سەرۆك بارزانی و شاندەكێ پارێزگەها نەجەف، د دیدارەكێ دا دوپاتی ل سەر پێشئێخستنا پەیوەندییان كر و گەنگەشە ل سەر چەند پرسێن گرنگ د بوارێن ئاڤەدانی و ژینگەهێ دا كرن.
بارەگەهێ بارزانی راگەهاند، ل رۆژا دوشەمبی 18/5/2026ێ، سەرۆك مەسعود بارزانی پێشوازی ل یوسف گەنناوی، پارێزگەرێ نەجەف و ئەندامێن جڤاتا پارێزگەها نەجەف كر.
د دیدارێ دا، ژ بلی باسكرنا رەوشا سیاسی یا ئیراقێ، رۆناهی ل سەر پەیوەندیێن دیرۆكی یێن د ناڤبەرا هەرێما كوردستانێ و پارێزگەها نەجەف هاتە دان، هەروەسا دوپاتی ل سەر بهێزكرنا پەیوەندیێن د ناڤبەرا هەردو ئالییان دا ل بوارێن ئاڤەدانی، ژینگەهێ و بوارێن دی یێن گرنگ هاتە كرن.

د چارچووڤێ سەرەدانا خوە یا فەرمی دا بۆ ڤاتیكانێ، رێزدار نێچیرڤان بارزانی، سەرۆكێ هەرێما كوردستانێ، ل رۆژا دووشەمبی 18/5/2026، ژ ئالیێ قەداسەتا پاپا لیۆیێ چاردێ ڤە هاتە پێشوازیكرن و پاشی كۆمبوونەكا دووقۆلی ئەنجام دان.
سەرۆكاتییا هەرێما كوردستانێ د بەیاننامەیەكێ دا راگەهاند، د كۆمبوونێ دا سەرۆكێ هەرێمێ باسێ رەوشا پێكهاتەیان ل ئیراقێ و هەرێما كوردستانێ كر و دوپاتی ل وێ چەندێ كر كو مەسیحی و هەموو پێكهاتەیێن ئایینی و نەتەوەیی، پشكەكا رەسەن و نەڤەقەتیاینە ژ دیرۆك، كلتۆر و ناسنامەیا نیشتمانییا هەرێما كوردستانێ و ب پێكڤە دێ پاشەڕۆژا وەلاتێ خوە ئاڤا كەن.
نێچیرڤان بارزانی سوپاسییا هەرێما كوردستانێ و ئیراقێ ئاراستەی رۆلێ مەعنەوی و دیرۆكی یێ ڤاتیكانی كر د پێشئێخستنا دیالۆگێ و پێكڤەژیانێ ل جیهانێ دا. هەروەسا ل گەل بلند راگرتنا بیرەوەرییا سەرەدانا دیرۆكی یا پاپا فرانسیسی یێ وەغەركری، ڤەخواندنەكا فەرمی ئاراستەی قەداسەتا پاپا لیۆیێ چاردێ كر دا كو سەرەدانا ئیراقێ و هەرێما كوردستانێ بكەت.
ژ ئالیێ خوە ڤە، قەداسەتا پاپای كەیفخوەشیا خوە ب ڤی دیداری دیار كر و كلتۆرێ لێبۆرینێ، پێكڤەژیانێ و ئێكدو قەبوولكرنێ ل هەرێما كوردستانێ و ئیراقێ بلند هەلسەنگاند. هەروەسا رۆلێ هەرێما كوردستانێ د دابینكرنا پەناگەهـ، پاراستن و دابینكرنا ژیانەكا ئارام بۆ لێقەومیایان و مەسیحییان د قۆناغێن دژوار دا، بلند نرخاند.
كۆمبوون ل گەل سەرۆك وەزیرێن ڤاتیكانێ
د بەردەوامییا دیدارێن خوە دا ل ڤاتیكانێ، نێچیرڤان بارزانی، سەرۆكێ هەرێما كوردستانێ ل گەل كاردینال پیێترۆ پارۆلین، سەرۆك وەزیرێن ڤاتیكانێ كۆمبوو. د ڤێ كۆمبوونێ دا، پێشئێخستنا پەیوەندیێن هەرێما كوردستانێ و ئیراقێ ل گەل ڤاتیكانێ، بارودۆخێ سیاسی و ئەمنییێ ئیراقێ و رەوشا پێكهاتەیێن ئایینی و نەتەوەیی هاتنە گەنگەشەكرن.
سەرۆك وەزیرێن ڤاتیكانێ پێگەهێ هەرێما كوردستانێ وەك نموونەیەكا زیندی و سەركەفتی یا پێكڤەژیانا ئاشتییانە یا ئایین و پێكهاتەیێن جودا ل دەڤەرێ بلند هەلسەنگاند و هەردو ئالییان دوپاتی ل سەر گرنگییا بەردەوامییا دانوستاندنان و ب هێزكرنا بهایێن پێكڤەژیانێ كر.
د تەوەرەكێ دی یێ هەردو كۆمبوونان دا، دووماهی پێشهاتێن رەوشا گشتی یا دەڤەرێ و كارتێكرنێن مرۆڤی یێن گرژی و ئالۆزییان هاتنە گەنگەشەكرن و هەڤڕا بوون ل سەر پێدڤییا پاراستنا ئاشتیێ و ئارامیێ بۆ هەموو مرۆڤایەتیێ.

