تاهر رێكانی

تیما فوتبۆلا یانەیا دهۆكێ كه‌مپا خۆ یا راهێنانێ ل باژێرێ ئسپارتا یێ توركیا ب دووماهی ئینا ئه‌وا بۆ ماوه‌یێ دو حه‌فتیان ڤه‌كێشای، چار یاریێن هه‌ڤالینی ئه‌نجامدابوون ب مه‌ره‌ما باشترین بەرهەڤی بۆ وەرزێ نوو یا خولا ستێرێن ئیراقێ، لدۆر ڤێ کەمپێ بۆچوونێن جودا هاتینە وەرگرتن و بڤێ شێوەیی
ئه‌حمد به‌شار گۆلپارێزێ تیمێ دیار كر ب شێوه‌یه‌كێ گشتی کەمپەکا باش و سه‌ركه‌فتی بوو، مه‌ مفایه‌كێ باش ژێ و رگرت و تێگه‌هشتن دناڤبه‌را یاریزانان دا یا په‌یدابووی، ب ئانه‌هیا خۆدێ هه‌تا ده‌ه‌ستپێكا خۆلێ دێ هه‌ڤكاریه‌كا تمام په‌یدا بیت، هه‌می یاریزان گه‌شبینن كو ڤی وه‌رزی ئه‌نجام باشتربن ژ وه‌رزێ بۆری، شێوازێ ڤی راهێنه‌ری یێ جودایه‌ و ژ راهێنه‌رێن به‌ری نۆكه‌ و حه‌ز ژ یاریا به‌ره‌لایی ناكه‌ت و داخوازیت یاریێ ب ئارامی بكه‌ن و گرنگیێ د ده‌ته‌ پاسێن كۆرت، حەز ژ هندێ ناكه‌ت سەرباری تیم یا سه‌ركه‌فتی بیت ده‌می ب كرنا یاریا پاسان ڤه‌ ببه‌ت نه‌ك یاریا به‌ره‌لایی.
ژلایه‌كێ دویڤه‌ كاپتنێ تیمێ به‌یار ئه‌بوبكر بۆ ده‌زگه‌هێن راگه‌هاندنێ دیاركر دڤی كه‌مپی دا مه‌ گه‌له‌ك باش خۆ به‌رهه‌ڤ دکەین و مه‌ مفایه‌كێ باش ژێ دیتیه‌، ژلایێ ته‌كنیكێ ڤه‌ راهێنه‌ری کارەکێ باش کریە و تشته‌كێ نوو لده‌ف هه‌یه‌ و یاسایێن وی دجهێ خۆدانه‌ یێ زاله‌ لسه‌ر هه‌می یاریزانان، تشتێ هه‌ره‌ گرنگ لده‌ف ڤی راهێنه‌ری ئه‌وه‌ كو حه‌ز ژ ژڤانێ دورست دكه‌ت نابیت ئێك یاریزان گیروبیت، ئه‌گه‌ر بڤی شێوه‌ی بیت دێ سه‌ركه‌فتن و ده‌سكه‌فتێن باش ب ده‌ستخۆڤه‌ ئینین، هه‌ر تشتەکێ باش بۆ یاریزانی دڤێت.
دهێته‌ زانین دڤی كه‌مپی دا یانه‌یا دهۆك چار یاریێن هه‌ڤالینی ئه‌نجامداینە، دئێكه‌م یاریا خۆ دا سه‌ركه‌فت لسه‌ر یانه‌یا تیكڤێس یا مه‌قدونی ئینا(2-0) گۆلان و سه‌ركه‌فت لسه‌ر یانه‌یا وه‌حده‌ یا سعۆدی ب هه‌مان ئه‌نجام، به‌رامبه‌ر یانه‌یێن ئه‌نتالیا سپۆر و ئامه‌د سپۆر تۆشی خوسارەتیێ بوو.

د پێنگاڤەكا سەیر دا ژبۆ قورتالكرن ژ ئیفلاسبوونێ‌ و قەیرانا دارایی، یانەیا دیبۆرتیفۆ مۆنیسیبال یا پیرۆڤی هزار سپۆنسەر بۆ درێسێ‌ یانەیا خۆ پەیدا كرن و شیا چارەسەرییا ئاریشەیا دارایی بكەت.
ل دووڤ تۆرا تی یو سی سپۆرت tycsports یا ئەرجەنتینی ژبۆ خوە قۆرتالكرنێ‌ ژ قەیرانا دارایی یا یانەیێ كارگێرییا یانەیێ هزرەكا جودا ب كارئینا كو درێسێ‌ وەرزێ‌ نوو ب شێوەیەكێ‌ جودا بیت هەروەكو د وێنەیی دا دیار، هزار چارگۆشەیێن بچووك دناڤ درێسی دا بن و هەر پارچە گۆشەیەك لۆگۆیێ كۆمبوونەكێ‌ ل سەر بیت وەكو سپۆنسەر كو ب ڕەنگێ‌ رەش و سپی بتنێ‌ بیت، دگەل پاراستنا ئەوێ‌ ڕەنگێ‌ سۆر كو هێمایی لۆگۆیێ یانەیێ یە.
ئەڤ پێنگاڤە ل كانوونا دویێ یا ئەڤ سالە دەستپێكرییە ب كۆمڤەكرنا ئەڤان كۆمپانییا وەكو سپنسەر، بۆ هەر پارچە چارگۆشەیەكێ‌ 60 دۆلار هاتینە تەرخانكرن بۆ هەر یارییەكێ‌، ئەڤ دەستپێشخەرییە و پێنگاڤە سەركەڤتنەكا باش د بوارێ‌ دارایی دا ئینا، تایبەت پشتی پشتەڤانێن یانەیێ ژی درێس كرین سەرەرایی هەر درێسەك ژ 35 دۆلار بۆ 44 دولاران گران كربوو.

