فدراسیۆنا یارییا پایسكلان ل ئاسیا ڕازیبوون ل سەر مێڤانداریكرنا هەرێما كوردستانێ‌ بۆ قارەمانییا ئاسیا یا پایسكلڤانێن چیایی بۆ سالا 2028ێ‌ و بڕیارە دەمەكێ‌ نێزیك دا شاندەكێ‌ فدراسیۆنێ‌ سەرەدانا هەولێرێ‌ بكەت.
لدۆر ڤێ‌ یەكێ‌ عەلی حەمید سەرۆكێ‌ فدراسیۆنا پایسكلڤانێن ئیراقێ‌ گۆت: پشتی هنارتنا بادەكا ئیراقێ‌َ بۆ مێڤانداریكرنا قارەمانییا ئاسیا یا پایسكلڤانێن چیایی، فدراسیۆنا ئاسیا ڕازیبوو ل سەر مێڤانداریكرنا باژێرێ‌ هەولێرێ‌ بۆ قارەمانیێ ئەوا بڕیارە ل دەستپێكا سالا 2028ێ‌ بهێتە كرن كو دهێتە هژمارتن ئێك ژ مەزنترین قارەمانیێن ئاسیا بپشكدارییا پرانییا وەلاتێن كێشوەری، بڕیارە نێزیكترین دەم لژنەیەكا تایبەتمەند بۆ ڤەدیتنا جهی و ژێرخانەیا پێشچاڤ ژبۆ دانانا خالێن سەرەكی بۆ كاركرنێ‌ لدووڤ یاسایا یاریێ‌.
ژلایەكێ‌ دووڤە ناڤهاتی گۆت: ئەڤ قارەمانییا دناڤا چالاكیێن ئاسیا دا هاتە پەسەندكرن و دێ‌ دەست ب ڕێكارێن بەرهەڤییان هێنە كرن، بۆ زانین ئەو چیایێن ل كوردستانێ‌ ب گشتی و تایبەت هەولێرێ‌ بوویە ڕیخۆشكەرەك ئەم داخوازییا مێڤانداریێ‌ بكەین پشتی ب سەركەڤتیانە قارەمانییا عەرەبی ل هەولێرێ‌ هاتییە ئەنجامدان و بوویە جهێ‌ ڕازیبوونا پشكداران، ئەڤ قارەمانییە دێ‌ بیتە دەرگەهەكێ‌ دی كو ئیراق و كوردستان مێڤاندارییا قارەمانیێن مەزن وەكو یێن ئاسیایی بكەت.
ژلایەكێ‌ دووڤە هشیار فەریق سەرۆكێ‌ فدراسیۆنا پایسكلڤانێن كوردستانێ‌ بۆ رۆژنامەیا ئەڤرۆ گۆت: مێڤانداریكرنا هەولێرا پایتەخت ب قارەمانیەما بڤی سەنگی و مەزن ل سەر ئاستێ‌ هەلبژارتیێن كێشوەرێ‌ ئاسیا گرنگییەكا تایبەت دێ‌ بۆ هەبیت، بەری دو سالان وەكو فدراسیۆنا كوردستانێ‌ مە قارەمانییەك ل سەر ئاستێ‌ یانەیێن هەرێمێ‌ بۆ پایسكلڤانێن چیایی ڕێكئێخست بوو، ئەڤچەندە بوو ئەگەر فدراسیۆنا ئیراقێ‌ دخواز بكەت ل سەر ئاستێ‌ ئاسیا ژی هەولێر مێڤان بكەت، ژبەركو دەڤەرێن كوردستانی چیایی نە و هەروەسان هەموو خالێن سەركەڤتنا قارەمانیێ‌ دێ‌ د بەردەرستبن، لەوما ژی دبینم ئەڤ قارەمانییە دێ‌ بیتە فەستیڤالەكا ئاسیایی و جوان ل كوردستانێ‌.
