ئه‌ڤرۆ، قه‌یس وه‌یس

دوهی چه‌ند یاریێن دی ژ گه‌ڕا هه‌شتێ‌ و قۆناغا ئێكێ‌ یا خولا ئیراقێ‌  یا ته‌پا پێی بۆ یانه‌یێن پلا نایاب هاتنه‌ ئه‌نجامدان، تیما زاخۆ ده‌ست ڤالا ژ به‌غدا ڤه‌گه‌ڕیا و هه‌ولێرێ‌ سێ‌ خال بۆ جه‌ماوه‌رێ‌ خوه‌ كرنه‌ دیاری.

ل یاریگه‌ها ئه‌لمه‌دینه‌ تیما یانا زاخۆ به‌رده‌وامی دا ئه‌نجامێن خوه‌ یێن لاواز پشتی خوساره‌ت بوویی ل گه‌ل خودانێن ئه‌ردی یانا كاره‌با ب گۆله‌كێ‌ بێ‌ به‌رامبه‌ر ، د یاریا واندا ئه‌وا دوهی ل باژێرێ‌ به‌غدا هاتیه‌ كرن، گۆلا مێڤاندار ژلایێ‌ یاریزان ستیڤێن بافۆرد د خوله‌كا 44ێ‌ دا تۆماركر، سه‌رباری ئاستێ‌ كوڕێن خابوری باشتر بوو لێ‌ مفا ژ چه‌ندین ده‌لیڤێن گۆلكرنێ‌ نه‌ كرن، بڤێ‌ ئه‌نجامێ‌ تیما زاخۆ خوساره‌تیا خوه‌ یا پێنجێ‌ د خولێ‌ دا تۆماركر و ب پێنچ خالان جهێ‌ خوه‌ ل رێزا 17ێ‌ هێلا.

ژلایه‌كێ‌ دووڤه‌ تیما یانا هه‌ولێر پێنگاڤه‌كا باش به‌ر ب پێشڤه‌ بۆ لیستا خولێ‌ هاڤێژت پشتی شیایی ب سه‌ركه‌ڤیت ل سه‌ر مێڤانا خوه‌ یانا نه‌فت ب دو گۆلان بێ‌ به‌رامبه‌ر، د یاریا واندا ئه‌وا دوهی ل یاریگه‌ها شه‌هید فرانسۆ حه‌ریری هاتیه‌ كرن، گۆلێن هه‌ولێرێ‌ ژلایێ‌ یاریزانان هێلیۆ مۆنتێرۆ و ئه‌مجه‌د رازی د خوله‌كێن 77 و 82ێ‌ دا تۆماركرن، یانا هه‌ولێر شیا ب 11 خالان پێشڤه‌ بیته‌ رێزا نه‌هێ‌ ل سه‌ر لیستا خولا نایابا ئیراقێ‌.

ئه‌ڤرۆ، نه‌وزاد هلۆری:

خوه‌ به‌رهه‌ڤكرن بۆ وه‌رزێ‌ نوو یێ‌ خولا پلا دو یا كوردستانێ‌ تیما ته‌پا پێی یا یانا شێلادزێ‌ گرێبه‌ست ل گه‌ل راهێنه‌ره‌ك و گۆلپارێزه‌كێ‌ بیانی پیشه‌كار ئیمزاكریه‌ و ب هیڤیێن مه‌زن و ده‌ربازبوون بۆ پلا ئێك.

