د چارچۆڤێ سەرەدانا خۆ یا فەرمی دا بۆ ئەلمانیا فیدرال، د. عەلی تەتەر، پارێزگارێ دهۆكێ ل رۆژا 29/6/2029 ژ لایێ فلوریان هاسلەر، وەزیرێ ئێكێ یێ هەرێما بادن ڤورتەمبێرگ كو بەرپرسێ دیسكا بازرگانی یە ژی هاتە پێشوازیكرن.
د هەڤدیتنەكێ دا ب هەلكەفتا دووبارە هەلبژارتنا وان وەكو وەزیرێ ئێكێ یێ نوو و بەرپرسێ دیسكا بازرگانی، پیروزباهی لێ كر و هیڤیا سەركەفتنێ بۆ خواست، پاشی هەدولایان جەخت لسەر خۆرتكرنا پەیوەندیێن د ناڤبەرا هەرێما كوردستانێ و ئەلمانیا فیدرال دا ب گشتی و پارێزگەها دهۆكێ و بەردەوامیا پەیوەندیان ل گەل هەرێما ناڤبری د بیاڤێن ئابووری، وەبەرهێنان، چاندن، ساخلەمی و خواندنا بلند و پرسێن مرۆڤایەتی كر.
دیسا هەر ل هەمان رۆژا 29/6/2026 د. عەلی تەتەر، پارێزگارێ‌ دهۆكێ‌ ژ لایێ جەم ئۆزدەمیر، سەرۆكوەزیرێن ویلایەتا بادن ڤورتەمبێرگ یا كۆمارا فیدرال یا ئەلمانیا ڤە هاتە پێشوازیكرن.
د رونشتنەكێ دا پارێزگارێ دهۆكێ‌ سلاڤێن «سەرۆك بارزانی» و «مەسرور بارزانی» سەرۆكێ حكومەتا هەرێما كوردستانێ گەهاندنێ‌ و ب هەلكەفتا دەست بكاربوونا وان وەكو سەرۆكوەزیرێ نوو‌ پیرۆزباهی لێ كر و هیڤیا سەركەفتنێ بۆ خواست.
ژ لایێ خۆڤە جەم ئۆزدەمیر، سەرۆكوەزیرێن ویلایەتا بادن ڤورتەمبێرگ سلاڤ و بۆ «سەرۆك بارزانی» و « مەسرور بارزانی» هنارتن و جەخت لسەر خۆرتكرنا پەیوەندیێن د ناڤبەرا هەرێما كوردستانێ و ئەلمانیا فیدرال دا ب گشتی و پارێزگەها دهۆكێ و بەردەوامیا پەیوەندی و هاریكاری و دەستەخووشكاتیا هەرێما ناڤبری ل گەل پارێزگەها دهۆكێ د بیاڤێن ئابووری، وەبەرهێنان، چاندن، ساخلەمی و خواندنا بلند و پرسێن مرۆڤایەتی دا كر.

دهۆك، دلۆڤان ئاكرەیی:

وەزیرێ ساخلەمیێ‌ ل حوكمەتا هەرێما كوردستانێ دیار كر، وان ل گەل بەغدا گەنگەشە ل سەر بابەتێن كارگێڕی، یاسایی، پێدڤیێن دەرمان و نۆشداری، پرسا ئاوارە و پەنابەران كریە، هەروەسا باس ل هەژماركرنا پارێزگەها هەلەبجە وەكو چوارەمین پارێزگەها هەرێمێ بۆ دابینكرنا هەمی پێدڤیێن وێ یێن ساخلەمیێ هاتیە كرن، ل گەل شایستەیێن دارایی یێن هەرێمێ د پڕۆژەیاسایا بودجەیا ئیراقێ دا، كو پێدڤیێن دەرمانان، ئامیرێن نۆشداری، پڕۆژەیێن نیشتمانی و قەر و بەخشینێن نێڤدەولەتی بخۆ ڤە دگریت.
دكتۆر سامان بەرزنجی، وەزیرێ ساخلەمیا هەرێما كوردستانێ بۆ رۆژنامەیا ئەڤرۆ گۆت: «وەزیرێ ساخلەمیا ئیراقێ سۆز دایە، جوداهیێ‌ د ناڤبەرا وەلاتیێن هەرێما كوردستانێ و ئیراقێ دا نەكەت، ئەو بڕگەیێن پەیوەندیا ڕاستەوخۆ ب وەزارەتا وی ڤە هەی، دێ بجه ئینیت، و یێن دی ژی دێ ئێخیتە د كارنامەیا جڤاتا وەزیرێن ئیراقێ دا».
گۆت ژی: «ئەم دێ‌ هەماهەنگیێن زێدەتر ل گەل وان كەین ل دۆر ئینان و هنارتنا دەرمانان و ئێكخستنا ڕێنمایێن چارەسەركرنا پەنجەشێرێ‌«.

