دكتۆر پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ ل گەل ریهسپی و كەسایەتیێن ئێزدیان كۆمبوو.
ل دووڤ بەرنامەكێ دارێژتی بۆ دیتن و كۆمبوونان ل گەل هەمی تەخ و ئایین و نەتەوێن جڤاكی دكتۆر پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ دوهی رۆژا ئێكشەمبی 10/12/2023 ل بنگەهێ لالش یێ رەوشەنبیری و جڤاكی ل گەل ریهسپی و كەسایەتیێن ئێزدیان كۆمبوو.
د كۆمبوونێ دا بەرپرسێ مەكتەبا رێكخستنا پارتی ل پارێزگەها دهۆكێ‌ بەحسێ وان ئێش و ئازاران كر، ئەوێن ل دەمێ چوویی ب سەرێ‌ ئێزدیان هاتین و گۆت: “نوكە ژی 300 هزار ئاوارەیێن ئێزدی د ناڤ كەمپان دا دژین، هەروەسا بەحسێ وێ پێكڤەژیانێ كر، ئەوا ل كوردستانێ هەی و نوونەرێن هەموو ئاینان ل وەزارەتا ئەوقاف و كاروبارێن ئاینی هەنە”.
پاشی دەرگەهێ دانوستاندنێ هاتە ڤەكرن و بەرهەڤبوویان تێبینی و بۆچوون و داخوازی و پێشنیار بەحسكرن و ب سینگەكێ بەرفرەه ژ لایێ‌ بەرپرسێ مەكتەبا رێكخستنا پارتی ل پارێزگەها دهۆكێ‌ ڤە هاتنە وەرگرتن و بەرسڤ ل سەر هاتەدان و گۆت: “ئەوا د شیان دا بیت دێ هێتە كرن”.

سەرۆكێ دەستەیا وەبەرهێنانێ ل هەرێما كوردستانێ دیار كر، نوكە سێ هزار و 500 كۆمپانیێن بیانی ل هەرێما كوردستانێ كار دكەن، ئارامی و رەوشا سیاسیا هەرێما كوردستانێ ئەگەرە بۆ راكێشانا وەبەرهێنەرێن بیانی بۆ كوردستانێ و دبێژیت: ئەم بەردەوام كار دكەین، ژ پێخەمەت پتر وەبەرهێنەر و كۆمپانیێن بیانی بهێنە كوردستانێ و كارێ وەبەرهێنانێ بكەن.
د. محەمەد شوكری، زێدەتر بۆ رۆژناما ئەڤرۆ گۆت: “ئارامی و رەوشا سیاسی و ئەمنی، هەروەسا فڕە كلتووری و دیموكراسی، ئالتەرناتیڤێن كاریگەرن بۆ راكێشانا وەبەرهێنەرێن بیانی بۆ هەرێما كوردستانێ، هەروەسا نوكە سێ هزار و 500 كۆمپانییێن جیهانی ل هەرێما كوردستانێ، د بیاڤێن خواندنێ، خوارنێ، ڤەگوهاستن، چاڤدێریا ساخلەمیێ، كەرتێ پیشەسازی و كەرتێ نەفت و غازێ دا كار دكەن”.
ناڤهاتی گۆتژی: “بزاڤێن حوكمەتا هەرێما كوردستانێ ب ئاراستەیا ئەنجامدانا پڕۆژەیێن ژێرخانا ئابووری د سەرەكی و بنەرەتینە، د ناڤا وان دا وزە، ب تایبەتی وزەیا بەردەوام و نووبوو‌ن، بەنداڤ، هێلا شەمەندەفڕێ، باشتركرنا خزمەتگوزاریێن گشتی، رێك و پرێن بلەز و تەكنەلۆژیا، هەروەسا هەرێما كوردستانێ ب سامانێن سروشتی یێن ل بن ئەرد و سەر ئەرد یا زەنگینە، ڤێ چەندێ وەكریە، كو چەندین كارگەهێن پیشەسازی یێن مەزن ژی ل كوردستانێ بهێنە دانان و پتر دەلیڤەیێن كاركرنێ ژی پەیدا ببن”.

