قەیس وەیس:

چاڤەڕێ‌ دهێتە كرن ئەڤرۆ و سوبەهی دەست ب هەڤڕكیێن گەڕا 27ێ‌ ژ خولا ستێرێن ئیراقێ‌ یا فوتبۆلێ‌ بهێنە كرن، یاریێن ئاگرین و تاقیكرنێن زەحمەت بەرانبەر یانەیێن كوردستانی نە.
دهۆك چاڤ ل پێشڤەچوونێ‌ یە
بڕیارە ئەڤرۆ ل دەمژمێر 7:30 شەڤ تیما یانەیا دهۆك ل یاریگەها جەولان ببیتە مێڤانا یانەیا ئەلگەرمە یا باژێرێ‌ رۆمادی د یارییەكا ب هێز دا، ئەلهۆیێن چیا ئەوێن د یارییا بۆری سەركەڤتنەكا گرنگ ل سەر یانەیا تەلەبە ئینایی دێ‌ ب زاخەكا بلند هێتە دڤێ‌ یاریێ‌ دا ئەوا شیایی 37 خالان كۆمبكەت ژ 10 سەركەڤتن، حەفت وەكهەڤی و نەهـ خوسارەتیان، یاریزانێن وێ‌ 28 گۆل تۆماركرینە د بەرانبەر دا 25 گۆل ل سەر هاتینە تۆماركرن، ژلایێ‌ خوەڤە یانەیا ئەلگەرمە 44 خال هەنە ل ڕێزا حەفتێ‌ دهێت.
ڕاهێنەرێ‌ دهۆكێ‌ ب مۆرالا یاریزانێن خوە پشت گەرمە
د پرێسكۆنفراسنێ‌ رۆژنامەڤانی دا ئەحمەد خەلەف ڕاهێنەرێ‌ تیما یانەیا دهۆكێ‌ گەشبینییا خوە دیاركر كو ب هەمان زاخ و مۆرالا یارییا بۆری بەرانبەر تەلەبە دێ‌ ئەڤرۆ ژی بەرانبەر ئەلگەرمە هێنە دناڤ یاریگەهێ‌ دا و گۆت: هەرچەندە یاری ب سانەهی نابیت بەرانبەر تیمەكێ‌ كو من پێزانین ل سەر هەبووینە ژبەركو پێشتر ڕاهێنەرێ‌ وان بوویمە، مە هەردو یانەیان یاریزانێن خودان شیان و باش هەنە و دێ‌ یارییەكا خۆش و هێز بیت، پێنەڤێت بۆ هەر یارییەكێ‌ پلانێن خوە هەنە، لەوما ژی بۆ ڤێ‌ یاریێ‌ ئەم گەشبینن ب مۆرالا بلند یا یاریزانان بگەهینە ئارمانجا خوە یا سەركەڤتنێ‌.
زاخۆ بەرانبەر چیایەكێ‌ خولێ‌ یە
ژلایێ‌ خوەڤە یانەیا زاخۆ دێ‌ ل یاریگەهـ و دناڤ ئەرد و جەماوەرێ‌ خوە دا یانەیا زەورا یا بەغدایی ل دەمژمێر پێنجێ‌ ئێڤاری مێڤان كەت، كوڕێن خابوری ئەوێن د یارییا بۆری دا بەرانبەر ئەمانەت بەغدا سێ‌ خال ژ دەستدان ژبەر شاشیەكا هونەری، د نوكە دا ل رێزا شەشێ‌ دهێت ب كۆمكرنا 46 خالان ژ 13 سەركەڤتن، حەفت وەكهەڤی و شەش خوسارەتی هەنە، یاریزانێن وێ‌ 34 گۆل هەنە د بەرانبەر دا 22 گۆل ل سەر هاتینە تۆماركرن، ژلایێ‌ خوەڤە یانەیا زەورا خودانا 47 خالان ل رێزا پێنجێ‌ دهێت.
