چاڤەڕێ دهێتە كرن ئەڤرۆ د شەڤبیریەكا ئاگرین دا دەست ب هەڤڕكیێن گەڕا دویێ هاتن و ئێكلاكەر ب ئەنجامدانا چار یارییان ژ قووناغا 16ێ یا قارەمانییا یانەیێن ئۆرۆپا قارەمانێن خولا چامپیۆنز لیگ بۆ یارییا فوتبۆلێ ب درۆشمێن جودا بهێنە ئەنجامدان.
گۆپیتكا دیداران
جەماوەر و پشتەڤانێن وەرزشی ب گشتی و یێن یارییا فوتبۆلێ ب تایبەتی دێ چاڤەڕێ دیدارا ئاگرین بن ئەوا دێ یانەیا مانچستەر ستی یا ئنگلتەرایێ ل یاریگەها خوە ئیتحاد یانەیا ڕیال مەدرید یا ئسپانی ل دەمژمێر 11ێ شەڤ مێڤانكەت ب دروشمێ ڕیمۆنتادا ژبۆ سەركەڤتنێ و ب دەستڤەئینانا پلێتا قووناغا هەشتێ، سەرباری ئەركێ وێ بەرانبەر یانەیا ڕیالێ ب سانەهی نابیت ئەوا د یارییا ئێكێ یا ڤێ قووناغێ ل حەفتییا بۆری شیابوو ب سێ گۆلێن پاقژ پێنگاڤەكا باش پاڤێژیت.
مان ستی پێدڤی ب چار گۆلێن یاقژە هەتا بشێت دەربازبیت و دێ هەموو بزاڤا كەت ئەنجامێ وەرزێ 2023 دوبارەبكەت ئەوا د قووناغ پێش دووماهیێ دا ل یاریگەها خوە 4-چنە سەركەڤتن ئینایی، لێ ڕیال ژی ڤێ دەلیڤێ ژ دەست نادەت و دێ شەری كەت كو گۆل لسەر نەهێنە تۆماركرن، دیدارێن ئاگرین داناڤبەرا واندا گەهشتینە 16 یارییان، حەفت سەركەڤتن بۆ ریالێ و شەش بۆ مان ستی و سێ وەكهەڤی بوون.
ڕیمۆنتادا و حسابەتێن ئالۆز
ئێك ژ یاریێن دی یێن بهێز ئەوێن جەماوەرێ وەرزشی چاڤەڕێ ل دەمژمێر 11ێ شەڤ هێتە كرن یانەیا چێلسی یا ئنگلتەرایێ دێ ل یاریگەها خوە یانەیا پاریس سانجێرمان یا فرەنسی مێڤانكەت، د یارییا ئێكێ یا ڤێ قووناغێ دا یانەیا فرەنسی ل یاریگەها خوە ب 5-2 گۆلان سەركەڤتنەكا مەزن ل سەر یانەیا ئنگلتەرایێ ئینابوو و پشكەكا مەزن یا پلێتا دەربازبوونێ وەرگرت لەوما ژی چێلسی پێدڤی ب ڕیمۆنتادایێ یە سەرباری حساباتێن ئالۆز هەنە، ژبەركو سیستەمێ گۆل ل یاریگەها مێڤان وەكو باشترین نا هێتە هژمارتن بەلكو وەكو خوە مینیت.
چێلسی خودانا هەلگرا دو ناسناڤایە د بەرانبەردا یانەیا فرەنسی ل وەرزێ بۆری ببوو قارەمان، هەرچەندە د دیدارێن دیرۆكی دا ڕێژەیا ئەنجامان تا ڕادەیەكێ وەكو ئێك بووینە، د 10 دیدارێن پێشتر چار سەركەڤتن بۆ پاریسێ و سێ بۆ چێلسی و بۆ هەر یانەیەكێ سێ وەكهەڤی هاتینە.
فیركا دادڤانی دێ پلێتێ ئێكلاكەت
یارییا سێیێ یا ئەڤ شەڤە كو دهێتە هژمارتن ئاگرین یانەیا ئارسنال یا ئنگلتەرایێ دێ ل یاریگەها خوە یانەیا بایر لیڤەركۆزن یا ئەلمانی ل دەمژمێر 11ێ شەڤ مێڤان كەت، د یارییا گەڕا ئێكێ یا حەفتییا بۆری هەردو تیم ب وەكهەڤی 1-1 یاری ب دووماهی ئینابوو، یارییا ئەڤ شەڤە دبیت پێشبینی بهێتە كرن یانەیا ئنگلتەرایێ بشێت سەركەڤتنێ بینیت ئەوا د دەمەكێ
بتنێ ئێك جاربوویە ئەوژی یارییەكا هەڤالینی بوو بەری دو سالا ئەوا ب4-1 ل ئنگلتەرایێ ب سەركەڤتنا ئارسنال ب دووماهی هاتبوو، لێ یارییا ئەڤ شەڤە دبیت پێشبینییا سەركەڤتنێ بۆ ئارسنال بیت ئەوا د دەمەكێ خۆش دا دەرباز دكەت تایبەت خودانا سەرێ لیستا خولا ئنگلتەرایێ یە ب جووداهییەكا باش، لێ بایرلیڤەركۆزن ژی پاریەكێ ب سانەهی نابیت و دێ شەڕێ پلێتێ كەت.
دیدارا هەسپێن ڕەش
یارییا چارێ یا ئەڤ شەڤە كو دبیتە بەری هەرسێ یاریێن دی هێتە كرن یانەیا سپۆرتینگ لەشبۆنە یا پۆرۆتۆگالی دێ یانەیا بۆدۆ جلیمینت یا نەرویجی ل دەمژمێر 8:45 شەڤ مێڤان كەت، یارییا ئێكێ یا ڤێ قووناغێ ئەوا ل یاریگەها بۆدۆ هاتیە كرن شیابوو ب سێ گۆلێن پاقژ سەركەڤتنێ بینیت و هیڤیێن دەربازبوونێ بۆ قووناغا هەشتێ گەش بكەت، لێ یانەیا پۆرتۆگالی ژی خۆ پاشڤە نابیت و دێ شەڕی بۆ سەركەڤتنێ كەت سەرباری ئەركێ وێ یێ ب زەحمەت، هەردو یانە د چامپیۆنزا ئەڤ سالە دا هاتینە هژمارتن هەسپێن ڕەش.
مان ستی، چێلسی چاڤ ل ڕیمۆنتادایە و ریال، ئارسنال و پاریس سانجێرمان بو دۆپاتكرنا سەركەڤتنێ دێ شەڕێ دەربازبوونێ كەن
نيشاندان