دهۆك، لەزگین جوقی:

بەرپرسەكێ‌ پارتی ل نەینەوا دیار كر، دەنگێن پارتی بۆ هەلبژارتنێن جڤاتا پارێزگەهێن ئیراقێ‌ ل نەینەوا دێ‌ گەلەك زێدە بن و رەنگە ژ سەرجەمێ‌26 كورسیێن جڤاتا پارێزگەها نەینەوا پارتی نەه هەتا 10 كورسیان ب دەستڤە بینیت.
مەناف حەسەن، بەرپرسێ‌ نڤیسینگەها هەلبژارتنێن لقێ‌ 14 یێ‌ پارتی ل پارێزگەها نەینەوا راگەهاند، پشتی بارەگایێ‌ پارتی ل نەینەوا و ناوچەداریێن زوممار و وانكێ‌ هاتیە ڤەكرن، خەلكەكێ‌ زۆر قەستا بارەگایێن پارتی دكەن و پشتەڤانیا خوە بۆ لیستا 197 دیار دكەن و گۆت: “ڤەكرنا بارەگایێن پارتی ل نەینەوا و دەڤەرێن سەر ب پارێزگەها نەینەوا ڤە دێ‌ بیتە ئەگەر دەنگێن پارتی گەلەك زێدە بن، ئەم پێشبینی دكەین پارتی 9 هەتا 10 كورسیان ل جڤاتا پارێزگەها نەینەوا ب دەستڤە بینیت”.
زێدەتر گۆت: “پشتی پارتی زڤڕیە مووسلێ‌ و دەڤەرێن سەر ب پار ێزگەها نەینەوا ڤە باوەری پتر بۆ خەلكێ‌ مە چێبوویە، كو دێ‌ ئارامی و ئاشتی و پێكڤەژیان ل دەڤەرێ‌ پەیدابیت، ئەو دەڤەرا پارتی تێدا بیت خزمەتگوزاری و ئاڤەدانی و ئاشتی و پێكڤەژیان لێ‌ هەنە، لەورا هەمی خەلكێ‌ مە پشتەڤانیا لیستا پارتی دكەن و دێ‌ دەنگێن پارتی گەلەك زێدە بن”.

رێڤەبەرێ شوونوار و كەلەپوورێن پارێزگەها دهۆكێ دیار كر، ل سالا 1991ێ نێزیكی 700 پارچەیێن شوونواریێن پارێزگەها دهۆكێ بۆ بەغدا هاتینە ڤەگوهاستن و هەتا نوكە ل بەغدا ماینە و بۆ مۆزەخانا دهۆك یا نیشتمانی نەهاتینە هنارتن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهۆكێ راگەهاند، نێزیكی 700 پارچەیێن شوونواریێن مۆزەخانا دهۆك یا نیشتمانی بۆ بەغدا هاتینە ڤەگوهاستن و گۆت: “هەتا نوكە د ناڤ عمبارێن مۆزەخانا بەغدا دا هاتینە دانان، مە بزاڤ كرینە ئەو پارچەیێن شوونواری بۆ پارێزگەها دهۆكێ بهێنە زڤڕاندن، لێ‌ هەتا نوكە نەهاتینە ڤەگەڕاندن”.
ناڤهاتی خویا ژی كر، نوكە ل مۆزەخانا پارێزگەها دهۆكێ 700 هەتا 800 پارچەیێن شوونواری هەنە و د ناڤ هۆلێن مۆزەخانێ دا دهێنە نیشادان و گۆت: “پتری شەش هزار پارچەیێن شوونواری د ناڤ عمبارێن مۆزەخانا دهۆكێ دا د پاراستینە، ئەم بزاڤان دكەین مۆزەخانا پارێزگەها دهۆكێ بهێتە بەرفرەهكرن، داكو ئەو شەش هزار پارچەیێن پاراستی ژی بهێنە نیشادان”.
د. بێكەس گۆت: “مە پلانەكا مەزن بۆ پاراستنا شوونوارێن پارێزگەها دهۆكێ یا هەی، لێ‌ مە پێدڤی ب گوژمەكێ پارەی هەیە، هەتا بشێین كار ل سەر بكەین”.

وەزارەتا كارەبێ‌ یا حوكمەتا هەرێما كوردستانێ‌ ئاشكرا كر كو رەوشا كارەبا نیشتمانی بەر ب باشتربوونێ‌ دچیت و دەمژمێرێن دانا كارەبێ‌ بۆ وەلاتیان دێ‌ زێدە بن.
وەزارەتا كارەبێ‌ یا حوكمەتا هەرێما كوردستانێ‌ ئاماژە ب وێ‌ چەندێ‌ ژی كریە كو نوكە نێزیكی 300 مێگاواتێن كارەبێ‌ بۆ ناڤ تۆڕا كارەبا نیشتمانی هاتینە ڤەگەراندن، لەو دێ‌ رەوشا كارەبا نیشتمانی باش بیت و دەمژمێرێن دانا كارەبێ‌ ژی بۆ وەلاتیان دێ‌ زێدە بن.