ڕاهێنەرێ‌ زاخۆ ئەركێ‌ تیما خوە ب سانەهی نابنیت
د پرێسكونفرانس دا ئەیۆب ئۆدیشۆ ڕاهێنەرێ‌ تیما یانەیا زاخۆ ئەركێ‌ تیما خوە بەرانبەر زەورا ب زەحمەت دەتە زانین و پشت گەرمییا خوە ب هاتن و پشتەڤانییا جەماوەری و شیانێن یاریزانێن خوە ددەتە دیاركرن و گۆت: یاری بەرانبەر زەورا تامەكا تایبەت هەیە بۆ هەر یانەیەكێ‌ ژبەركو بەرانبەر یانەیەكا جەماوەری و خودان شیانە، ژلایێ‌ دەرۆنی ڤە هەموو یاریزان بەرهەڤن و ڕژدین بۆ سێ‌ خالان، تیما زەورا پێكهاتییەكێ‌ بهێز هەیە، لێ‌ مە ژی تیمەكا ڕێكخستی و ئاست بلند و ب هێز هەیە، ب هیڤی نە دلێ‌ جەماوەرێ‌ خوە كەیفخوەش بكەین.
هەولێر دێ‌ مووسل مێڤان كەت
ژلایەكێ‌ دووڤە بڕیارە سوبەهی جەماوەرێ‌ وەرزشی یێ‌ یانەیا هەولێر چاڤەرێ‌ یارییەكا دی و سێ‌ خالێن دی نە دەمێ‌ تیما وان ل یاریگەها خوە یانەیا مووسل ل دەمژمێر پێنجێ‌ ئێڤاری مێڤان بكەت، كوڕێن كەلهە و منارە ل ڕێزا سێیێ‌ دهێن ب كۆمكرنا 52 خالان ژ ڤەڕێژا ئەنجامێن 15 سەركەڤتن، حەفت وەكهەڤی و چار خوسارەتیانە، ژلایێ‌ خوەڤە یانەیا مووسل 33 خال كۆمكرینە ل ڕێزا 13ێ‌ دهێت.
نەورۆزێ‌ دیدارەكا یانەیا بەغدایی هەیە
هەر ژ چارچووڤەیێ‌ هەڤڕكیێن خولێ‌ بڕیارە ئەڤرۆ ل دەمژمێر پێنجێ‌ ئێڤاری تیما یانەیا نەورۆز دناڤ ئەرد و یاریگەها خوە دا یانەیا ئەلكەرخ یا بەغدایی مێڤان بكەت، كوڕێن باژێرێ‌ سلێمانیێ‌ ل ڕێزبەندییا نەهێ‌ دهێن ب كۆمكرنا 38 خالان كو سەرجەمێ‌ خالێن 12 سەركەڤتن و دو وەكهەڤیانە و 12 خوسارەتی هەنە، ژلایێ‌ خوەڤە یانەیا ئەلكەرخ 44 خال كۆمكرینە ل رێزا هەشتێ‌ دهێت.
ژ یاریێن مایی یێن ڤێ‌ گەڕێ‌ بڤی شێوەیی نە
ئەڤرۆ، شورتە دێ‌ ئەمانەت بەغدا دەمژمێر 7:30 شەڤ.
چار یاریێن مایی دێ‌ سوبەهی هێنە كرن
كارەبا- مینا، دەمژمێر پێنجێ‌ ئێڤاری.
دیالا- نەفت میسان، دەمژمێر پێنجێ‌ ئێڤاری.
نەفت- ئەلغراف، دەمژمێر 7:30 شەڤ.
جەوییە- ئەلقاسم، دەمژمێر 7:30 شەڤ.
لیستا ڕێزبەندیا خولێ‌ بەری دەستپێكرنا گەڕا 27ێ‌
1- جەویە 60 خال.
2- شورتە 56 خال.
3- هەولێر 52 خال.
4- تەلەبە 45 خال.
5- زەورا 47 خال.
6- زاخۆ 46 خال.
7- ئەلگەرمە 44 خال.
8- ئەكەرخ 44 خال.
9- نەورۆز 38 خال.
10- دهۆك 37 خال.
11- نەفت 34 خال.
12- ئەلغراف 33 خال.
13- مووسل 33 خال.
14- دیالا 32 خال.
15- مینا 28 خال.
16- نەفت میسان 25 خال.
17- كارەبا 24 خال.
18- ئەمانەت بەغدا 24 خال.
19- نەجەف 14 خال.
20- ئەلقاسم ئێگ خال.