ل دۆر ڤێ‌ یه‌كێ‌ شه‌ریف رێكانی راهێنه‌رێ‌ تیما شێلادزێ‌ بۆ ئه‌ڤرۆ گۆت: ژبۆ باشترین به‌رهه‌ڤی بۆ وه‌رزێ‌ نوو یێ‌ خولا كوردستانێ‌ گرێبه‌ست ل گه‌ل دو پیشه‌كارێن وه‌لاتێ‌ ئیرانێ‌ هاتیه‌ ئیمزاكرن ئه‌و ژی راهێنه‌رێ‌ گۆلپارێزان روح ئیلا ئه‌حمه‌د و گۆلپارێز عه‌لی سولتان، ئه‌وێن بۆ چه‌ند یانه‌یێن رۆژهه‌لاتا كوردستانێ‌ یاری كری و راهێنه‌ر بوو، روح ئیلا ئه‌حمه‌د راهێنه‌رێ‌ تازه‌پێگه‌هشتیێن یانا داناشا گیلان، موقاوه‌مه‌تا ته‌هران، ئۆلمپیكا ته‌هرانێ‌ و تیما پێشكه‌فتیانێن یانا حه‌سه‌ن ئاباد یا خولا پلا سێ‌ بوویه‌ و هه‌لبژارتیێ‌ لاوان، ژلایێ‌ خوه‌ڤه‌ گۆلپارێز عه‌لی سۆلتان یاری بۆ یانه‌یێن نه‌فتا ته‌هران، پێرسۆلیسا ته‌هران كریه‌.

ناڤهاتی دیاركر ئینانا وان ل دووڤ پلانه‌كێ‌ بوویه‌ كو دێ‌ شێن گوهۆڕینێن باش كه‌ن تایبه‌ت پێگه‌هاندنا گۆلپارێزێن یانێ‌ و د باوه‌رێ‌ دامه‌ بۆ وه‌رزێ‌ ئه‌ڤ ساله‌ ئه‌م بهێز هێنه‌ دناڤ خولێ‌ دا و ئارمانجا مه‌ ژی تیما خوه‌ ده‌ربازكه‌ینه‌ پلا ئیك وگۆت: هیڤییا مه‌ ئه‌وه‌ پشته‌ڤانیا یانا شێلادزێ‌ بهێته‌ كرن و ئه‌ڤ ساله‌ دا خه‌ونا مه‌ و جه‌ماوه‌ری بجه بیت بۆ پلا ئێك.

ئه‌ڤرۆ،

د دیداره‌كێ‌ دا یاریزانێ‌ تیما یانا دهۆك و هه‌لبژارتیێ‌ ئیراقێ‌ بۆ یاریا پایسكلان دیاركر سه‌رباری شیایه‌ د وه‌رزێ‌ ئه‌ڤ ساله‌ دا ناسناڤێ‌ قاره‌مانیا ئیراقێ‌ و یا نێڤده‌وله‌تی ب ده‌ستڤه‌ بینت لێ‌ نه‌ یانا وی و نه‌ چو لایه‌نا پێشوازیا وی نه‌كربوو.

هه‌روه‌سان وه‌هبی سلێمان گۆت: ئه‌ڤه‌ بۆ ماوێ‌ چار سالا ل دووڤ ئێك وه‌كو یاریزانێ‌ یانا دهۆك ل سه‌ر ئاستێ‌ تازه‌پێگه‌هشتیان و لاوان رێزێن پێشیێ‌ و قاره‌مانیێ‌ ب ده‌ستخوه‌ڤه‌ دئینم هه‌روه‌سان دو جارا ل دووڤ ئێك قاره‌مانیێن نێڤده‌وله‌تی ل ئیرانێ‌ رێزێن ئێكێ‌ و دویێ‌ ده‌ستڤه‌ ئینایه‌ لێ‌ مخابن چو كه‌سان پێشوازیا من ژی نه‌ كریه‌ نه‌ یانا دهۆك و نه‌ ده‌رڤه‌یی یانێ‌.

