رێناس جانۆ: پشتی 25/9 دێ ژنوو کارێ مە ل بەغدا دەست پێ کەت
ئەڤرۆ نيوز:
ئەندامەکێ کورد ل پەرلەمانێ عیراقێ ئاشکراکر کو پشتی 25 ئیلوونێ، دێ ژنوو کارێ پەرلەمانتارێن کورد ل بەغدا دەست پێ کەت و ئەو ژی دێ دانوستاندن بن ل دۆر پرسا سەربخوەیا کوردستانێ، دتەوەرەکێ دی ژی دا دیارکر کو بەغدا نەشێت رێگریێ ل ئەنجامدانا ریفڕاندۆمێ بکەت ل کەرکووکێ و نەشێت بەرامبەر ئیرادا مللەتەکی ب راوەستیت.
رێناس جانۆ ئەندامێ فراکسیۆنا پارتی دیموکراتی کوردستان ل پەرلەمانێ عیراقێ بۆ رۆژناما ئەڤرۆ ئاشکراکر کو گەلەک وەلاتان پێشوەخت پشتەڤانیا خوە بۆ ریفڕاندۆم و سەربەخوەیا کوردستانێ دیارکریە، لێ نەشێن نوکە ناڤێن چو وەلاتان بینن، دیارکر ژی کو پشتی 25/9 دێ سەر و ژنوو کارێ ئەندامێن کورد ل پەرلەمانێ عیراقێ دەست پێ کەت و ئەو ژی دانوستاندنن ل دۆر سەربخوەیا کوردستانێ.
رێناس جانۆی زێدەتر گۆت، ب ھەر رێیەکا ھەبیت ریفڕاندۆم مافەکێ شەرعیێ گەلێ کوردستانێ یە و مافێ کوردستانیانە بریارێ ل سەر چارەنڤیسێ خوە بدەن و چارەنڤیسێ خوە دیاربکەن و ھەکە ئەڤ بریارە بھێتەدان نە ب تنێ ھەلویستێ وەلاتێن ئیرانێ و تورکیا، بەلکو دێ ھەلویستێ پتریا وەلاتێن جیھانێ ھەمبەر کوردان ھێتە گوھۆڕین و ئەڤە ئیرادا مللەتەکی یە و رەنگە وەلات بشێن دژاتیا پارتەکێ یان حوکمەتەکێ بکەن، لێ چو وەلات ل جیھانێ نەشێن دژاتیا ئیرادا مللەتەکی بکەن.
ئاماژە دا ژی، بابەتێ سەربەخوەیی نە بابەتێ دناڤبەرا شەڤ و رۆژەکا دایە، بەلکو دانوستاندنێن دریژ دناڤبەرا ھەر دو حوکمەتێن عیراقێ و کوردستانێ دا دێ ھێنەکرن، نە ب تنێ ب ئەنجامدانا ریفڕاندۆمی دێ ھەموو تشت ب دووماھی ھێن، بەلکو بابەتێ مادا (140) وقەرێن عیراقێ و رێکخستنا رەگەزنامە و پاسپۆرت دڤێت ڤان ھەموو بابەتان راوەستیان ل سەر بھێتەکرن ھەتا ئەم بگەھینە بابەتێ سەربخوەیێ.
ڤی پەرلەمانتارێ کورد ل دۆر داخویانیێن سەرۆک وەزیرێن عیراقێ کو تێدا راگەھاندبوو کو نایبت ریفڕاندۆم ل کەرکووکێ بھێتەکرن، گۆت، بابەت نە کەرکووکە و ھەکە ب بەغدا بیت ئەو ناھێلن ریفڕاندۆم ل ئێک گوندێ کوردستانێ بھێتەکرن، بریار ددەستێ بەغدا دا نینە و ئەڤە ئیرادا مللەتەکی یە و کەس نەشێت رێگریێ لێ بگریت.
رێنا س جانۆی خویاکر ژی، ھژمارەکا باش یا وەلاتێن جیھانێ پشتەڤانێن ریفڕاندۆم و سەربەخوەیا کوردستانێ نە، لێ مە نەڤێت ئاماژێ ب وێ چەندێ بدەینە ڤە، چونکە وەلاتێن جیھانێ پێ خوەشە ھەتا ئەڤ پێنگاڤە بھێتە ھاڤێتن و ددووڤ دا دیار بکەین کا کی پشتەڤانە.
سەبارەت پەیوەندیێن ل گەل رۆژئاڤایێ کوردستانێ ، رێناسی گۆت: نەخشێ رۆژھەلاتا ناڤەراست وڤێ دەڤەرێ دێ ھێتە گوھۆڕین و چو گومان تێدا نینە، بابەتێ رۆژئاڤایێ کوردستانێ ژی بابەتەکێ ھەستیارە وھەستیاریا بابەتی ژی بۆ وێ چەندێ ڤەدگەریت کو پێشتر پرۆژەک ھاتیە پێشکێشکرن ب ناڤێ پرۆژێ بایدنی و دبیت بھێتە بجھئینان و ھەر دەمێ ب بەرژوەندی ژی بھێتە زانین کو ئەڤ پرۆژە بکەڤیتە دبیاڤێ بجھئینانێ دا، دێ ھێتە بجھئینان و دوور نینە ئێکگرتنەک دناڤبەرا ھەردو باشوور و رۆژئاڤایێ کوردستانێ بھێتەکرن.