حوكمەتا هەرێما كوردستانێ د بەیاننامەیەكێ دا راگەهاند، ل رۆژا دوشەمبی 18/5/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل سەلاحەدین بەهائەدین، ئەمینداری گشتیێ ئێكگرتوویا ئیسلامییا كوردستانی كر.
د وێ كۆمبوونێ دا، رەوشا گشتی یا هەرێما كوردستانێ، ئیراقێ و دەڤەرێ هاتە گەنگەشەكرن.
هەروەسا د بەیاننامەیا حوكمەتا هەرێمێ دا هاتییە، هەردو ئالییان دوپاتی ل سەر گرنگییا كاراكرنا پەرلەمانێ كوردستانێ و دەزگەهێن یاسایی و دەستووری یێن هەرێما كوردستانێ كر.

مەسرور بارزانی، سەرۆكێ حوكمەتا هەرێما كوردستانێ، پێشوازی ل یوسف مەكی گەنناوی، پارێزگەرـێ نەجەف و شاندەكێ دگەل وی دا كر.
ل گۆرەی بەیاننامەیەكا حوكمەتا هەرێما كوردستانێ، د ڤی دیداری دا، سەرۆكێ حوكمەتا هەرێما كوردستانێ بەرهەڤییا حوكمەتا هەرێمێ بۆ پێشڤەبرنا هەڤكاری و هەماهەنگیێ د ناڤبەرا هەرێما كوردستانێ و پارێزگەرێن ئیراقێ دا، ب تایبەتی نەجەف، د بوارێن جودا جودا دا دیار كر.
هەروەك د بەیاننامەیێ دا هاتی، پارێزگەرێ نەجەف ئاماژە ب مەرەما سەرەدانا خوە یا بۆ پایتەختێ هەرێما كوردستانێ كر، كو ئارمانج ژ وێ پێشئێخستنا پەیوەندیێن دو قۆلی و مفا وەرگرتنە ژ چاكسازی و ئەزموونا سەركەفتی یا حوكمەتا هەرێمێ د كەرتێن جودا دا، ب تایبەتی د بوارێ ب دیجیتالكرنا خزمەتگوزاریێن گشتی دا.

