ل دۆر كوردستانێ ئيران ڤێ داخوازيێ ژ عيراقێ دكه‌ت
ئه‌ڤرۆنيۆز:
ئيرانێ شانده‌كێ ئه‌منى وحكومى هنارتيه عيراقێ بۆ داخوازكرنا دوباره ڤه‌كرنا ده‌رگه‌هێ په‌روێز خان ل گه‌ل هه‌رێما كوردستانێ.
فه‌رهاد ته‌جرى، نوونه‌رێ باژێرێ “قه‌سر شيرين” يێ ئيرانى ل په‌رله‌مانێ ئيرانێ، ل دووڤ شه‌فه‌ق نيۆز، راگه‌هانديه كو شانده‌ك ژ به‌رپرسێن له‌شكرى وئه‌منى يێن ئيرانى هه‌ر ژرۆژا ئه‌ينيا بۆرى ده‌ست ب دانوستاندان ل گه‌ل به‌رپرسێن عيراقى يێن په‌يوه‌نديدار كريه ب مه‌ره‌ما ڤه‌كرنا ده‌رگه‌هێ په‌روێز خان يێ سنورى.
پشتى هه‌رێما كوردستانێ پرۆسا ريفراندۆما سه‌ربخوه‌يێ ل 25 ئه‌يلوولا بۆرى ئه‌نجامداى، ئيرانێ، ل دووڤ داخوازا عيراقێ، ده‌رگه‌هێن سنورى ل گه‌ل هه‌رێما كوردستانێ داخستبوون.
ته‌جرى گۆت ژى” په‌روێز خان مه‌زنترين خالا سنورى يه بۆ هنارتنا كه‌ره‌ستان ژئيرانێ بۆ عيراقێ وبه‌هانا حوكمه‌تا عيراقێ ئه‌وه كو هه‌ردو ده‌رگه‌هێن سنورى “خسروى وپه‌روێز خان” تنێ 50 كيلۆمه‌تر دناڤبه‌را وان دانه. به‌لێ ئه‌ڤه نه بهانه‌يه وپێدڤيه ئيران سه‌حكه‌ته به‌رژه‌وه‌نديێن خوه ونه‌بيته لايه‌ن دهه‌ڤركيێن ناڤخوه‌يى دا دناڤبه‌را به‌غدا وهه‌رێما كوردستانێ”.
دياركر ژى” به‌رده‌واميا داخستنا ده‌رگه‌هێ په‌روێز خان وراوه‌ستانا كارى، دێ زيانێ گه‌هينيته پێنج هزار كه‌سان وب ده‌هان كرێكار يێن بێ كار بووين”.
ئاماژه دا” به‌رده‌واميا هه‌لويستێ ئيرانێ، ل گه‌ل هه‌بوونا هه‌ڤركان ل بازارێ كوردستانێ، دبه‌رژه‌وه‌نديا وێ دا نينه”.