هه‌روه‌سان ناڤهاتی دیاركر وه‌كو لایه‌نێ‌ دارایی ئاریشه‌ ئه‌وه‌ یانه‌ مه‌زاختیه‌كێ‌ گه‌له‌ك كێم بۆ تیما مه‌ به‌رهه‌ڤ دكه‌ت و بوویه‌ ئه‌گه‌ر گه‌له‌ك یاریزانێن باش نه‌ چار دبن تیمێ‌ بهێلین، ژبه‌ركو یاریزان پێدڤی ب چلۆبه‌رگێن وه‌رزشی یێن تایبه‌ت ب یاریێ‌ ڤه‌ و گۆت: ئه‌ز یاریزانێ‌ یانا دهۆكێ‌ مه‌ و شانازیێ‌ پێ‌ دبه‌م لێ‌ ژبه‌ر نه‌بوونا پشته‌ڤانیا دارایی نه‌چاربووم ب ناڤێ‌ یانه‌كا به‌غدایی پشكداری قاره‌مانیا عه‌ره‌بی ل وه‌لاتێ‌ سوریێ‌ بم.

وه‌هبی سلێمان گۆت: چه‌ند یانه‌یێن هه‌رێمێ‌ و ناڤه‌ڕاستا ئیراقێ‌ داخوازا ئیمزاكرنا گرێبه‌ستێ‌ ژ من كرینه‌ نێزیكی 500دولاران وه‌كو مووچه‌یێ‌ هه‌یڤانه‌ بوو من ته‌رخانكریه‌، هیڤییا من ئه‌وه‌ یانا دهۆك پشته‌ڤانیا مه‌ بكه‌ت بلا كێمتر بیت ژ ڤی كۆژمه‌یی ژبه‌ركو مه‌ شیانێن هه‌ین و كه‌یفخوه‌شم بناڤێ‌ یانا خوه‌ پشكداریا بكه‌م.

ئه‌ڤرۆ،

دهێته‌ چاڤه‌ڕێ‌ كرن ئه‌ڤرۆ ژی دو یاریێن مایی و یێن دووماهیێ‌ ژ قۆناغا 16ێ‌ یا قاره‌مانیا جیهانێ‌ مۆندیالا قه‌ته‌ر 2022 بهێنه‌ ئه‌نجامدان، چار هه‌لبژارتیێن ئۆرۆپا و ئێكا ئه‌فریقیا دێ‌ شه‌ڕی بۆ دو پلێتێن ده‌ربازبوونێ‌ به‌ر ب قۆناغا هه‌شتێ‌ كه‌ن.

