ژ نڤیسینا: ئانا مارییا شوا Ana Maria Shua
وهرگێڕان ژ عهرهبی: شهمال ئاكرهیی
دو عاشق
ههرتم وان خهون ب كراسگۆهڕینێ ددیتن داكو بكارن ب ئاشكرایی ههڤدو ماچی بكهن، ههردو د روودانهكێ دا ل دهمێ ژڤانهكێ وان یێ نهینی مرن. ئێك ژ وان ل سهر شێوازێ فیلهكێ سێركێ زڤڕی ڤه ژیانێ و ئێك ژی وهكی گولهكا پیتونیایێ. ژبهركو خولا ژیانا پیتونیایێ گهلهك یا كورته، ل وی چاخی نهشیان ب دیدارا ههڤدو شاد ببنهڤه. لێ د كراسگۆهڕینا دویێ دا، ههردو مرۆڤ بوون، بهلێ جوداهییا تهمهنی دناڤبهرا وان دا شیست و سێ ساڵ بوون. ئێك ژ وان بوو پاپا، و ئێك بوو كچهكا بچووك و جوان كو دهستوورییا هندێ پێ هات بوو دان ل بهرامبهر خهلكی گوستیلا پاپای ماچی بكهت.
*****
رێزبهندی
روودانێن رابۆری روودانێن ئهڤرۆ دهستنیشان دكهن. بۆ نموونه، ئهگهر دایك و بابێن ته نه گههشتبانه ههڤ، تو ئهڤرۆ نه دبووی. هندی بۆ رێزبهندییا وان كاودانێن دیرۆكا جیهانێ، د ژیانا رابۆری دا، دروست كرین بزڤڕی دێ بینی كو ئاساییترێن روودانێن دیرۆكێ دهرئهنجامێن ، هند ئالزی و نههنگاڤییان بووینه كو رهنگه مینا زنجیرهیهكا بێدووماهی بوو بن.
بۆ نموونه، ئهگهر دهیناسۆرێ بلیزیبۆسۆر یێ گۆشتخۆر هێكێن مێیا تریسیراتوپسێ نه خواربان كو ل چاخێ تهباشیری یێ داویێ ب نهزانین دانابوونه سهر پهڕاڤێ، رهنگه ته – ما كی دزانیت؟ – هێشتا حهز ژ من كربا!
ئانا مارییا شوا Ana Maria Shua :
نڤیسهرهكا ئهرژهنتینه ب بنیات جوهی یه، ل ساڵا 1951ێ ل بۆینس ئایرس Buenos Aires هاتییه سهر دونیایێ.ل تهمهنێ 16سالیێ دا ل سالا 1967ێ، ئێكهم كۆما ههلبهستان بناڤێ (El sol y yo – ئهز و رۆژ) چاپكرییه. پێنج بهرههمێن وێ یێن شاكار ههنه. شوا، ب نڤیسینا تێكستێن ئهدهبی یێن گهلهك كورت یا ناڤداره. ژ بلی چیرۆكێن كورت، سیناریۆ بۆ درامایا تهلهڤزیۆنی و رۆمانێ ژی دنڤیسیت.
ئانا مارییا شوا، د ژییهكێ گهنج دا ب ” the Queen of the Microstory – پادشاها مایكرۆچیرۆكێ ” یا جیهانا ئهدهبیاتا ئسپانی ئاخێڤان هاتییه نیاسین. بهرههمێن شوا بۆ گهلهك زمانێن زیندی هاتینه وهرگێڕان.
ژێدهر:
https://samaward.net
https://jwa.org/encyclopedia/article/shua-ana-maria
نيشاندان