هەژی گۆتنێ‌ یە زێدەتری پرانییا یاریزانێن دهۆك، هەولێر و سلێمانی ل سەر ئاستێن كوڕان و كچان دناڤ ڕێزێن هەلبژارتیێ‌ ئیراقێ‌ بۆ بەریكانەیێن ل ڕێكێن چیایی ژ وانا یاریزانێن یانەیا دهۆك ل سەر ئاستێ‌ كوڕان یێن تازەپێگەهشتی و لاوان و پێشكەڤتیانە.

تیما فوتبۆلا یانەیا زاخۆ بەردەوامە ل سەر بەرهەڤیێن خوە بۆ یارییا پێنجێ‌ ژ هەڤڕكیێن كۆپا كەنداڤی ئەوا بڕیارە ل 23ێ‌ ڤێ‌ مەهێ‌ ببیتە مێڤانا یانەیا ئەلقادسیە یا كوێتی ژ چارچووڤەیێ‌ كۆما ئێكێ‌ و چاڤ دەربازبوونێ‌ بۆ قۆناغا چارێك دووماهیێ‌ كو دهێتە هژمارت بۆ جارا ئێكێ‌ یە ئەڤ یانەیە پشكداربیت.
ئەنجامێن تیما زاخۆ د هەرسێ‌ یاریێن بۆری دا بڤی شێوەیی بوون، یارییا ئێكێ‌ دگەل دگەل ئەلقادسیە یا كوێتی ب 3-1 سەركەڤتن ئینابوو، د یارییا دویێ‌ دا دگەل سترە یا بەحرێنی بێ‌ گۆل وەكهەڤبوون، د یارییا سێیێ‌ دا زاخۆ سەركەڤتنەكا گرنگ ل سەر عەین یا ئیماراتی ئینا ب دو گۆلان بێ‌ بەرانبەر و خالێن خوە گەهاندنە حەفت خالان سەرێ‌ لیستا كۆما ئێكێ‌ دهێت، عەین ب شەش خالان ڕێزا دویێ‌، سترە ب دو خالان رێزا سێیێ‌ و قادسیە ب خالەكێ‌ ل رێزا چارێ‌ دهێت، بۆ زانین كۆما دویێ‌ پێكهاتینە ژ ئەلنەهزە یا عومانی، تەزامن یا یەمەنی، ریان یا قەتەری و شەباب یا سعۆدیێ‌.
د دیدارەكێ‌ دا ویسان ڕزق ڕاهێنەرێ‌ تیما یانەیا زاخۆ گەشبنییا خوە دیاركر بۆ یاریێن داهاتی و گۆت: پێخوەشحالم هەلوەستێ‌ تیما مە د كۆمێ‌ دا یا باشە و دەربازبوون ژی تا ڕادەیەكێ‌ باش بوویە لێ‌ هێشتا مسۆگەر نەبوویە، لەما ژی مە سێ یاریێن مایین و گەشبینم دێ‌ پلێتا قووناغا بهێت یا چارگۆشەیا زێرین مسۆگەر كەین، دڤێت كارێ‌ مە یێ‌ بەردەوامبیت و هیچ شێوەیەكێ‌ سستاهیێ‌ د چ یارییان دا نەكەین، كارگێرییا یانەیێ‌ و جەماوەرێ‌ زاخۆ باشترین نموونەیێن وەفایێ و پشتەڤانیێ‌ نە بۆ تیمێ‌.
هەروەسان ناڤهاتی گۆت: یارییا بهێت دگەل بهێزترین هەڤڕكا مە یا كۆمێ‌ یە، تیمەكا ب ناڤ و دەنگە و خودان یاریزانێن بهێز و پیشەكارێن ئاست بلندە، راستە مە ل یاریگەها خوە سەركەڤتن ئینابوو، لێ‌ یارییا بهێت دێ‌ ب زەحمەتر بیت، هەرچەندە من باوەری ب شیانێن یاریزانێن خوە هەیە كو دێ‌ ئاست و ئەنجامێن سەرفەراز ئینن.

