عه‌یشا عه‌جیب:

قوتابییەکێ پەیمانگەھـێ بۆ ڕۆژنامەیا ئەڤرۆ دیار کر، ئەڤ ئەپلیکێشنە دێ خزمەتەکا مەزن پێشکێشی نەخۆش و نوشداران ب تایبەت ل دەڤەرا مە کەت و گۆت: ب تایبەت چاڤدێریکرنا ڤی جۆرێ نەخۆشیێ پێدڤی ب چاڤدێریه‌كا به‌رده‌وام هه‌یه‌.
ئەمین گوھدار، قوتابییەکێ پەیمانگەھا کومپیۆتەر یا حکومی یە ل قەزا ئاکرێ، د دیدارەکێ دا بۆ ڕۆژنامەیا ئەڤرۆ دیارکر: هزر ژ ژیانا من یا رۆژانە هات، وەک کەسەکێ خودان پێدڤیێن تایبەت، من دیت کو گەلەک ژ کار و ئەرکێن رۆژانە پێدڤی ب ماندووبوونەکا زێدە هەیە کو جاران دبنە ئاستەنگ.
گۆت ژی: من ب فەر دیت ئەپلیکێشنەکێ چێکەم کو تەکنەلۆژیایێ بکاربینیت بۆ ب ساناهیکرنا کاران و کێمکرنا وێ ماندووبوونێ، دا کو بشێم ب سەربەستی و بێ زەحمەتی کارێن خۆ ئەنجام بدەم.
ناڤھاتی د بەردەوامییا ئاخفتنا خۆ دا ئاشکرا ژی کر: ناڤێ ئەپلیکێشنی (Monitoring device Friedreich‌s ataxia) یە. داهێنانا وی د وێ چەندێ دایە کو سیستەمەکێ زیرەک و دیجیتالی دابین دکەت بۆ چاڤدێریکرنا حالەتێن نەخۆشیێ ب شێوەیەکێ دەمی (Real-time)، کو دکەڤیتە خزمەتا وارێ ساخله‌می و تەکنەلۆژیایێ دا ب دیزاینەکێ سەردەمیانە و پرۆفێشنال.
دا زانین ژی كو ئەڤ ئەپلیکێشنە دێ خزمەتەکا مەزن پێشکێشی نەخۆش و نوشداران ل دەڤەرێ کەت، ب تایبەت کو چاڤدێریکرنا ڤی جۆرێ نەخۆشیێ پێدڤی ب چاڤدێریه‌كا به‌رده‌وام هه‌یه‌. گۆتژی: ب ڤی پرۆژەی، مە شیایە ئامرازەکێ تەکنەلۆژیێ پێشکەفتی ب بکارئینانەکا ساناهی بدەینە دەستێ خەلکێ خۆ دا کو ئاستێ چاڤدێرییا ساخله‌میێ ل دەڤەرێ بەرەڤ پێش بچیت و بارێ نەخۆشان سڤك بکەت.
ئه‌مین گوهدار دا دیارکرن ژی: ئەڤ پرۆژەیە ھاتییە دروست کرن بۆ هاریکاریکرنا کەسێن خودان پێدڤیێن تایبەت د دەمێن تەنگاڤییێ دا بۆ نموونە: (دەمێ دکەڤن یان پێدڤی ب هەوار هاتنێ دبن) ئامیرە ژ دو دوگمەیێن سەرەکی پێکدهێت:
١- دوگما سۆر (هەوارکرن): دەمێ زه‌نگ لێددەت و نامەیەکا کورت (SMS) بۆ کەسێ نێزیک دهێتە فرێکرن. د ناڤ نامەیێ دا لۆکەیشن (Location) و لینکێ وێبسایتەکێ هەیە. وێبسایت ژی دیار دکەت کا ئەڤ ئامێرە ڕۆژانە چەند جاران هاتیە بکارئینان.
٢- دوگما ڕەش (هێمنکرن): دەمێ لێدانێ، نامەیەکا دی دچیت بۆ ئاگەهدارکرنێ کو بارودۆخ ھاتبوو سەر ڕێڕەوێ خۆ، کار ب دووماهی هات و پێدڤی ب هاتنا کەسێ دی نینە.
ئەمین ئەو چەندە ژی دیار کر: ئەڤ داهێنانە بەرهەمێ کارەکێ ب کۆم و هاندانا دەوروبەران بوو. ل دەستپێکێ سۆپاسییا خودایێ مەزن و پاشان خێزانێن مە دکەین بۆ پشتەڤانییا وان یا بەردەوام. هەروەسا ئەڤ پرۆژەیە ب هەڤکاری و کارێ پێکڤەیی یێ من و هەڤالێن من (نەرمین حامد و ڕەوان ڕەشاد) هاتیە ئەنجامدان. ل گەل هندێ ژی، ڕێنمایی و پشتەڤانییا مامۆستا و سەرپەرشتێن مە ل پەیمانگێ پالدەرەکێ سەرەکی بوو بۆ سەرکەفتنا مە.
قوتابییێ پەیمانگەھێ گۆت ژی: پلانێن مە ئەون کو ئەڤ ئەپلیکێشنە نەبیتە وێستگەها دووماھییێ. ئەم کار دکەین ژ بۆ داھاتی دا خزمەتگوزاریێن زیرەکییا چێكری (AI) و سیستەمێن پاراستنا داتایان یێن پێشکەفتی بۆ زێدە بکەین، دا کو بشێین ئاستێ تەکنەلۆژی ل دەڤەرێ بلندتر لێ بکەین و خزمەتەکا باشتر پێشکێشی مرۆڤایەتیێ بکەین. لەوڕا داخوازا من ژ حوکمەتا ھەرێمێ و جھێن شولە ژێ ئەوە پشتەڤان و ھاریکاربن ژ بۆ نەخۆشیا من و ھەم ژ بۆ کەسێن خودان پێداویستیێن تایبەت بشێن خزمەتا جڤاکێ خوە بکەین.

