بۆچوونا هه‌ده‌پێ ل سه‌ر ريفراندۆما هه‌رێما كوردستانێ چيه؟
ئه‌ڤرۆ نيوز:
پەیڤدارێ پارتیا دیموکراتیک یا گەلان راگەھاند کو بریارا ریفراندۆما ھەرێما کوردستانێ بریارەکا گرنگە و د جھێ خوە دایە، کوردان ژی وەکو ھەموو گەلێن دی یێن جیھانێ ئەڤ مافە یێ ھەی کو ب رەنگەکێ ئازاد بژین و ژ بەر ھندێ ئەم پشتەڤانیێ ل بریارا برایێن خوە ل ھەرێما کوردستانێ دکەین.
ئۆسمان بایدەمیر پەیڤدارێ پارتیا دیموکراتیک یا گەلان ل باژێرکێ قزلتەپە یێ سەر ب پارێزگەھا مێردینێ د ئاخڤتنەکا جەماوەری دا راگەھاند کو ئەم وەکو ھەدەپە کەیفخوەشین پارتێن سیاسی یێن ھەرێما کوردستانێ بریار داینە ئەڤسالە ریفراندۆمێ بۆ سەرخوەبوونا ھەرێما کوردستانێ بکەن، عەرەب، فارس و تورکان چ ماف ھەبیت کوردان ژی ھەمان ماف یێ ھەی و ژ بەر ھندێ ژی دڤێت کوردێن ھەموو جیھانێ پشتەڤانیێ ل ریفراندۆما ھەرێما کوردستانێ بکەن.
پەیڤدارێ پارتیا دیموکراتیک یا گەلان د پشکەکا دی یا ئاخڤتنا خوە دا ئەو یەک ژی دیار کر کو بەرپرسێن تورکیا نەرازیبوونا خوە ل ھەمبەر ریفراندۆما ھەرێما کوردستانێ دیار کرینە، ئەز ب توندی وان شەرمزار دکەم، چونکو ئەردۆگان و ھەڤالێن وی ھەر رۆژ دبێژن کو کورد برایێ مە نە، چاوا ئەو رێزێ ل عەرەب و فارسان دگرن دڤێت وەسا رێزێ ل داخوازیێن برایێن خوە ئانکۆ کوردان ژی بگرن و ژ بەر ھندێ ژی ھەلویستێ تورکیا د جھێ خوە دا نینە و نابیت ئەو ل دژی داخوازیێن رەوا یێن کوردان دەربکەڤن.
پەیڤدارێ پارتیا دیموکراتیک یا گەلان د بەردەوامیا ئاخڤتنا خوە دا ئەو یەک ژی دیار کر کو کوردان دڤێت ل سەر ئاخا خوە ب رەنگەکێ ئازاد بژین، ئانکو کوردان نەڤێت چو مەترسیێ بۆ وەلاتێن دی دروست بکەن و کورد دێ ببنە جیرانێن باش بۆ وەلاتێن ھەڤسویێن خوە ژی، ژ بەر ھندێ ژی ئەز ھێڤیدارم کو ھەموو کورد پشتەڤانیێ ل بریارا برایێن مە ل ھەرێما کوردستانێ بکەن و ھەروەسا دھێتە خواستن وەلاتێن جیھانێ ژی پشتەڤانیێ ل مافێ کوردان بکەن، چاوا گەلێن دی یێن جیھانێ ل سەر ئاخا خوە ب رەنگەکێ ئازاد دژین وەسا کوردان ژی ماف ھەیە خوە برێڤە ببەن و ل سەر ئاخا خوە ب رەنگەکێ ئازاد بژین، ئەزموونێن بەری نھا ژی نیشا داینە کو کوردان چو دەمەکێ مەترسی بۆ وەلاتێن دی دروست نەکرینە.
