ب ئامادەبوونا د. سالار عوسمان، بەرپرسێ‌ پشكا رەوشەنبیری و راگەهاندنا پارتی و هەژمارەكا فەرماندە و پێشمەرگە و رەوشەنبیر و نڤیسەر و رۆژنامەڤانان، دوهی 8/2/2026 پرتووكا (ژ رههەلكێشانا ئەفسانەیا خەلافەتا هۆڤانە) یا نڤیسەر لیوا بەهجەت سێلكی هاتە نیاسین.
د. سالار عوسمان، بەرپرسێ‌ پشكا رەوشەنبیری و راگەهاندنا پارتی د پەیڤەكێ‌ دا دیار كر، پێشمەگەهێن قارەمانێن كوردستانێ‌ ب رێبەریا سەرۆك بارزانی ب مەزنی چوونە ناڤ مێژوویێ‌ و داستانێن وان بوونە جهێ‌ شانازیێ‌ و ئەڤان پێشمەرگەیان د شەڕێ‌ داعشێ‌ دا، ئەفسانەیا ئەڤێ‌ رێكخراوێ‌ تێكشكاند.
دیسا لیوا بەهجەت سێلكی د پەیڤەكێ‌ دا باس ل هزرا نڤیسینا پرتووكێ‌ كر و سوپاسیا پشكا رەوشەنبیری و راگەهاندنا پارتی كر بۆ ئەركێ‌ چاپكرن و بەلاڤكرن و دانەنیاسینا پرتووكا وی و پرتووك ل سەر ئامادەبوویان هاتە بەلاڤكرن.

رەمەزان زەكەریا:

دەڤەردارێ ئاكرێ ب توندی هەر جۆرە هێرشەكا ل سەر نۆشدار و كارمەندێن ساخلەمیێ دكەت و دبێژیت: ب چو رەنگەكی ئەڤ كارە ناهێنە قەبوولكرن و یاسا دێ ڕێكارێن توند بەرامبەر تۆمەتباران وەرگریت.
د. دلاوەر بۆزۆ مكائیل، دەڤەردارێ ئاكرێ د كۆنگرەكێ رۆژنامەڤانی دا ب ئامادەبوونا سەرۆكێ تایێ دهۆك یێ سەندیكا نۆشداران و ڕێڤەبەرێ ساخلەمیا ئاكرێ ڕاگەهاند: ئەو كەیسێ ل نەخۆشخانەیا گولان روودای، ب فەرمی گەهشتییە دادگەهێ، نۆشدار و كارمەندێن ساخلەمیێ د ئەركەكێ پیرۆز دانە و ب چو ڕەنگان ڕێ ناهێتەدان بێ ڕێزی یان هێرش ل سەر وان بهێتە كرن.
دەڤەردارێ ئاكرێ گۆت: «مە وەكو لایەنێن پەیوەندیدار ب چو رەنگان ئاسانكاری بۆ ڤان جۆرە تاوانان نەكریە و ناكەین، هەر كەسەكێ هێرشی كارمەندێن كەرتێ گشتی بكەت د دەمێ دەوامێ دا، دێ ب ڕێكا دادگەهێ هێتە سزادان، داكو ببیتە وانە بۆ هەر كەسەكێ دی یێ هەمان هزر هەبیت».
ئەڤ هەلویستە پشتی وێ چەندێ دهێت كو ل چەند ڕۆژێن بۆری ل نەخۆشخانەیا گولان یا ئاكرێ، بێ ڕێزی بەرانبەر كارمەندێن ساخلەمیێ هاتبوو كرن.

