خودانێن دو موەلیدان ھاتنە سزادان
ئه‌ڤرۆ نيوز:
ژ بەر سەرپێچیان و پێگری نەکرن ب رێنمایێن لیژنا موەلیدان ل دەڤەرا ئامێدیێ، رێڤبەریا ناحیا دێرەلۆکێ د ھەیڤا بۆری دا خودانێن دو موەلیدان ل ناحیا دێرەلۆکێ ب کۆژمێ سێ ملیۆن دیناران سزادان.
سامی ئوشانە، رێڤەبەرێ ناحیا دێرەلۆکێ بۆ ئەڤرۆ دیا کر کو ئەو بەردەوام دووڤچوون و لێگەریانێ ل سەر موەلیدێن دەڤەرێ دکەن، دیسا گازندێن خەلکی یێن ب رێیێن جودا دگەھنە وانا ب گرنگی وەردگرن و دووڤچوونێ ل سەر گازندان دکەن و گۆت: “د ھەیڤا چوویی دا ژ بەر نەبەردانا کارەبێ ژ ئەگەرێ خراب بوونا موەلیدەی و چێ نەکرنا وانا بۆ پتر ژ سێ رۆژان، ئەوان خودانێن دو موەلیدان ل سەنتەرێ ناحیێ ھەر ئێک ب کۆژمەکێ پارەی سزادایە”.
ناڤبری خویا ژی کر، نوکە بۆ ھەر موەلیدەکی ژبلی کو لژنا موەلیدان سەرپەرشتیێ ل سەر دکەت، کارمەندەکێ مە ژی ل نێزیک چاڤدێریێ ل سەر دکەت و ھەر دەمەکێ سەرپیچیەک ھاتەکرن و چەند جاران دووبارە بوو بێ چ ئەگەر، وی دەمی خودانێ وی موەلیدەی دێ ھێتە سزادان.
دەربارەی خراب بوونا موەلیدان ژی ناڤبری گۆت: “ھەکە موەلیدەک خراب بوو و بۆ ماوێ پتر ژ سێ رۆژان نەھاتە چێکرن، وی دەمی خودانێ وی موەلیدەی ب کۆۆژمەکێ پارەی ل دووڤ رێژا بەردانا کارەبێ یا وێ ھەیڤێ دێ ھێتە سزادان”.
سامی ئوشانە گۆتژی: “ل ھەیڤا بۆری دو موەلیدان بۆ ماوێ ھەشت رۆژان کار نەکریە، ژ بەر وێ یەکێ بۆ ھەر ئەمپێرەکی دو ھزار و 750 دینار ژ بەر ھاتینە بڕین و مە بۆ وەلاتیێن وان تاخێن ئەو موەلیدە لێ ڤەگەڕاندن”.