پەروین سەلاح:

دبیتە کو گەلەک ژ بکارئینەران ئەڤرۆ ب ئیمەیلێن کەڤن مابن کو ژ نوکە و پێڤە کەسایەتیا وان یا نوکە رەنگڤەدەر ناکەن، ب تایبەت ئەڤێن کو بەری گەلەک سالان هاتینە دروستکرن، لێ دیارە کو کۆمپانیا گۆگلێ دەست ب پێشکێشکرنا چارەسەریەکا گەلەک چاڤەرێکری کریە بۆ بکارئینەرێن “جیمەیلێ”
ئەڤ تایبەتمەندیا نوو رێیێ ددەتە بکارئینەران کو ناڤێ سەرەکی یێ ئیمەیلی (Username) بگوهۆرن، ناڤەکێ نوو یێ پیشەییتر یان گونجایتر هەلبژێرن، ل شوونا بەردەوامیدان ب بکارئینانا ناڤێن کەڤن کو دبیت نها نەگونجای دیاربن، ب گۆرەی راپۆرتەکێ کو مالپەرێ “digitaltrends” بەلاڤکریە.
دێ شێی ڤێ چەندێ ب چەند قۆناغێن سادە ئەنجام دەی، کو دەستپێکێ دێ ئەپلیکەیشنا “جیمەیل” یان مالپەرێ وێ ڤەکەی، پاشی دێ چیە سەر رێکخستنێن ئەکاونتی ب رێیا کلیککرنێ ل سەر وێنەیێ پرۆفایلی و هەلبژارتنا “رێڤەبرنا ئەکاونتێ گۆگل”.
پشتی وێ چەندێ، دێ چیە بەشێ “زانیاریێن کەسی”، پاشی دێ ئیمەیلێ نوکە هەلبژێری، و ژ وێرێ دێ چیە سەر بژارده‌یا “ئیمەیلێ ئەکاونتێ گۆگل”، ل وێرێ دێ شێی رێنمایێن دیاربووی بجهـ بینی ژ بۆ ئەنجامدانا گۆهۆرینێ ب ساناهی.
هەرچەندە ئەڤ قۆناغە گرنگە، لێ نوکە ئەڤ تایبەتمەندیە بتنێ ژ بۆ ژمارەکا کێم یا بکارئینەران ل ناڤ ئەمریکا بەردەستە، بێی دیارکرنا دەمەکێ فەرمی ژ بۆ بەرفرەهکرنا وێ ژ بۆ وەلاتێن دی.
ئەڤ قۆناغە د ناڤ هەولێن “گۆگل” دایە ژ بۆ پەرەپێدانا خزمەتگۆزاریێن خۆ و کرنە وێ ب نەرمتر، ب تایبەت د گەل زێدەبوونا گرنگیا ناسنامەیا دیجیتاڵی د ژیانا رۆژانە و پیشەیی دا.
د دەمەکێ دا کو بکارئینەرێن جیهانێ چاڤەرێی بەلاڤبوونا گشتی یا ڤێ تایبەتمەندیێ نە، ئەڤە گۆهۆرینەکا گرنگە د چاوانیا رێڤەبرنا ئەکاونتێن کەسی دا، و دەرفەتەکێ ددەت ژ بۆ نووکرنا ناسنامەیا دیجیتاڵی ب شێوەیەکێ گونجای دگەل پەرەسەندنا بکارئینەران و پێدڤیێن وان.