چاڤەڕێ‌ دهێتە كرن سوبەهی دەست ب هەڤركیێن گەڕا 16ێ‌ و بەری دووماهییا خولا پلا ئێكا كوردستانێ‌ یا فوتبۆلێ‌ بهێنە كرن ئەوا دێ‌ سیمیایێ‌ چەند یانەیێن پلێتا دەربازبوونێ‌ بۆ نایاب و ئەو یانەیێن دێ‌ پاشڤە چنە پلا دو، یانەیێن دهۆك و سێمێل هەڤڕكییا دەربازبوونێ‌ دكەن و شێخان و تەناهی د مەترسیا داكەڤتنێ‌ دانە.
بڕیارە هەڤڕكیێن ڤێ‌ گەڕێ‌ ل دەمژمێر سێ‌ ئێڤاری بڤی شێوەیی بن.
دهۆك- زانكۆیا جیهان، یاریگەها دهۆك یا سێیێ‌.
سێمێل- كۆیە، یاریگەها سێمێلێ‌.
بەردەڕەش- سۆران، یاریگەها بەردەڕەش.
تەناهی- چەمچەمال، یاریگەها زانكۆیا دهۆك.
بابان- شێخان، یاریگەها بابان.
ئارارات- شەقلاوە، یاریگەها ئارارات.
خاك- هەولێر، یاریگەها خاك.
بازیان- شۆرجە، یاریگەها شۆرجە.
هەلوەستێ‌ گشتی بەر دەستپێكرنا هەڤڕكیێن گەڕا 16ێ‌.
1- شەقلاوە 33 خال.
2- بابان 28 خال.
3- دهۆك 23 خال.
4- زانكۆیا جیهان 22 خال.
5- سێمێل 21 خال.
6- هەولێر 19 خال.
7- چەمچەمال 18 خال.
8- بازیان 18 خال.
9- بەردەرەش 18 خال.
10- كفری 18 خال.
11- كۆیە 16 خال.
12- ئارارات 16 خال.
13- شۆرجە 15 خال.
14- خاك 15 خال.
15- سۆران 14 خال.
16- تەناهی 13 خال.
17- شێخان 12 خال.
هەژی گۆتنێ‌ یە یاریێن یانەیێن پارێزگەهێ‌ ژ گەڕا 17ێ‌ و دووماهیێ‌ یا خولێ‌ دێ‌ بڤی شێوەیی بن، یانەیا دهۆك دێ‌ بیتە مێڤانا یانەیا شەقلاوە، سێمێل دێ‌ بیتە مێڤانا یانەیا هەولێر، ژلایێ‌ خوەڤە بەردەڕەش دێ‌ بیتە مێڤانا چەمچەمال، هەروەسان تەناهی دێ‌ بیتە مێڤانا شۆرجە ل كەركووكێ‌ و شێخان دێ‌ مێڤاندارییا بازیان كەت.

شاهۆ فەرید:

بڕیارە ئەڤرۆ تیما فوتسالا یانەیا پیرس ئێكەم تاقیكرنا خوە وەكو نوونەرا پارێزگەهێ‌ د ڤاڤارتنێن خولا پلا ئێك دەربازبوون بۆ نایابا ئیراقێ‌ ل سەر ئاستێ‌ كوڕان ل باژێرێ‌ مووسل ئەنجامدەت، ئەوا پێنچ یانە د كۆما ئێكێ‌ دا پشكدارن و یاریێن وان دێ‌ ب شێوەیێ‌ خول ئێك قووناغ كۆمڤەبوون هێنە كرن.
ل دۆر دووماهی بەرهەڤیێن وان ئاراز سالح ڕاهێنەرێ‌ ئێكێ‌ یێ‌ تیمێ‌ بۆ رۆژنامەیا ئەڤرۆ گۆت: بەرهەڤیێن باش مە كرینە، ئارمانجامە ژی ب دەستڤەئینانا پلێتا دەربازبوونێ یە، دێ بزاڤێ كەین ژ هەمی لایانڤە ب هێز بهێنە د ناڤا هەڤڕكییان دا، تیم ژی بێ كێماسیە هەموو لایان هەڤركێن هێز بین ناڤا گرۆپێ خوە، دێ‌ بزاڤێ‌ كەین ببینە ئێكەم تیما فوتسالا پارێزگەها دهۆكێ‌ ل سەر ئاستێ‌ كوڕان پشكداریێ‌ د خولا ئیراقێ‌ دا بكەین و دەستكەڤتی ژی بینن.