د. عەلی تەتەر، پارێزگارێ دهۆكێ دوهی 8/2/2026 پێشوازی ل برێجیش كۆمار، قونسلێ وەلاتێ هندستانێ ل هەولێرێ و شاندێ د گەل دا كر.
د هەڤدیتنەكێ دا بەحسێ رەوشا پارێزگەهێ و پەیوەندیێن دێرین د ناڤبەرا كوردستانێ و هندستانێ دا و چاوانیا خورتكرن و لێكگوهۆڕینا پەیوەندیێن ئابۆری و بازرگانی و كلتۆری و پەروەردەیی و زانستی و گەشتیاری و ساخلەمیێ‌ ب گشتی هاتە كرن.
پارێزگارێ دهۆكێ‌ دوپاتكر كو پەیوەندیێن گەلێ كورد ل گەل گەلێ هندستانێ زۆر دكەڤن و دیرۆكی نە، ل ڤان سالێن دووماهیێ ئەڤ پەیوەندیە د هەموو بیاڤان دا پتر بەرفرەهبووینە و گۆت: «ئەم دخوازین كۆمپانی و وەبەرهێنەرێن هندستانێ قەستا هەرێمێ بكەن و پڕۆژەیێن ئابۆری و بارزگانی و گەشتیاری و ساخلەمی و زانستی ل دەڤەرێ ئەنجام بدەن و پشتەڤانیا پارێزگەهێ بۆ هەر ئاسانكاریەكێ دیاركر».
ژ لایێ خۆ ڤە قونسلێ هندستانێ ل كوردستانێ خۆشحالیا خۆ ب هەبوونا پەیوەندیێن ب هێز د ناڤبەرا هەردو وەلاتان دا دیاركر و دوپاتكر كو دێ بزاڤێ‌ كەن ئاستێ تێكهەلیێن خۆ د هەموو بیاڤان دا پێشبێخن.

ئامێدیێ، مەحمودنهێلی:

هەژمارەكا وەلاتیێن ئاكنجی ل ناوچەداریا سەرسنكێ خرڤەبوونەك ئەنجام دا و دڤێن داخوازیێن خوە بگەهیننە لایەنێن پەیوندیدار و دبێژن: كەسێن زەنگین ئەردێن سەرسنكێ هەموو تابۆكرینە و ناهێلن خانی بهێنە ئاڤاكرن و دەست ب سەر ئەردی دا گرتیە.
ئێك ژ خرڤەبوویان دیار كر، هندەك كەسێن خودان شیان دەست دانایە سەر كانیكا گوندێ سەرسنكێ و ئاڤا وێ بریە سەر مەزرەعا و ئاڤا ڤەخوارنێ بۆ مە ل دێرەلۆكێ ئینایە و بۆ مە هەموویان نەخۆشیا گلچیسكان چێبوویە.
وەلاتی داخواز دكەن لژنەكا بلند بهێتە پێكئینان و دووڤچوونا ئەردێن سەرسنكێ بكەت و حكومەت بهێتە سەر خەت و ئاریشەیێن وانا بهێنە چارەسەكرن.

دهۆك، دلۆڤان ئاكرەیی:

رێڤەبەرێن گشتی یێن وەبەرهێنانێ و گەشتوگوزارێ‌ ل دهۆكێ و سەرۆك پشكێن هەردو رێڤەبەریێن گشتی كۆمبوونەكا بەرفرەهـ ل سەر پێشئێخستنا كەرتێ گەشتیاری و وەبەرهێنانێ ل پارێزگەها دهۆكێ سازكر.
دكتۆر هەڤال ئیسماعیل، رێڤەبەرێ گشتی یێ وەبەرهێنانێ بۆ رۆژنامەیا ئەڤرۆ گۆت: «مە د كۆمبوونێ دا دوپاتی ل سەر كاركرنێ ل سەر وێ ماستەرپلانا بۆ چیایێ زاوا كر، كو بەری نوكە بۆ هاتییە دانان بۆ چاوانیا پێشئێخستنا ڤی چیایی ژ لایێ وەبەرهێنانا گەشتیاری ڤە، دیسا بجهئینانا ماستەرپلانا بەنداڤا خنس و ئاڤاكرنا پڕۆژەیێن گەشتیاری ل دەوروبەرێن وێ، دیسا گرنگیەكا تایبەت ب چیایێ گارەی بهێتەدان ژ پێخەمەت گەشەپێدانا لایەنێ گەشتیاری ل وی چیایی، نەخاسمە ل وەرزێ زەفستانێ و گرنگیدان ب پڕۆژەیێن وەكو بەنداڤا دهۆكێ و پڕۆژەیێ گەشتیاری یێ گەهاندنا ئاڤا رووبارێ دجلە بۆ بەنداڤا دهۆكێ‌ و پڕۆژەیێن گەشتیاری ل دەڤەرا تاڤەڕەشێ‌، ئێمینكێ، گەلیێ دهۆكێ».