ب بەرهەڤبوونا د. عەلی تەتەر، پارێزگارێ دهۆكێ‌ و هەژمارەكا رێڤەبەرێن دام و دەزگەهێن دەڤەرێ د رێورەسمەكی دا دەڤەردارێ نوو یێ ئاكرێ دەست ب كاربوو.
د. عەلی تەتەر، پارێزگارێ دهۆكێ‌ د رێورەسمێن دەست ب كاربوونا دەڤەردارێ‌ نوو دا و د پەیڤەكێ دا رۆلێ دەڤەردارێ بەرێ یێ ئاكرێ بلند هەلسەنگاندن و گۆت: «شەعبان خەلیل خزمەتەكا باش پێشكێشی خەلكێ دەڤەرێ كریە و سوپاسیا وی دكەین و د هەمبەر دا ژی هیڤیا سەركەفتنێ بۆ دەڤەردارێ نو یێ ئاكرێ خواست و پشتەڤانیا كارگێریا پارێزگەهێ‌ بۆ دیار كر».
د. دلاوەر هەركی، ل جهێ شەعبان خەلیل بەرواری بۆ دەڤەردارێ ئاكرێ، دەمەك بوو شەعبان خەلیل ب وەكالەت دەڤەردارێ ئاكرێ بوو.
د پەیڤەكێ دا د. دلاوەر هەركی، دەڤەردارێ نوو یێ ئاكرێ گۆت: «سوپاسیا وێ باوەریێ دكەم ئەوا ب من هاتیەدان و هیڤیا من ئەوە بشێم باشترین خزمەت پێشكێشی خەلكێ دەڤەرا ئاكرێ و ناوچەداریێن دینارتە و بجیل و گردەسێن بكەم، سوپاسیا دەڤەردارێ بەرێ شەعبان خەلیل بەرواری ژی دكەم، كو د دەمێ بۆری دا شیایە خزمەتا ڤێ دەڤەرێ بكەت».

پشتی ل چەند رۆژێن بۆری ژ ئەنجامێ بارینا رێژەكا زۆر یا بارانێ ل سەنتەرێ دەڤەرداریا ئاكرێ زیان گەهشتنە چەند مالێن وەلاتیان دوهی 28/11/2023 هاتنە قەرەبووكرن.
عەقید ئیبراهیم فەریق، رێڤەبەرێ بەرگریا شارستانی ل ئاكرێ بۆ ئەڤرۆ گۆت: «پشتی وێ بارانا بهێز ل دەڤەرا ئاكرێ باری و بوویە ئەگەرێ زیان بگەهیتە هەژمارەكا خانیێن وەلاتیان ل سەنتەرێ ئاكرێ دوهی هاتنە قەرەبووكرن».
ناڤهاتی گۆتژی: «پشتی شەعبان خەلیل بەرواری، دەڤەردارێ ئاكرێ ب وەكالەت سەردانا وان جهێن زیان گەهشتیێ‌ كری و پەیوەندی ب پارێزگارێ دهۆكێ كری بۆ هاریكاریا وان ئێكسەر پارێزگار هاتە سەر خەت و بڕیار دا ب گوژمەكێ پارەی هاریكاریا وان بێهتە كرن».
زێدەتر گۆت: «ئەو هاریكاری ل دیوانا دەڤەرداریا ئاكرێ ب بەرهەڤبوونا وەلاتیێن زیانڤێكەفتیێن لەهیێ ژ لایێ نوونەرێ پارێزگاری دهۆكێ‌ ڤە شەعبان خەلیل گوژمەكێ پارەی پێشكێشی وان وەلاتیان هاتە كرن، كو هەژمارا وان پێنج خێزان بوون».

هێمن سلێمان، پەیڤدارێ پۆلیسێن پارێزگەها دهۆكێ بۆ رۆژناما ئەڤرۆ دیار كر، دوهی سپێدێ 28/11/2023 پۆلیسێن دەڤەرداریا سێمێلێ هاتنە ئاگەهداركرن ب هەبوونا تاوانەكا كوشتنێ، دەمێ پۆلیس ل جهێ روودانێ ئامادەبووین دیاربوویە، كو قوتابیەكی بناڤێ (ع. م. ع) قوتابیێ پۆلا 11 ئامادەیی ل ئامادەیەكا سەنتەرێ دەڤەرداریا سێمێلێ هەڤالێ خوە بناڤێ (م. ف. ع) ب گولـلەیەكا دەمانجێ كوشتیە.
پەیڤدارێ پۆلیسێن پارێزگەها دهۆكێ ئاشكرا ژی كر، تاوانلێكری و تومەتبار هەردو ژ دایك بوویێن سالا (٢٠٠٧) ێ نە، وەلاتیێن تاخێ شەهیدانن ل دەڤەرداریا سێمێلێ، تومەتبار ژ لایێ پۆلیسێن سێمێلێ ڤە هاتیە گرتن و د نوكە دا ڤەكۆلین دهێتە ئەنجامدان بۆ زانینا ئەگەرێن دروست یێن ڤێ تاوانێ.

