د داخویانیەكێ‌ دا سەرۆكێ‌ لژنەیا دادڤانێن یاریا باسكێت بۆلێ‌ ل پارێزگەها دهۆكێ‌ دیار كر ژ سەرجەمێ‌ پێنج دادڤانێن پارێزگەهێ‌ هەتا نوكە دو دادڤان گەهشتینە قۆناغا دویێ‌ یا ب دەستڤە ئینانا باوەرنامەیا نێڤدەولەتی، ئەو ژلایێ‌ فیدراسیۆنا باسكێت بۆلا ئیراقێ‌ و سەرپەرشتییا یا جیهانی بۆ 43 دادڤانێن ئیراقێ‌ و كوردستانێ‌ ب شێوەكێ‌ قۆناغ هاتیە رێكخستن.
زێدەتر سەمیر محەمەد عەلی بۆ رۆژنامەیا ئەڤرۆ گۆت: هەر ئێك ژ د. عەلی محەمەد ئەحمەد ژ باژێرێ‌ زاخۆ و كچا دادڤانا باژێرێ‌ دهۆكێ‌ رۆژان عەبدولحەكیم دەربازبووینە قۆناغا دویێ‌ یا تاقیكرنێن فیدراسیۆنا جیهانی بۆ یارییا باسكێت بۆلێ‌ پشتی ب سەركەفتیانە شیاین د تاقیكرنێن ئۆنلاین و شێوازێ‌ زمانێ‌ ئنگلێزیێ‌ دەربازبكەن كو سەرجەمێ‌ پێنج دادڤانێن پارێزگەهێ‌ بوون، شێوازێ‌ تاقیكرنان بۆ سێ‌ قۆناغان هاتیە دانان، قۆناغا دویێ‌ دێ‌ ل پایتەختێ‌ ئیراقێ‌ بەغدا ب شێوەیی تیۆری و پراكتیكی هێتە كرن و قۆناغا سێیێ‌ و دووماهیێ‌ ل هەمان باژێر دێ‌ تاقیكرنێن مەزنتر هەبن كو ژلایێ‌ فیدراسیۆنا باسكێت بۆلا جیهانی ڤە سەرپەرشتی بۆ دهێتە كرن.
ژلایەكێ‌ دیڤە ناڤهاتی گۆت: مەرجێن ئەڤ سالە بۆ وەرگرتنا باوەرنامەیا نێڤدەولەتی یا دادڤانیێ‌ بۆ سەر مێزێ‌ و ناڤ یاریگەهێ‌ گەلەك ب زەحمەت كەڤتینە لێ‌ من باوەری ب شیانێن هەردو دادڤانێن پارێزگەهێ‌ هەنە، هەروەسان رۆژان عەبدولحەكیم وەكو ئێكەم كچا پارێزگەهێ‌ یە هاتیە دناڤ دادڤانیا جیهانی دا و گەشبینم دگەل د. عەلی محەمەد دێ‌ شێن سەركەفتنان د تاقیكرنێن خوە دا ئینن و ببنە دادڤانێن نێڤدەولەتی وەكو دو نوونەرێن دی یێن پارێزگەهێ‌ و دیار كر د نوكە دا پرۆسێسا بەرهەمئینانا دادڤانیێ‌ ل پارێزگەهێ‌ ل دیڤ پلانان بەر ب باشتر دچیت.
بۆ زانین تاقیكرنا دادڤانێن ئیراقێ‌ و هەرێما كوردستانێ‌ ئەوێن ل سەر مێزێ‌ وەكو هاریكارێن دادڤانێن نیڤا یاریگەهێ‌ ب سەرپەرشتییا سەرۆكێ‌ فیدراسیۆنا باسكێت بۆلا ئیراقێ‌ حسێن ئەلعمێدی و جێگرێ‌ وی خالد نەجم و دادڤانێ‌ نێڤدەولەتی و وانەبێژ ئەحمەد عەلی ل باژێرێ‌ بەغدا هاتبوو ئەنجامدان.

قەیس وەیس:

د داخویانیەكێ‌ دا هەڤال عەبدولعەزیز سەرۆكێ‌ فیدراسیۆنا بادمینتۆنا ئیراقێ‌ بۆ رۆژنامەیا ئەڤرۆ دیار كر رێژەیا یاریزانێن كورد دناڤ ڤاڤارتنێن گشتی یێن پلەكرنێ‌ دا گەلەك یا كێمە و ئەڤە ژی یا باش نینە.