سندس سالح سلێڤانەی

١- بەری تو چ ئامیران بکڕی: هندەک گاڤێن سادە هەنە دێ نیشانا وای-فایێ ب هێز کەن، وەک: دانانا راوتەری ل سەنتەرێ خانی، بلندکرنا جهێ وی، و دوورکەفتن ژ ئامیرێن ئەلکترۆنی و دیوارێن ستوور.
٢- کێماسیێن بهێزکەران (Extenders): هەر چەندە ئەڤ ئامیرە ئەرزانن، لێ د سالا ٢٠٢٦ێ دا ب دلێ بکارئینەران نینن چونکی:
– له‌زاتیا ئینتەرنێتێ ب ڕێژەیا ٥٠٪ کێم دکەن.
– تۆرەکا نوو ب ناڤەکێ دی چێدکەن و موبایل ب شێوەیەکێ ئۆتۆماتیکی ناچیتە سەر نیشانا ب هێزتر.
– نە سەقامگیرن و زوو گەرم دبن.
٣- سیستەمێ Mesh Wi-Fi (چارەسەریا سەردەمیانە): ئەڤە پاشەرۆژا ئینتەرنێتێ یە چونکی:
– هەمی خانی دکەتە ئێک ناڤ و ئێک تۆر.
– له‌زاتیا ئینتەرنێتێ وەک خۆ دپارێزیت.
– زۆر ب هێز و جێگیرە، لێ بهایێ وی یێ گرانە (نەخاسما یێن Wi-Fi 7).
٤- ئەنجام و پێشنیار:
– بێهێزکەر (Extender) بکڕە: ئەگەر مالا تە یا بچووک بیت، بودجەیا تە کێم بیت و تەنێ بۆ ژوورەکێ پێدڤی ب نیشانێ بی.
– سیستەمێ Mesh بکڕە: ئەگەر خانیێ تە مەزنە یان چەند نهۆمە، و تو کارێن گران وەک Gaming و 4K دکەی.
– تێبینی: بەری هەر بڕیارەکێ، سیستەمێ (Firmware) راوتەرێ خۆ ئەپدەیت بکە، چونکی دبیت ئاریشا تە ب ڤێ چەندێ چارەسەر ببیت.