د. سالا عوسمان، بەرپرسێ‌ پشكا رەوشەنبیری و راگەهاندنا پ. د. ك، وەكو نوونەرێ‌ هەرێما كوردستانێ‌ ل رۆژێن ئێكشەمبی و دوشەمبی 28 و 29/6/2026 ل باژێڕێ‌ ئامەدێ‌ یێ‌ باكوورێ‌ كوردستانێ‌ پشكداری د كۆنفرانسەكێ‌ تایبەت دا كر، كو ب مەرەما بیرئینانا (101)ەمین سالیا سێدارەدانا (شێخ سەعیدێ‌ پران) و هەڤالێن وی هاتبوو رێكخستن.
كۆنفرانس ل كۆشكا مێژوویی یا (ئیسكەندەر پاشا) ل ناوچەیا سوورا ئامەدێ‌، ژ لایێ‌ (كۆمسیۆنا دەستپێشخەریا كۆنفرانسێ ئێكەتیا نەتەوەییا باكوورێ كوردستانێ‌ پێل‌ كورد، پارتیا سۆسیالیستا كوردستانێ‌ PSK، پارتیا وەلاتپارێزێن كوردستانێ‌ PWK، بزاڤا ڤەژین و چەندین كەسایەتیێن سەربخۆ هاتبوو رێكخستن).
د. سالار عوسمان، د كۆنفرانسی دا گۆتارەك پێشكێش كر و تێدا جەخت ل وێ‌ چەندێ‌ كر كو پێدڤیە گەنج ڤەكۆلینان ل وان مێژوویان بكەن و ئەو بابەتێن ئەكادیمی بێخنە د ناڤ ڤەكۆلینێن زانستی دا، هەروەسا ئاماژەی ب وێ‌ چەندێ‌ كر، كو پێدڤیە بەردەوام مفا و وانەیان بۆ خۆ ژ وان مێژوویێن خۆ وەربگرین، كو شانازییەكا مەزنا نەتەوەییە.
دیسا د كۆنفرانسی دا، هەر ئێك ژ ڤەكۆلەر و نڤیسەر (سەعید ڤەرۆژ) (مەحموود فەوزی فورات) بەرەبابێن شێخ سەعیدێ پیران، و نڤیسەر (ئەی. ناسر سۆنمەز) گۆتارێن خۆ پێشكێشكرن و ب هووری تیش ئێخستە سەر ژیان و سەركردایەتیكرنا شێخ سەعیدێ پیران.
ل رۆژا دوشەمبی 29/6/2026 ل باژێڕێ‌ ئامەدێ‌، ب مەرەما بلندڕاگرتنا هەلكەفتا شەهیدبوونا (شێخ سەعیدێ پیران و هەڤالێن وی)، هەژمارەیەكا چالاكیان ل بارەگەهێ‌ (كۆمەلەیا شێخ سەعید) و پانێلەكێ بەرفرەه ب ڕێڤەچوون.
دیسا ل ئێڤاریا هەمان رۆژ، ل هۆلا كۆنفرانسا یا (تاهر ئەلچی) ل سەندیكایا پارێزەرێن ئامەدێ‌، پانێلەكێ بەرفرەه بۆ (بیرئینانا شێخ سەعیدێ پیران و هەڤالێن وی ل كوردستان)ێ‌ هاتە سازكرن.
د. سالار عوسمان، بەرپرسێ بەشێ ڕەوشەنبیری و ڕاگەهاندنا پ. د. ك وەكو پانێلیست پشكداری د پانێلی دا كر و بابەتەك پێشكێش كر و تێدا ب هووری تیشك ئێخستە سەر قووناغێن جودا یێن خەبات و مێژوویا پڕ قوربانیدانا نەوەیی یا كوردی، ب تایبەت شۆڕەشا (شێخ سەعیدێ‌ پران)، دیسا ب ئومێد ڤە باس ل قووناغا داهاتی كر و گۆت: «هەرێما كوردستانێ‌ دەستكەفتێ‌ هەموو كوردانە و پێدڤییە ئەم هەموو بپارێزین، هەردەم سەرۆك بارزانی جەخت ل ئێكڕێزیا هەموو كوردان دكەت و جەخت ل پاراستنا ئەزموونا مە دكەت».