ب فەرمی جیانی ئینفانتینۆ سەرۆكێ‌ فدراسیۆنا فوتبۆلا جیهانێ‌ فیفا ڕاگەهاند پرۆژەیێ فیفا فۆروورد ئینتەرپرایز FIFA Forward Enterprise هاتە هەلوەشاندن هەلوەشاندن، ئەوا گرێدایی ب دامەزراندنا كۆمپانیەكێ‌ ب كۆژمەیێ 20 ملیار دۆلاران ژبۆ بڕێڤەبرنا مافێن بازرگانی و ڕێكخستنا چالاكیێن فیفایێ ژوانا مۆندیالا جیهانی و كۆپا یانەیێن جیهانی.
پشتی ب دووماهی هاتنا مۆندیالا 2026ێ‌ ئێكسەر سەرۆكێ‌ فیفایێ ئینفانتینۆیی پرۆژە ڕاگەهاند، لێ‌ هەرزوو فدراسیۆنا فوتبۆلا ئۆرۆپا ب تێكرایێ 55 دەنگان بڕیاردا هەكە پەشێمان نەبیت پشكداری د مۆندیالان دا ناكەن، دووڤدا فدارسیۆنا كۆنكاكاف و یا ئاسیا هاتنە دناڤ پێلا نەڕازیبوونێ‌ دا، ئەڤچەندە بوو ئەگەر دوبەرەكی دناڤ ئەندامێن فیفایێ بخوە ژی پەیدا بكەت، بوو ئەگەر ئینفانتینۆ نەچار بكەت كو ل سەر پرۆژەیێ خوە پەشێمان بیت و ب هەلوەشینیت

عایشە عەجیب

د داخویانیەکێ دا سەرۆکێ یانەیا باتیفا بۆ ڕۆژنامەیا ئەڤرۆ دیار کر ئەوان ب فەرمی گرێبەست ل گەل ئەرشەد فەرەج بۆ ڕاهێنەراتییا تیما وان یا فوتبۆلێ و وەرزێ ئەڤ سالە دێ بەرهەڤی بۆ دەربازبوونێ بیت نەک بتنێ پشکدارییە.
زێدەتر ئەیھەم جامی گۆت: وەکو دیار وەرزێ ئەڤ سالە یێ خولا پلا دو یا کوردستانێ دێ ب هێزتر بیت ژ وەرزێن بۆری، سەرباری د وەرزێ بۆری دا ئەم نێزیکی دەستڤە ئینانا پلێتا دەربازبوونێ بووین لێ چەند ئەگەرێن جودا بوونە ڕێگر بەرانبەر دەربازبوونێ، لەوما ژی بۆ وەرزێ ئەڤ سالە ب پلانەکا ڕێکخستی کار ل گەل ڕاهێنەرێ نوو دێ هێتە کرن و ئازادییا سەربەخۆ دایێ ژبۆ ئینان و دوورئێخستنا یاریزانان، ئەم ب شیانێن ڕاهێنەرێ نوو ئەرشەد فەرەجی گەشبینین و مە باوەری دایی ژبۆ پێشکەفتنەکا بلەز و دەستڤەئینانا ئارمانجێن یانەیێ، سەربۆر دگەل تیمێ یا هەیی، هاتنا وی نابیتە ئەگەرێ گوهۆڕینێن مەزن د ناڤا ڕێزێن تیمێ دا.
ل دووماهیێ سەرۆکێ یانەیێ گۆت: بەرنامێ مە یێ گۆنجایە و ئارمانج ژی دەربازبوونە، ئەڤە ژی دەم بۆ دڤێت ژبەرکو خول یا درێژە و چاڤەڕێ هەڤڕکییەکا دژواردبین، تیما مە ب شێوازەکێ باش یا ڕێکخستییە و یاریزانێن باش مە ئیناینە دناڤ ڕێزێن تیمێ دا، ڕۆلێ جەماوەری ب بلند هەلسەنگینین و ئەون هژمارە ١٢ دناڤ تیمێ دا، د ڤێ قووناغێ دا یانە پێدڤی ب هاریکاری و پشتەڤانیا تەمام یا پشتەڤانێن خۆ یێن وەفادار هەیە، دا کو ب هەڤپشکی بشێن تیمەکا ب هێز ئاڤا بکەن و بگەهنە قووناغەکا بلندتر و سەرکەفتنێن مەزنتر تۆمار بکەن.