مه‌غرب – ئسپانیا

بڕیاره‌ ئه‌ڤ یاریه‌ ل ده‌مژمێر شه‌شی شه‌ڤ ل یاریگه‌ها ئه‌لمه‌دینه‌ ئه‌لتعلیمیه‌ بهێته‌ ئه‌نجامدان كو دهێته‌ هژمارتن ئێك ژ یاریێن دی یێن گرنگ ب ڕامانێن جودا، هه‌لبژارتیێ‌ مه‌غرب ئه‌وا شیایی سه‌رێ‌ لیستا كۆما شه‌شێ‌ بهێت ب حه‌فت خالان، ب وه‌كه‌هه‌ڤی ل گه‌ل كرواتیا بێ‌ گۆل، سه‌ركه‌فتن ل سه‌ر به‌لجیكا ب2-چنه‌ و كه‌نه‌دا 2-1 گۆلان، ژلایێ‌ خوه‌ڤه‌ هه‌لبژارتیێ‌ ئسپانیا ب پێنچ خالان رێزا دویێ‌ د كۆما پێنجێ‌ دا هات، سه‌رباری د یاریا ئێكێ‌ دا سه‌ركه‌فتنه‌كا مه‌زن ل سه‌ر كۆستاریكا ئینابوو ب حه‌فت گۆلێن پاقژ لێ‌ د گه‌ل ئه‌لمانیا ب گۆله‌كێ‌ وه‌كهه‌ڤبوو دووڤدا ل گه‌ل چاپانێ‌ تووشی خوساره‌تیێ‌ بوو كو ب جووداهیا گۆلان ژ كۆستاریكا رێزا دویێ‌ هات و ده‌ربازبوو ڤێ‌ قۆناغێ‌، یاریا ئه‌ڤرۆ دیداره‌كا هه‌ستیاره‌ دوور ژ ناكۆكیێن سیاسی وتێكچوونا په‌یوه‌ندیێن هه‌ردو وه‌لاتان ژبه‌ر گزیرتێن دناڤبه‌را هه‌ردو سنۆران دا و بابه‌تێ‌ په‌نابه‌ران، هه‌لبژارتیێ‌ مه‌غرب ئێك باشترین ئاستێ‌ خوه‌ د سێ‌ یاریێن بۆری دا نیشاندایه‌ ئه‌ڤچه‌نده‌ ژی بوویه‌ جهێ‌ تڕسێ‌ هه‌مبه‌ری ئسپانیا سه‌رباری هه‌لبژارتیێ‌ ئۆرۆپی ئێك ژ به‌ربژارێن ناسناڤی نه‌ لێ‌ ب سانه‌هی نابیت خوه‌ ژ ئاسته‌نگا هه‌لبژارتیێ‌ عه‌ره‌بی و كێشیوه‌رێ‌ ئه‌فریقیا ده‌ربازبكه‌ت ئه‌وا هیڤیێن مه‌زن هه‌ین كو بشێن ده‌ستكه‌فتی ژ مۆندیالا 1986 بۆرینت ده‌مێ‌ گه‌هشتیه‌ ڤێ‌ قۆناغێ‌ و هیڤیێن وێ‌ ده‌ربازبیته‌ قۆناغا هه‌شتێ‌، وه‌لید ئه‌لركراكی راهێنه‌رێ‌ مه‌غربی باش دزانیت پێكهاتیێ‌ وی خودان شیانن و جهێ‌ باوه‌ریێ‌ نه‌ ژوانا حه‌كیم زیاتش، رۆمان سایس، یاسین بۆنۆ، سوفیان بۆفال، زه‌كه‌ریا ئه‌بۆ خلال و ئه‌شره‌ف ئه‌لحه‌كیمی، هه‌لبژارتیێ‌ ئسپانیا باش دزانیت هێزا هه‌ڤڕكێ‌ خوه‌ چه‌نده‌ و ژ ده‌ستدانا سه‌ركه‌فتنێ‌ دێ‌ باجه‌كا مه‌زن یا دیرۆكی هێته‌ دان ئانكۆ ژ ده‌ستدانا ناسناڤێ‌ قاره‌مانیێ‌ یه‌، د یاریێن فه‌رمی دا سێ‌ جاران هه‌مبه‌ر ئێك بووینه‌ دو سه‌ركه‌فتن و وه‌كهه‌ڤیه‌ك بۆ ئسپانیا بوو، دووماهی جار ل مۆندیالا 2018ێ‌ د قۆناغا كۆمان دا ب سێ‌ گۆلان وه‌كهه‌ڤبوون، ئسپانیا ب پێكهاتیه‌كێ‌ شاره‌زا و زیره‌ك هه‌نه‌ نموونه‌ سێرجیۆ بۆسكێتس، دانی، كارباخال، جۆردی ئالبا، الفارۆ مۆراتا، فیران تۆرێس، ماركۆ ئه‌سینسیۆ، ئانسۆ فاتی و دانی ئۆلمۆ.

سویسرا – پۆرتۆگال

یاریگه‌ها لۆسێل دێ‌ بیته‌ جهێ‌ شه‌ڕی د ناڤبه‌را هه‌ردو هه‌لبژارتیێن ئۆرۆپا دا ژبۆ ب ده‌ستڤه‌ ئینانا پلێتا دووماهیێ‌ یا قۆناغا هه‌شتێ‌ ئه‌وا دێ‌ ئه‌ڤ یاریه‌ ل ده‌مژمێر 10 شه‌ڤ هێته‌ ئه‌نجامدان، هه‌لبژارتیێ‌ پۆرتۆگال ده‌ربازبوو ڤێ‌ قۆناغێ‌ پشتی شیایی سه‌ركێشیا كۆما هه‌شتێ‌ ب كه‌ت ب كۆمكرنا شه‌ش خالان ژ دو سه‌ركه‌فتنان ل گه‌ل غانا 3-2 و ل گه‌ل ئۆروگۆایی 2-چنه‌ لێ‌ دیاریا سێیێ‌ دا ل گه‌ل كوریا باكۆر تووشی خوساره‌تیێ‌ بوو ب 2-1 گۆلان، ژلایێ‌ خوه‌ڤه‌ سویسرا وه‌كو هه‌لبژارتیا رێزا دویێ‌ ژ كۆما حه‌فتێ‌ ده‌ربازبوو ڤێ‌ قۆناغێ‌ ب كۆمكرنا شه‌ش خالان ژ دو سه‌ركه‌فتنان ل گه‌ل كامیرۆن 1-چنه‌ و سربیا 3-2، لێ‌ هه‌مبه‌ری به‌رازیل ب گۆله‌كێ‌ خوساره‌ت بوو.