زێدەتر ناڤهاتی گۆت: هەرچەندە مە یاریزانێن هەین لێ‌ بۆ وەرزێ‌ نوو رێژەیا یاریزان یاكێمە ئەوا بۆ وەرزێ‌ نوو ل دیڤ سیستەمێ‌ و پلانا وەرزێ‌ ئەڤ سالە مە سێ‌ قۆناغ بۆ ڤاڤارتنا یاریزانان داینە ئەوێن پلەكرن ل سەر ئاستێ‌ یاریێ‌ نەبن ئانكو ژ نوو دهێنە دناڤ هەڤڕكییان دا، د قۆناغا ئێكێ‌ دا ل شۆباتا بۆری هاتبوو كرن و قۆناغا دویێ‌ دوهی ب دووماهی هات و بڕیارە قۆناغا سێیێ‌ ل تەباخا ئەڤ سالە ل هەولێرا پیتەخت بهێتە كرن كو هەر قۆناغەكێ‌ چەند یاریزان دهێنە ژێگرتن بۆ پلەكرنا وان و بەرهەڤكرنا وان، ئەڤچەندە ژبەر وێ‌ یەكێ‌ كو یاریزان ل سەر پێشئێخستنا ئاستێ‌ خوە بەردەوام بیت و بلندكرنا شیانێن خوە بكەت.
ژلایەكێ‌ دیڤە ناڤهاتی گۆت ژ هەرێما كوردستانێ‌ ب تنێ‌ ل هەولێرێ‌ هەتا نوكە ئێك یاریزان بوویە خودان پلەكرن و ل كەركووكێ‌ دو یاریزان بووینە ئەوژی ل سەر ئاستێ‌ كچان بووینە و گۆت: مخابن ژ پارێزگەها دهۆكێ‌ چو یاریزان نە كوڕ و نە كچ نە شیاینە بگەهنە قۆناغا پلەكرنێ‌ ئەڤە ژی جهێ‌ پرسیارێ‌ یە و دڤێت زێدەتر كار ل سەر بهێتە كرن تایبەت یانەیێن وەرزشی پشتەڤانییا ڤێ‌ وەرزێ‌ بكەن، هەكە بتنێ‌ دووڤچوونێ‌ بكەن دێ‌ یاریزانێن باش هەبن ئەوێن ل پەیمانگەه و كۆلیژەیێن وەرزشی وەكو قوتابی نە، لەوما هیڤییا مە ئەوە ئەڤ وەرزشە ب گرنگی بهێتە وەرگرتن و حەز و ڤیانا كوڕ و كچێن وەرزشڤان یێن پاێزگەهێ‌ ئاسانكارییان بۆ بكەن.

رەمەزان زەكەریا

د دیدارەكێ‌ دا راهێنەرێ یانەیا ئاكرێ یا وەرزشی ئاشكراكر ب پشتی راستیڤە دەمێ هاتیمە دەستنیشانكرن وەك راهێنەرێ سەرەكێ یێ‌ یانەیا ئاكرێ من ب ئیدارەیا یانەیێ راگەهاند كو حەزێن وان چەندن بۆ خولا نایابا كوردستانێ حەزێن من زێدەترن، ئەگەر راهێنەری ڤیان نەبیت نەشێت سەركەفتنێ ب دەستڤە بینیت، رەنگە بۆ كارگێریا یانەیێ جهێ سەرسۆرمانێ بیت ژبەركو دەمێ من یانە وەرگرتی یانەیێ ژ ئەنجامێ سێ یاریا ئێك خال ب دەستڤە ئینابوو دو خوسارەتیبوون و ئێك وەكهەڤی ژ سەرجەمێ نەهـ خالا ئێك خال هەبوو، دەمێ من تیم وەرگرتی رەوشا وێ گەلەك یا خراب بوو بیت هەموو راهێنەرەكێ نەشیابا ئەركێ راهێنەرایەتیا وێ وەرگریت،پشتی بوویمە راهێنەر ئەم شیاین شەش سەركەفتنا ل سەر ئێك تۆمار بكەین ل رێزا 12 پێشڤە بهێتە رێزا ئێكێ، قۆناغا ئێكێ دووماهیك ژی هات یانەیا ئاكرێ‌ سەرێ‌ لیستێ‌ هات.