رەمەزان زەكەریا
د داخۆیانیەكێ دا ئەندامێ‌ كارگێرییا یانەیا ئاكرێ ئاشكراكر ب فەرمی ئەوان گرێبەستا ڕاهێنەرێ‌ خوە یێ وەرزێ‌ بۆریی یونس سلێمان بۆ وەرزەكێ‌ دی ئیمزاكر، خوە بەرهەڤكرن بۆ هەردو خولێن پلا دو ئیراقێ‌ و خولا نایابا كوردستانێ‌ یێن فوتبۆلێ‌ و گەشبینن دەستكەڤتێن باش بینن.
زێدەتر سوهەیب عەلی بۆ ئەڤرۆ گۆت: گرێبەستا یونس سلێمان بۆ وەرزێ (2026-2027) هاتە نووكرن پشتی ب سەركەڤتیانە تیما مە ل وەرزێ‌ بۆری بڕێڤەبری تایبەت د خولا پلا سێ یا ئیراقێ‌ دا، زێدەتر مە باوەری پێ هەبوویە لەوما ژی مە گرێبەستا وی نووكر د وەرزێ بووری دا ب دەستكەفتەكێ مێژوویی شیا تیما فوتبۆلێ‌ بگەهینیتە گۆپیتكێ و بكەتە قارەمانا خولا پلە سێ یا ئیراقێ، كو ئەڤە ژی سەركەفتنەكا مەزن بوو بۆ وەرزشا دەڤەرێ و ڕێكا تیما ئاكرێ بۆ خولا پلە دو ل ئاستێ ئیراقێ ڤەكر.
ناڤهاتی گۆت: بۆ وەزێ‌ نوو دێ‌ پلان و بەرنامەیێن ڕێكخستی هەبن، ب پشتەڤانییا حوكمەتا هەرێما كوردستانێ‌ و پارتا مە گەشبینن وەرزێ‌ بهێت باشتربین و پتر دلێ‌ جەماوەر خوەش بكەین، د رۆژێن بهێت دا دێ‌ كۆمبوونێن جودا هەبن ژبۆ دانانا میكالزمەكێ‌ ئینانا یاریزانان و پشت گەرمی ب یاریزانێن خوە و یێن وەرزێ‌ بۆری.
سوهەیب عەلی گۆت ژی: ئارمانجا یانەیێ ژ نووكرنا گرێبەستا كیونس سلێمان پاراستنا سەقامگیریا تەكنیكی یا تیمێ یە چونكی بەرپڕسیارییا ڤی وەرزی گەلەك مەزنترە ژ لایەكێ ڤە هەڤڕكیكرن د ناڤ ب هێزترین خولا نایاب دا، ژ لایەكێ دی ڤە هەڤ{كی بەرانبەر یانەیێن ب هێزێن ئیراقێ د خولا پلە دو دا.

سەرباری ل حەفتیا بۆری فەرمی هاتبوو ڕاگەهاندن كو ستێرێ‌ مسری محەمەد سەلاح ل سەر خاترا سەرۆكێ‌ توركیا رەجەب تەیب ئەردۆگان ڕازیبوویە گرێبەستا یانەیا بەشكتاش ئیمزا بكەت، لێ‌ هەتا دگەل نڤێسینا ڤی بابەتی نە هاتیە ڕاگەهاندن.
رۆژنامەیێن توركیا بەلاڤكرییە كو ئێك ژ ئەگەرێن نە گەهشتنا ڕێكەڤتنا دووماهیێ دناڤبەرا محەمەد سەلاحی و بەشكتاش ئەوە بوویە ئەو مووچەیێ دەستپێكێ‌ بۆ هاتیە گوتن د نڤێسارا گرێبەستێ‌ دا هاتیە پارچەكرن د چەند مەرجەكان دا، ئەڤچەندە بوویە ئەگەر بریكارێ‌ وی پرۆسەیا گرێبەستێ‌ بڕاوەستینیت هەتا بهێتە ڕاستڤەكرن، ژلایێ خوەڤە یانەیا بەشكتاش دێ‌ د ڤێ‌ حەفتیێ دا روهنكرنێ‌ دەت ئەوا جەماوەرێ‌ وێ‌ دخوازن گرێبەست دگەل محمدی بهێتە ئیمزاكرن بەری یانەیەكا سعۆدیێ دەستخوەڤە بنیت.