هەولێر، قائید میرۆ

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، بەری راگەهاندنا كابینەیا عەلی ئەلزەیدی، پارتی دیموكراتی كوردستان كاخەزەك پێشكەشی چارچوڤەیا هەماهەنگییا شیعەیان كربوو و هەموو خالێن د ناڤا كاخەزا پارتی دا هاتینە پەسەندكرن. ئەشواق جاف، ئەنداما جڤاتا نوونەرێن ئیراقێ ژ فراكسیۆنا پارتی بۆ رۆژنامەیا (ئەڤرۆ) گوت»مە تێبینی ل سەر كارنامەیا حوكمەتا ئیراقێ یا نوو هەنە و مە ئەو تێبینی پێشكێشی لیژنەیا بەرهەڤكرنا كارنامەیێ كرینە بۆ راستڤەكرنێ».
ئەشواق جاف، زێدەتر گۆت «پشتی كارنامەیا حوكمەتا عەلی ئەلزەیدی گەهشتییە دەستێ مە، ژ ئالیێ فراكسیۆنا پارتی ڤە ب هووری پێداچوون بۆ هاتییەكرن. هندەك تێبینیێن مە ل سەر كارنامەیێ هەبوون و پێشكێشی وێ لیژنەیێ هاتینە كرن. تێبینیێن پارتی ل دۆر كارنامەیا حوكمەتێ ب گرنگی هاتنە وەرگرتن».
دیاركر ژی» پارتیكاخەزەك بەرهەڤ كربوو كو ژ ئالیێ سەرۆك بارزانی ڤە هاتبوو پەسەندكرن. پارتی پێشنیازێن خوە پێشكێشی چارچوڤەیا هەماهەنگی كرن و هەموو خالێن گرێدای هەرێما كوردستانێ و قەوارەیێ هەرێمێ و ئەو قانوونێن پێدڤییە بهێنە دەركرن، ژ گەرەنتیكرنا مافێن هێزێن پێشمەرگەی بگرە هەتا هەموو مافێن فەرمانبەران تێدا هاتینە بنەجهكرن؛ بۆ نموونە پێگیریكرن ب دەستووری و بجهئینانا مادەیا 140 و پشكا بودجەیا هەرێمێ و چەندین داخوازیێن دی د ناڤا تێبینیێن پارتی دا بوون. چارچۆڤەیا هەماهەنگیێ هەموو ئەو خالێن پارتی پەسەند كرینە و هەموو داخوازیێن پارتی د چارچوڤێ دەستوورێ دا بوون».
ناڤبری ئەوژی گۆت «ئەم ل هیڤیێ نە ل كابینەیا نوو هەموو ئەو خالێن پارتی پێشنیاز كرین بهێنە بجهئینان، چونكە كورد و هەرێما كوردستانێ بەردەوام پشكەك بووینە ژ ئاشتیێ ل گەل ئیراقێ. مە وەك فراكسیۆنا پارتی دیموكراتی كوردستان هەموو تشتەك ب زەلالی پێشكێشی چارچوڤەیا هەماهەنگی و عەلی ئەلزەیدی كریە. هیڤیدارین ڤێجارێ پێگیریێ ب دەستووری بكەن، چونكە هەموو داخوازیێن پارتی دەستووری نە و بۆ خزمەتا خەلكێ كوردستانێ نە. راستە كابینە ژ ئالیێ جڤاتا نوونەران ڤە باوەری پێ هاتییەدان، بەلێ ئەو وەزیرێن ماین و هەتا نوكە باوەری وەرنەگرتی، پشتی جەژنێ دێ دوبارە جڤاتا نوونەران كۆمبیت و هەموو وەزارەتێن دی یێن باوەری پێ نەهاتییەدان، دێ ئەو ژی هێنە پڕكرن».

رۆژنامەیا «نیویۆرك تایمز» بەلاڤكریە كو ئیسرائیل پتر ژ سالەكێ دەرباز كریە بۆ بەرهەڤكرنا جهەكێ نهێنی د ناڤ ئاخا ئیراقێ دا ب مەرەما بكارئینانێ د ئۆپەراسیۆنێن دژی ئیرانێ دا، هەڤدەم بەرپرسێن ئیراقی ژی پاشتر هەبوونا بنگەهێ سەربازیێ ئیسرائیلی یێ دوویێ ل بیابانێن رۆژئاڤایێ وەلاتی پشتڕاست كریە.
رۆژا ئێكەشەمبی 16ێ گولانا 2026، رۆژنامەیا «نیویۆرك تایمز» ئاماژە ب روودانەكا رۆژا 3ێ ئادارێ كریە، دەمێ بارهەلگرەك كو شڤانەكێ دەڤەرێ دهاژۆت و بەرەڤ باژێڕكێ «نوخەیب» دچوو، ژ هەلیكۆپتەرەك كەفتە دووڤ و چەندین جاران گولە لێ هاتنە تەقاندن هەتا كو د ناڤەڕاستا لمێ دا هاتیە راوەستاندن و سووتی.
ل دووڤ راپۆرتا نیویۆرك تایمزێ، ئەڤ هێرشە پشتی هندێ هاتییە كو «عەواد شەمەری» یێ 29 سالی، د دەمێ گەشتەكا خوە دا ب رێكەفت تووشی بنگەهەكێ سەربازی یێ نهێنی یێ ئیسرائیلێ بوویە. خێزانا وی دبێژن كو عەوادی پەیوەندی ب فەرماندەیا سەربازی یا ئیراقێ كربوو دا كو وان ئاگەهدار بكەت ل سەر وان سەرباز و هەلیكۆپتەر و خێڤەتێن نێزیك وی بنگەهێ ئیسرائیلی دیتین، لێ ئەڤ دیتنە بوویە ئەگەرێ ژ دەستدانا ژیانا وی.
نیویۆرك تایمزێ باسێ هندێ ژی كریە كو بەری نوكە رۆژنامەیا «ووۆل ستریت جورنال» هەبوونا بنگەهەكێ ئیسرائیلی ل ئیراقێ ئاشكەرا كربوو، لێ نوكە بەرپرسێن ئیراقی هەبوونا بنگەهێ دوویێ یێ رانەگەهاندی ل بیابانێن رۆژئاڤایێ ئیراقێ پشتڕاست كریە.