هەروەسان هەژار سابر گۆت: پشتی دەستپێكرنا قۆناغا دویێ ئەنجام وەك پێدڤی نەبوون ژبەر چەند هۆكارەكا تێكنەگەهشتن هەبوو هەتا گەهشتە وی رادەی من بریارا دەستكاركێشانێ پێشكەشی یانەیێ كر پشتی ئەو ئاریشە هاتیە چارەكرن دەستەیا كارگێری گەلەك هاریكاربوون گەل من هات پشتی یاریا گەل یانەیا هەولێر هەتا یاریا كۆپا كوردستانێ بەرامبەر یانەیا زاخۆ چ خوسارەتی نەبوون، ئەگەر یانەیێ چەند ئاریشە كێم بوون دێ ئەنجام باشتر بن دەستەیا كارگێری گەلەك هاریكاربوون بۆ هەموو كارەكێ پێدڤی بۆ یانەیێ .
ژلایەكێ‌ دیڤە ناڤهاتی گۆت : ئەگەر راهێنەری باوەری ب خوە نەبیت نەشێت ئەركێ راهێنەرایەتیا چ تیمەكێ وەربگریت ب باوەریەكا مەزن ڤە من ئەركێ راهێنەرایەتیا یانەیا ئاكرێ وەرگرت، ئەگەر راهێنەری باوەری ب شیانێن خوە نەبیت نەشێت یاریزانەكێ دروست بكەت، هەتا نوكە ل دەڤەرا ئاكرێ راهێنەرەكێ پرۆفیشنال تێدا نەبیت بشێت یانەیا خوە ب رێڤە بەت.
ناڤبری گۆتژی: بۆمن دەستكەفتەكێ مەزنە كو شیام ناسناڤێ خولا نایابا كوردستانێ بۆ جارا ئێكێ دیرۆكێ دا ب دەستڤە بینم ژبلی بۆ من دەستكەفتە بۆ یانەیا ئاكرێ و دەڤەرێ ژی دەستكەفتەكێ مەزنە، هەتا نوكە ئەڤ ناسناڤە ب تنێ ل یانەیێن پارێزگەها دا بوو مەشیا ل پارێزگەها ڤەگوهێزین بۆ دەڤەرداریا، بۆ ئێكەم سالا منە وەك راهێنەر شیام خولا نایابا كوردستانێ ب دەستڤە بینین و بگەهینە یاریا دووماهیا كۆپا كوردستانێ، بۆمن هەر دو رۆژێن 15 -20 نیسانێ دیرۆكینە و نەشێم ب درێژاهیا كاروانێ خوەیێ وەرزشی و ژیانێ ژ بیر بكەم.
راهێنەرێ‌ ئاكرێ‌ ئاشكەرا كر ژی: هەتا نوكە ب فەرمی چو یانەیا داخواز ل من نەكریە بۆ وێ چەندێ ئەركێ راهێنەرایەتیا تیما وان وەرگرم لێ ب رەنگەكێ نەراستەوخۆ گەلەك داخوازی هەبووینە و گەلەكا خواستیە كو ئەركێ راهێنەرایەتیا وان وەرگرم، یانەیا چوارقورنە دگۆت دخوازن ببیە راهێنەرێ یانەیا مە، دەم یێ مای تیم داخوازا راهێنەری بكەن پتریا جاران دو هەیڤا بەریا خولا نایابا كوردستانێ یانە راهینەرا دەستنیشان دكەن.
ناڤهاتی گۆت ژی: ئەگەر پشتەڤانیا گەنجا بهێتە كرن ل هەموو بوارەكێ گەنج دشێن دەستكەفت و ئەنجامێن باش ب دەستڤە بینن نەبتنێ ل بوارێ وەرزشی ل بوارێ سیاسی و رۆژنامەڤانی و هەموو سێكتەرێن دی ژی ژیانێ گەنج دشێن گۆهرینا بكەن و ئەنجام و دەستكەفتا ب دەستڤە بینن، تایبەت كارێ وەرزشی گەنجا شیانێن باش هەنە ئەگەر دەلیڤە پێ بهێتە دان دێ شێن دەستكەفتێن باش ب دەستڤە ئینن .
هەژار ئەوچەندە ژی دیاركر و گۆت: یاریا چار گوشا زێرین بەرامبەر یانەیا زاخۆ یاریەكا گەلەك ب هێز بوو تژی تەكنیكی بوو، بەلگە بۆ ڤێ چەندێ گەلەك گول تێدا هاتنە كرن ل یاریا بەرایا دوماهیێ پێنج گول هاتنە كرن ئەڤە تشتەكێ كێم نەبوو یاریەكا گەلەكا ب تام بوو جوداهی ناڤبەرا یانەیا ئاكرێ و زاخۆ ژی دا نینە هەر دو یانەیێن بەهدینانە، بۆ یاریا دووماهیێ ژی یانەیا ئاكرێ بەرهەڤیێن باش كرینە .