رەمەزان زەكەریا:

ب فەرمانا سەرۆكێ حوكمەتا هەرێما كوردستانێ لەز د كارێن پڕۆژەیێ ستراتیژی یێ ئاڤا ئاكرێ دا دهێتە كرن، ڕێژەیا تەمامبوونا پڕۆژەی گەهشتییە 70% و ئەگەر ئاڕێشەیا دارایی چێ نەبیت، هەتا دەستپێكا سالا بهێت پڕۆژە دێ كـەڤیتە د خزمەتا وەلاتیان دا.
ئەندازیار زرار ئەحمەد، ڕێڤەبەرێ ئاڤا ئاكرێ بۆ ئەڤرۆ گۆت: «كاركرن لسەر پڕۆژەیێ ستراتیژی یێ ئاڤا ئاكرێ بەردەوامە، بەلێ نوكە ب فەرمانا سەرۆكێ حكومەتا هەرێما كوردستانێ كار هەڤبەركرن ل گەل بەری نوكە گەلەك بلەزتر بڕێڤە دچن، د نوكە دا تیما ئەندازیاری و تەكنیكی مژوولی دانانا بۆڕیان و پەنەلێن كارەبا پڕۆژەی نە».
ناڤبری گۆت ژی: «بودجەیێ تەرخانكری بۆ ڤی پڕۆژەی 109 ملیار دینارن، ب تەمامبوونا پڕۆژەی سەنتەرێ ئاكرێ و ناوچەداریا بجیلێ‌ و پتر ژ 20 گوندێن دەوروبەر دێ بنە مفادارێن سەرەكی و ئاڕێشەیا كێمئاڤییێ ل سەرانسەری دەڤەرێ دێ ب شێوەیەكێ بنەرەتی چارەسەر بیت».

هەولێر، قائید میرۆ:

پەیڤدارێ بازاڕێ پارە گوهۆڕێن هەولێرێ ئاشكرا كر، دەستەسەركرنا بەرپرسێن گەندەل یێن ئیراقی كاریگەری لسەر بلندبوونا بهایێ دینارێ‌ ئیراقی پەیداكریە و چەند رۆژە بهایێ دینارێ‌ ئیراقی هەمبەر دۆلارێ ئەمریكی بلندبوویە.
كەیفی خۆشناو، پەیڤدارێ بازاڕێ پارە گوهۆران ل هەولێرێ بۆ رۆژناما ئەڤرۆ دیاركر، بەری هەوا دەستەسەركرنا بەرپرسێن گەندەل ل ئیراقێ بهێتە ئەنجامدان، پارەیەكێ زۆر رۆژانە دهاتە بازاڕی و بەرپرسێن ئیراقی پارەیێ دزی ل بازاڕی ساخ دكر، بەلێ نوكە هاتنا پارەیێ زۆر بۆ بازاڕی كێم بوویە و كاریگەری پەیداكرینە، ئەڤێ چەندێ ژی رەنگڤەدان لسەر بازاڕی و بهایێ دینارێ‌ ئیراقی هەمبەر دۆلارێ ئەمریكی هەبوویە.
كەیفی خۆشناو گۆت: «دەستەسەركرنا بەرپرسێن گەندەل، كارتێكرن لسەر بازاڕێ پارەیێ ئیراقی پەیداكریە و نوكە بهایێ دراڤێ ئیراقی هەمبەر دۆلارێ ئەمریكی بلندبوویە، لەوڕا ژی چەند رۆژەكە بهایێ دۆلاری هەمبەر دینارێ‌ ئیراقی داكەفتیە، بەلێ رۆژێن داهاتی دیار نینە دێ چەند كاریگەریێن دی هەبن».