بۆ جارا ئێكێ‌ یە د دیرۆكا قارەمانیێ‌ دا فدراسیۆنا فوتبۆلا عەرەبی خەلاتێن قارەمانییا عەرەبی ل سەر ئاستێ‌ هەلبژارتییان زێدە بكەت ئەوا دوهی ب پشكدارییا 16 وەلاتان ل پایتەختێ‌ قەتەر دەوحە هاتییە كرن.
فدراسیۆنا عەرەبی ڕاگەهاند كۆژمەیێ‌ 36.5 ملیۆن دۆلار وەكو خەلات بۆ هەلبژارتیان هاتینە دانان بڤی شێوەیی، قارەمان(7.1) ملیۆن دۆلار، یا دویێ‌(4.2) ملیۆن دۆلار، یا سێیێ‌، (2.8) ملیۆن دۆلار، یا چارێ‌(2.1) ملیۆن دۆلار، بۆ هەر تیمەكا پشكدار(715) هزار دۆلار هاتینە تەرخانكرن، ئەو هەلبژارتیێ‌ دەربازبیتە قووناغا هەشتێ‌ (1.7) ملیۆن دۆلاران وەرگریت.
ئەو 16 هەلبژارتیێن پشكدار بۆ چار كۆمان هاتینە بەلاڤكرن.
كۆما ئێكێ‌: قەتەر، تۆنس، سۆریا، فلەستین.
كۆما دویێ‌: سعۆدیە، مەغرب، (جزرالقمر).
كۆما سێیێ‌: مسر، ئوردن، ئیمارات، كوێت.
كۆما چارێ‌: ئیراق، جەزائیر، بەحرێن، سودان.
بۆ زانین ئەڤرۆ هەلبژارتیێ‌ ئیراقێ‌ دێ‌ یارییا خوە یا ئێكێ‌ بەرانبەر بەحرێنێ‌ كەت ل دەمژمێر 5:30، یارییا دویێ‌ رۆژا ئەینی بەرانبەر سودانێ، یارییا سێیێ‌ سێ شەمبییا بهێت بەرانبەر جەزائیر.

ڕاپۆرتێن رۆژنامەڤانی ل ئسپانیا دەنگۆیێ‌ هەبوونا ئۆفەرەكا گرانبوها ژ یانەیا مانچستەر یۆنایتد یا ئنگلتەرایێ‌ بۆ ستێرێ‌ ڕیال مەدرید یێ‌ ئۆرگۆایی فێدی ڤالڤێردی و ئەڤ ئۆفەرە دبیت زێدەتر لێبهێت.
رۆژنامەیا مۆندۆ دییۆرتیڤۆ ل سەر زاری رۆژنامەیا میرۆر یا بریتانی بەلاڤكرییە كو مانچستەر یۆنایتدێ‌ پەیوەندی ب بریكارێ‌ ڤالڤێردی كرییە و بەرهەڤییا خوە دیاركرینە دگەل مەرجێن گرێدایی هەڤبەستا وی 100 ملیۆن دۆلار وەكو گرێبەست بۆ داناینە دا و دئامادەنە ل ڤەگۆهاستنێن زڤستانێ‌ یان هاڤینێ‌ بەندێن یاسایی یێن هەڤبەستا وی بشكێنن ئەوا هەتا 2029ێ‌ دگەل ریالێ‌ یە.
هەروەسان دیاركر ئەڤ پێنگاڤە هاتییە پشتی بریكارێ‌ ستێرێ‌ ئۆرگۆایی ئاماژە ب هەبوونا حەزا وی بۆ خولا ئنگلتەرایێ‌، لێ‌ دبیت ریال مەدرید ڕازی نەبیت بچیت ژبەركو یاریزانەكێ‌ سەرەكی یە دناڤ تیما شاهان دا.