەکرن ب چەکێ کەڤنە یێن د دەستێ پێشمەرگەی دا و ئەم ب ھیڤی نە ل دەمەکێ نێزیک چەکێ نوو بۆمە بھێت”.
کوڤلی دیارکر کو پێشمەرگە ل سەر تەکتیکا داعش زال بوویە و گوت” پێشمەرگە ل سەر بزاڤ و لڤینێن داعش زال بوویە، ب ھەموو شێوەیان کونترۆلا سەنگەرێن شەڕی ھاتیە کرن و ئەوا بەری نوکە داعش دکر ب ساناھی پێشمەرگە بەرسێنگێ وان دگریت و ھەر جار تیرۆرست تەکتیکێن خوە یێن شەڕی د گھورن، لێ ھەموو دبێ مفانە”.