كه‌ناله‌كێ ئه‌مريكى:ژيانا مه‌سيحيێن ده‌شتا نه‌ينه‌وا دمه‌ترسيێ دايه
ئه‌ڤرۆنيۆز:
كه‌نالێ “فوكس نيۆز” يێ ئه‌مريكى دبێژيت، ژيانا مه‌سيحيان پشتى كونترۆلكرنا ده‌ڤه‌رێن وان ژلايێ ميليشيێن حه‌شدا شه‌عبى، گه‌له‌ك يا خراب بووى ومه‌ترسيا هاتنا داعشێ ژى دكه‌ن، دياركر ژى، بێ هه‌بوونا پاراستنا نێڤده‌وله‌تى، نه‌شێن ل ده‌ڤه‌رێن خوه بمينن.
په‌يامنێرێ كه‌نالێ “فوكس نيۆز” يێ ئه‌مريكى، ب مه‌ره‌ما كاره‌كێ رۆژنامه‌ڤانى يێ مه‌يدانى، سه‌ره‌دانا گوندێ به‌حزانێ يێ مه‌سيحيان ل ده‌شتا نه‌ينه‌وا كريه ودراپۆرته‌كێ دا به‌حسێ خرابيا بارێ ژيانا ئاكنجيێن وێ ده‌ڤه‌رێ دكه‌ت كو چو پرۆژێن خزمه‌تگوزارى لێ نين وقه‌شه‌يێ كه‌نيسه‌كێ ژى ب ناڤێ “بابێ ئه‌فرام” ب كه‌نالێ ناڤبرى دبێژيت “ژيانا مه‌سيحيان ل عيراقێ گه‌له‌ك يا خرابه”.
هه‌روه‌سا دبێژيت” هوون دشێن ببينن چاوان گوندێ مه يێ هاتيه پشت گوه خستن، ده‌ڤه‌ر گه‌له‌ك يا پيسه ومه ئاڤ وكاره‌با ژى نينن، هه‌تا ماركته‌ك ژى ل ڤێرێ نينه، ئه‌ز نزانم چاوان خه‌لكێ مه ب ڤى شێوه‌ى دشێن بژين؟ دبيت بۆ ده‌مێ چه‌ند هه‌يڤان بمينن، به‌لێ پاشى هه‌موو دێ بزاڤێ كه‌ن ببنه په‌نابه‌ر وده‌ڤه‌رێ بجه بهێلن”.
بابێ ئه‌فرامى، دياركر كو پێدڤى بوو حوكمه‌تا عيراقێ ڤيابا مه‌سيحى ل ده‌ڤه‌را خوه بمينن، به‌لێ چو ناكه‌ت.
په‌يامنێرێ “فوكس نيۆز” به‌حس ل وێ چه‌ندێ دكه‌ت، كو پێشتر پێشمه‌رگه ئه‌و ده‌ڤه‌ر دپاراستن، به‌لێ پاشى ده‌ڤه‌رێن وان ژلايێ حوكمه‌تا عيراقێ ڤه هاتن كونترۆلكرن، له‌وما نوكه خه‌لك گه‌له‌ك دترسن.
هه‌روه‌سا ئاشكراكر ژى كو خالێن پشكنينێ يێن نوو يێن هه‌ين ودترسن ل
هه‌ر ده‌مه‌كى تشته‌كێ نوو روو بده‌ت وداعش ژى ب دووماهى نه‌هاتيه، قه‌شه بابێ ئه‌فرام دبێژيت”دبيت دوباره مه به‌ر ب تاريێ ببه‌ن”.