ئەندامەكا پەڕلەمانێ ئیراقێ ژ فراكسیۆنا پارتی دیموكراتی كوردستان دیار كر، ل دەستپێكا سالا 2024ێ، یاسایا بودجەیا گشتی یا ئیراقێ‌ دێ هێتە راستڤەكرن بۆ هندێ مووچەیێ فەرمانبەرێن هەرێما كوردستانێ ژ مەزاختیێن ڕاستەقینە بهێتە جوداكرن و مووچەیێ فەرمانبەرێن هەرێما كوردستانێ د دەمێ خوە دا بهێتەدان، چونكی د ئەڤ سالە دا حكومەتا ئیراقێ د دەمێ خوە دا مووچەیێ فەرمانبەرێن هەرێما كوردستانێ نەهنارتیە.
نەهلا قادر ئەفەندی، ئەنداما پەڕلەمانێ ئیراقێ ژ فراكسیۆنا پارتی دیموكراتی كوردستان زێدەتر بۆ رۆژناما ئەڤرۆ گۆت: «بزاڤێن رژد دهێنە كرن، كو ب رێیا راستڤەكرنا یاسایا گشتیی یا بودجەیا ئیراقێ، مووچەیێ فەرمانبەرێن هەرێما كوردستانێ ژ مەزاختیێن راستەقینە بهێتە جوداكرن و مووچەیێ فەرمانبەرێن هەرێمێ د دەمێ خوە دا بهێنەدان و ئێدی نەهێنە گیرۆكرن».
گۆتژی: «سالانە ئەم دشێین پشكەكا بڕگەیێن یاسایا بودجەیێ راستڤەكەین و د كۆمبوونێن بهێن یێن پەڕلەمانێ ئیراقێ دا، كو ل دەستپێكا سالا بهێت دێ بێهنڤەدانێن پەڕلەمانێ ئیراقێ دەستپێكەن، پاشی دێ كار ل سەر راستڤەكرنا چەندین بڕگەیێن یاسایا بودجەیێ دێ‌ هێتە كرن».

دهۆك، لەزگین جۆقی:

رێڤەبەریا گشتی یا وەبەرهێنانێ ل پارێزگەها دهۆكێ دیار كر، د كابینەیا نەهێ یا حوكمەتا هەرێما كوردستانێ دا ب سەرمایێ نێزیكی 700 ملیۆن دۆلاران وەبەرهێنان ل پارێزگەها دهۆكێ هاتیە كرن و 65 مۆهلەت بۆ پڕۆژەیێن وەبەرهێنانێ هاتینە دان.
فەلاح حاجی، بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆكێ دیار كر، ل دووڤ بڕیارا جەنابێ سەرۆكێ حوكمەتا هەرێما كوردستانێ مەسرور بارزانی دڤێت 75% یا دەستێ كاری بۆ وەلاتیێن ناڤخوە بیت، لەوما ژی كەرتێ وەبەرهێنانێ شیایە پتری 120 هزار دەلیڤەیێن كاری بۆ وەلاتیان پەیدا بكەت، كو 20 هزار ژ وان دەلیڤەیان راستەوخۆنە و 100 هزارێن دیتر ژی ب رەنگەكێ‌ نەراستەوخۆ هاتینە پەیداكرن.
بەرپرسێ راگەهاندنێ ل رێڤەبەریا گشتی یا وەبەرهێنانێ ل پارێزگەها دهۆكێ گۆت: «65 مۆهلەت بۆ پڕۆژەیێن وەبەرهێنانێ هاتینەدان، ژ وانا ژی د وارێ پیشەسازی و چاندن و گەشتیاری و بازڕگانی و فێركرن و ساخلەمیێ دانە».