هه‌لبژارتیێ‌ پۆرتۆگال دێ‌ ب پێكهاتیێ‌ خوه‌ یێ‌ سه‌ره‌كی بۆ ڤێ‌ یاریێ‌ هێته‌ د ناڤ یاریگه‌هێ‌ دا تایبه‌ت پشتی ده‌نگۆباسێ‌ ڤه‌گه‌ڕیانا ستێرێن وان یا هێلا ناڤین ئۆتاڤیۆ و هێلا به‌ره‌ڤانیێ‌ دانێلۆ بێرێرا ژ هنگاڤتنێ‌ و به‌رهه‌ڤبوونا رافائێل لیاوو، برۆنۆ هێرناندێز و جواو فێلێكس، لێ‌ ئه‌و ڕاوه‌رگرتنا رۆژناما ئه‌بۆلا یا پۆرتۆگالی ژ جه‌ماوه‌رێ‌ خوه‌ وه‌رگرتی كو 70% ل گه‌ل هندێ‌ نینن كریستیانۆ رۆنالدۆ د یاریا ئه‌ڤرۆ دا سه‌ره‌كی بیت ئه‌ڤچه‌نده‌ بوویه‌ جهێ‌ دلگرانیا راهێنه‌ر و یاریزانێ‌ ناڤهاتی ژبه‌ركو رۆنالدۆ ئێك ژ ستێرێن ناڤۆده‌نگه‌ و دبیته‌ مۆندیالا پێنجێ‌ پشكدار دبیت و شیایه‌ د هه‌موو مۆندیالان دا گۆلان تۆماربكه‌ت ئه‌وێ‌ دێ‌ بزاڤێ‌ كه‌ت بگه‌هیته‌ نمرا پیڤایی یا تۆماركرنا گۆلان یا ب ناڤێ‌ هه‌ڤوه‌لاتیێ‌ وی ئیزیبیۆ ل مۆندیالا 1966 ب تۆماركرنا نه‌ه گۆلان و دزانیت ئه‌ڤه‌ دووماهی پشكداریا، لێ‌ ژلایێ‌ خوه‌ڤه‌ هه‌لبژارتیێ‌ سویسرا ژی هیڤی و خه‌ونێن مه‌زن هه‌نه‌ بۆ قۆناغا هه‌شتێ‌ و دووباره‌ ده‌ستكه‌فتێن سێ‌ مۆندیالا ل1934، 1938 و 1954ێ‌ ڤه‌گه‌ڕینیت ده‌مێ‌ گه‌هشتینه‌ قۆناغا چارێك دووماهیێ‌، هه‌روه‌سا هێرشبه‌رێ‌ وێ‌ شێردان شاكێری كو دبیته‌ ئێكه‌م یاریزانێ‌ سویسری گۆلان د سێ‌ مۆندیالان دا تۆمار بكه‌ت و دێ‌ بزاڤێ‌ كه‌ت نمرا هه‌ڤوه‌لاتیێ‌ خوه‌ هۆچی ئه‌وێ‌ ل 1954 شیایی شه‌ش گۆلان بینت، د نوكه‌ دا شاكێری پێنچ گۆل هه‌نه‌ سه‌رجه‌م مۆندیالان.