دهۆك، دلۆڤان ئاكرەیی:
پەیڤدارێ دەستەیا گەشتوگوزارا حوكمەتا هەرێما كوردستانێ دیاركر، د كابینەیا نەهێ یا حوكمەتا هەرێما كوردستانێ دا ب سەرۆكاتیا مەسرور بارزانی، گرنگیەكا زۆر ب كەرتێ گەشتیاری هاتیە دان و هەژمارەكا پڕۆژەیێن گەشتیاری یێن ستراتیژی هاتینە ڤەكرن و د كابینەیا نەهێ دا 80 پڕۆژەیێن مەزن یێن گەشتیاری هاتینە ئەنجامدان و بووینە ئەگەر زێدەتر ژ 20 هزار دەلیڤەیێن كاری بۆ وەلاتیان پەیدا ببن، دیسا د نوكە دا وان دڤێت ڕێبەرێن گەشتیاری ب شێوەیەكێ فەرمی تۆمار بكەن و دەرفەتا كاری بۆ بڕەخسینن.
ئیبراهیم عەبدولمەجید، پەیڤدارێ دەستەیا گەشتوگوزارا حوكمەتا هەرێما كوردستانێ بۆ رۆژنامەیا ئەڤرۆ گۆت: «زێدەتر ژ سالەكێ یە ئەم كار ل سەر وێ چەندێ دكەین، ڕێبەرێن گەشتیاری ل سەرجەم ڕێڤەبەریان دابنین، پرۆسەیێ دەستپێكریە، مەرجێ سەرەكی بۆ هەموو ڕێبەران ئەو بوو، دەرچوویێن پشكا گەشتوگوزاری بن و ژبلی زمانێ كوردی زمانەكێ دی ژی بزانن، پشتی وەرگرتنا هەموو سیڤیان و دیداركرن ل گەل هەموو وان كەسێن سیڤی هنارتین، مخابن هیچ كەسەكی ئەو مەرجە نەبوون، لەوڕا مە داخواز ژ ڕێڤەبەریان كر، هەر كەسەكێ حەز هەبیت ببیتە ڕێبەرێ گەشتیاری، دەستەیا گەشتوگوزارێ دێ باجەكێ بۆ دروست كەت و دێ دەتە نیاسین و ل سەرجەم بنگەهـ و كۆمپانیێن گەشتیاری كارئاسانی بۆ دهێتە كرن و بزاڤا پەیداكرنا دەرفەتا كاری بۆ دهێتە كرن، كو ب شێوەیەكێ سەربەست كار بكەت».
نيشاندان