کێشێن پارتی گۆڕان چارەبوون.. وەزیرێن گۆڕانێ دێ ڤەگەرن سەر کارێن خوە
ئەڤرۆ نيوز:
پشتی بزاڤا گۆڕان ھەلویستێ خوە د بەربژارکرنێ دا بۆ کومسیۆنێ ل سەر زارێ یوسف محمەد ئاشکرا کری، کو بزاڤا گۆڕان چو کێشە د جەوانیا ھەلبژارتنا پۆستێ سەرۆکێ ھەرێمێ دا نەمایە کو دناڤا خەلکی دا بھێتە ھەلبژارتن، ژێدەرەکێ پارتی دیموکراتی کوردستان دبێژیت، نوکە چو کێشە دناڤبەرا پارتی و گۆڕانێ دا نەماینە، چونکی کێشا وانا ل سەر بنەمایێ چەوانیا ھەلبژارتنا سەرۆکی بوویە دناڤ خەلکی دا، نوکە گۆڕان یا رازیە ل ھەمبەری وێ چەندێ لەورا دبیت د لنێزیک پارتی و گۆڕان چارەسەریا ھەموو کێشان ب تەمامی بکەن.
دڤی بیاڤی دا سەلاح دەلۆ ئەندامێ مەکتەبا سیاسی یا پارتی دیموکراتی کوردستان راگەھاند، پارتی و گۆڕان کەھشتینە وێ باوەریێ دڤێ قوناغێ دا ناکوکیێن سیاسی دەرباز بکەن و دانوستاندن دناڤبەرا وانا بەردەوامبن، وەزیرێن گۆڕانێ ژی دێ ڤەگەرن سەر کارێن خوە.
ئەندامێ مەکتەبا سیاسی ھەروەسا گۆت: پارتی و گۆڕان دڤێت قوناغا نەخوشیان دەرباز بکەن، بۆ ڤێ مەرەمێ ژی ھەر دوو ئالی دێ درێژەپێدانێ ب دانوستاندنێ و وێ رێککەفتنێ ل سەر پێکئینانا حوکمەتێ بنکە فرەوان ھاتیە کرن بەردەوامبن، یان ژی دێ ھیتە نووکرن یان ژی چارچۆڤەکێ نوو دێ بۆ ھێتە دیتن، ھەموو وەزیرێن گۆڕانێ ژی دێ ڤەگەرن سەر کارێن خوە ھەڤدەم ئاخفتن ل گەل فڕاکسیۆنا گۆڕانێ ژی دھێنە کرن، کو پشکداری د روونشتنا پەرلەمانێ کوردستانێ دا بکەن.
سەلاح دەلۆی ھەروەسا خوەیاکر، ل نێزیک پارتی و گۆڕان دێ چەندین کومبوونێن دیتر پێکڤە ئەنجامدەن، کومبوون دێ ل سەر موکم کرنا بنەمایێن پەیوەندیێن ھەردو ئالیان بۆ پرسا حوکمەتێ و گۆڕان پشتی شیرتێن ناڤخوەیا خوەدا بکەت و بەرسڤا پارتی بەدەتن، چونکە ئەو ژی دڤێت پشکداری د کابینا حوکمەتێ دا بکەن.
رۆژا ئێکەشەمبی یا بۆری رێککەفتی 8/10/ 2017 ، نێچیرڤان بارزانی جێگرێ سەرۆکێ پارتی دیموکراتی کوردستان و ماموستا سەلاحەدین بەھائەددین ئەمیندارێ گشتیێ ئێکگرتوو ئیسلامی کوردستان، ل مەکۆیا سەرەکی یا گۆڕان ل پارێزگەھا سلێمانیێ ل گرێ زەرتەک، ل گەل رێکخەرێ گشتیێ بزاڤا گۆڕان عومەر سەید عەلی کومبوون، و بەحسێ چارەکرنا ئاریشێن دناڤبەرا پارتی و گورانێ ھاتنە کرن.
