بریارە ڤێ حەفتیێ سەرۆک کۆمارێ تورکیا ل گەل سەرۆکێ گشتی یێ پارتا کۆماری کۆمبیت و بەحسێ ئامادەکاریان بۆ دستوورەکێ نوو بهێتە کرن، هەروەسا سەرۆکێ پەرلەمانێ تورکیا ژی دێ ل دۆر هەمان بابەتی ل گەل فراکسیۆنێن ناڤ پەرلەمانێ تورکیا کۆمبیت.
دەزگەهێن راگەهاندنا تورکیا دیار دکەن، ڤێ حەفتیێ سەرۆک کۆمارێ تورکیا رەجەب تەیب ئەردۆغان دێ ل گەل ئۆزگور ئۆزەل سەرۆکێ گشتی یێ پارتا کۆماری کۆمبیت، د کۆمبوونێ دا دێ بەحسێ دستوورەکێ نوو بۆ تورکیا هێتە کرن و هاتە زانین سەرۆکێ پارتا کۆماری راپۆرتەک کو ژ ٨ ماددەیان پێک دهێت بەرهەڤ کریە و دێ رادەستی سەرۆک کۆمارێ تورکیا کەت.
مالپەرێ T24 د راپۆرتەکێ دا ئاماژە ب ڤێ یەکێ کریە، سەرۆکێ پارتا کۆماری دێ داخواز ژ سەرۆک کۆمارێ تورکیا کەت، رەوشا ژیانا فەرمانبەران ب تایبەتی ژی مامۆستایان باش بکەت، چونکی ژ بەر قەیرانا ئابووری مووچێ مامۆستایان ل تورکیا تێرا ژیانا وان ناکەت و ئەو یەک کاریگەریا خوە ل هەموو تەخێن دی یێن جڤاکێ تورکیا ژی دکەت.
ل ئالیێ دی بەرپرسەکێ پارتا کۆماری یا تورکیا ژی دیار کر، ئەو وەکو پارتا کۆماری پشتەڤانیێ ل ئامادەکرنا دستوورەکێ نوو بۆ تورکیا دکەن، لێ نابیت ئەو دستوور ل گۆر حەزا ئاکپارتیێ یان ژی هندەک هێزێن دی بیت، بەلکو دڤێت دستوورێ نوو یێ تورکیا ببیتە ژێدەرێ چارەسەریا هەموو پرسێن تورکیا، ژ بەر ڤێ یەکێ ژی وەکو پارتا کۆماری وان دیتنێن خوە یێن جودا ل دۆر چاوانیا ئامادەکرنا دستوورەکێ نوو بۆ تورکیا هەنە و دێ ل کۆمبوونێن داهاتی دا وان بۆ ئەردۆغانی و سەرۆکێ پەرلەمانی ئاشکرا کەن.
چاڤدێرێن سیاسی ژی دیار دکەن، پشتی شکەستنەکا ئاکپارتیێ د هەلبژارتنێن باژێرڤانیان دا نها پتر ژ هەر دەمەکێ پێدڤیا ئاکپارتیێ ب کوردان هەیە، چونکی پارتا کۆماری وەکو پارتا هەری مەزن یا ئۆپۆزسیۆنێ هندەک ئارمانجێن جودا هەنە و دڤێت بهێتە سەر دەستهەلاتێ، لێ بابەتێ کوردان گەلەک جودایە، هەکە کورد بشێن سیاسەتەکا باش برێڤە ببەن و پشتەڤانیێ ل هندەک داخوازیێن ئەردۆغانی بکەن، ئەردۆغان و ئاکپارتی ژی دشێن ژ بۆ چارەسەرکرنا پرسا کوردی دەست ب قۆناغەکا نوو بکەن، چونکی هەتا نها ژی پارتا کۆماری سەبارەت ب چارەسەرکرنا پرسا کوردی چو پرۆژەیێن خوە نینن، بەلکو پارتا کۆماری کار بۆ هندێ دکەت بهێتە سەر دەستهەلاتێ.
ل گۆر باوەریا چاڤدێرێن سیاسی هەکە پارتا کۆماری بهێتە سەر دەستهەلاتێ دبیت سیاسەتا وان ل هەمبەر کوردان گەلەک ژ یا ئاکپارتیێ خرابتر ژی بیت، چونکی بەری نها ئاکپارتیێ ژ بۆ چارەسەرکرنا پرسا کوردی هندەک کار کرینە لێ پارتا کۆماری ل دژی پرۆژەیێن ئاکپارتیێ بوویە، هەتا نها ژی پارتا کۆماری ل دژی پەروەردا ب زمانێ کوردی یە.
نيشاندان