ل دووماهیێ راهێنەر هەژار سابری گۆت: هەتا نوكە ب رەنگەكێ فەرمی ژلایێ ئێكەتیا توپا پێ نەهاتیمە ئاگەهداركرن، لێ نەراستەوخۆ دەنگویەك هەبوویە ل ناڤ ئێكەتیا تەپا پێی كۆ ئاگەهدار كربم ببمە هاریكارێ راهێنەری لێ هەتا نوكە چو تشتێ فەرمی نینە پێدڤیە راهێنەرێ دهێتە هەلبژارتن هاریكاری دەستنیشان بكەت كا ئەوێ دبیتە هاریكارێ وی چەند دگەل وی گونجیت، ئەوێ دبیتە هاریكارێ راهێنەری پێدڤیە ئەزموونا راهێنەرەكێ هەبیت.

ستێرێ‌ ئەلمانی و یانەیا بایرین میۆنخ تۆماس مۆلەر كەیفخوەشیا خوە دیاركر پشتی شەش سالێن چاڤەڕێ‌ بوون ب دیدارا ریال مەدرید شاد بوویە، ئەڤچەندە هات پشتی هەردو یانە د قۆناغا چارێك دووماهیێ‌ دا دەربازبووینە پێش دووماهییا قارەمانییا چامپیۆنز لیگ ئەوا بڕیارا یارییا ئێكێ‌ ل30ێ‌ ڤێ‌ مەهێ‌ ل ئالیانز ئارینا ل میۆنخ بهێتە ئەنجامدان و یارییا دویێ‌ ل هەشتێ‌ ئەیارا بهێت ل سانتیاگۆ بیرنابیۆ بهێتە كرن.
د پرێسكۆنفرانسەكێ‌ رۆژنامەڤانی دا مۆلەر گۆت: زەلامێن ئەلمانی شیان هەردو یانەیان بگەهینە قۆناغا پێش دووماهیێ‌ جواشوا كیمیچ بۆ بایرنێ‌ و رۆدێگر بۆ ریالێ‌، گەلەك كەیفخوەش بوویمە پشتی چاڤەڕێ‌ بوونا شەش سالان دۆبارە دێ‌ یاریێ‌ بەرانبەر ریالێ‌ كەین كو گرنگترین یاریە ل سەر ئاستێ‌ جیهانێ‌، بەرهەڤین بۆ ڤێ‌ یاریێ‌ و بەر ب ناسناڤێ‌ چامپیۆنزێ‌ بچین.

حوكمەتا فرەنسا دەست ب چەندین پێنگاڤێن پێشوەخت یێن بۆ پاراستنا ئەمنی یا وەلاتێ‌ خوە بەری دەستپێكرنا ئۆلمپیادا فرەنسا 2024، ئەوا بڕیارە هەڤڕكیین وێ‌ ل 26ێ‌ تیرمەهێ‌ هەتا 11ێ‌ تەباخا بهێت مێڤاندارییا وێ‌ بكەت كو دهێتە هژمارتن مەزنترین قارەمانییا هەمی یاریێن وەرزشی ل سەر ئاستێ‌ جیهانێ‌.
پێنگاڤا ئێكێ‌ یا دەستهەلاتێن فرەنسا پێرابوونێن توند بەرانبەر سەدەهان كەسانێن مشەختبوویی یێن هاتینە دناڤ پایتەختێ‌ فرەنسا دا ب ترمبێلێن پاسا هەمی بۆ دەڤەرێن دی یێن وەلاتێ‌ خوە هنارتن وەكو پێنگاڤا پێشوەخت ژبۆ پاراستنا ئێمناهییا باژێرێ‌ پاریسێ‌ و بڕێڤەچوونا سەركەفتیانە یا ئۆلمپیادا، ل دیڤ رۆژنامەیا لیكیپ یا فرەنسی 450 مشەختبوویێن هاتینە پاریس ب خۆرتی هاتنە دوورئێخستن ژ پایتەختێ‌ فرەنسا ئەڤچەندە نەرازیبوون دناڤا رێكخراوێن مروڤایەتی پەیداكرییە و دەستهلاتێن فرەنسا پێنگاڤا خوە ب خوە پاراستنا پێشوەخت بەرانبەر هەر گەفەكا تیرورستی هژمارتیە.