زێدەتر ناڤهاتی دیاركر ژی: پێشتر مە پێزانین لسەر تیمێن پشكدار كوم كرینە ژ نێزیك ئاگەهداری ئاستێ وان بووینە، خالێن لاوازیا وانا بخوە دەرفەت دبینین بشێن سەركەفتنا بخوە تۆماربكەین، ئەڤە ماوەیێ چەندین سالە من سەربۆرەكا هەرە باش لسەر فۆتسالێ هەیە، ل گەل یانەیا ئافرەتێن دهۆكێ قارەمانیەكا كوردستانێ‌ و ئێكا پارێزگەهێ‌ و قارەمانییەكا ئیراقێ‌ یا شەش یاریزانی بدەستڤەئیناینە، بۆ وەرزی نوو یێ خولا فوتسالێ پشكداربین ببینە هەسپێ رەش، یا گرنگ ئەوە هەمی هزرا خوە بدانینە سەر ئەڤان ڤاڤارتنان.
بۆ زانین ئەڤە ئێكەم جارە تیمەك ژ پارێزگەها دهۆكێ پشكداری ڤاڤارتنێن فۆتسالا ئیراقێ دكەت بۆ خولا فۆتسالێ تیمێن پشكدار ل گەل پیرس هەر ئێك ژ بەختیاری سلێمانی و حەدبا مویسل و مەسافی شیمال یا كەركوك و فاسفوت یا قادسیە ئەو ژی پشكداریا ویێ دیارنینە.

د داخویانیەكا رۆژنامەڤانی دا جیانی ئینفانتینۆ سەرۆكێ‌ فدراسیۆنا فوتبۆلا جیهانێ‌ فیفایێ ڕاگەهاند وەلاتێ‌ ئیرانێ‌ ب نڤێسارەكا فەرمی بەرهەڤییا خوە دیاركرییە بۆ پشكداریێ د مۆندیالا جیهانی دا بكەت، ئەوا بڕیارە هەڤڕكیێن وێ‌ ل 11ێ‌ خزیرانێ‌ هەتا 19ێ‌ تەمووزا بهێت ل هەرسێ‌ وەلاتێن كەنەد، ئەمریكا و مەكسیك بهێنە ئەنجامدان.
جیانی ئەوچەندە دیاركر پشتی مە داخوازاییا خوە ئێكلاكرنا ئیرانێ‌ د مۆندیالێ‌ دا كر، ب فەرمی نڤێسار گەهشتیە مە و دێ‌ پشكدارن ئەوا یاریێن كۆما ئیرانێ‌ ل وەلاتێ‌ ئەمریكا هێنە كرن، هەرچەندە وەلاتێ‌ مەكسیك بەرهەڤییا خوە دیاركرییە كۆما ئیرانێ‌ ل وەلاتێ‌ وان بهێتە كرن، دێ‌ ڕێكارێن تایبەت بۆ شاندێ‌ ئیرانێ‌ هێنە كرن.
بۆ زانین هەلبژارتیێ‌ ئیرانێ‌ دكۆما حەفتێ‌ دایە و پێكهاتینە ژ بەلجیكا، مسر و نیۆزیلەندا و هەموو یاریێن وێ‌ ل ئەمریكا دێ‌ هێنە كرن.

پشتی دربێ‌ دووركەڤتنێ‌ بۆ سێ‌ مۆندیالێن جیهانی ل دووڤ ئێك تایبەت مۆندیالا 2026ێ‌ ل سەر دەستێ‌ هەلبژارتیێ‌ بۆسنە وهێرسك هاتییە دوورئێخستن، بەرپرسێن وەلاتێ‌ ئیتالیا بڕیارەكا توند دایە ب شۆرەشەكا مەزن د ناڤ فدراسیۆنێ‌ و پێكهاتیێ‌ هەلبژارتیێ‌ خوە دا.
دئێكەم پێنگاڤا ڤێ‌ شۆرەشێ‌ دا گابرییێل گراڤینیا سەرۆكێ‌ فدراسیۆنا فوتبۆلا ئیتالیا دەست ژ كارێ‌ خوە كێشا دگەل دا سێ‌ ئەندامێن فدراسیۆنێ‌ لدووڤ دا چوون، ژلایەكێ‌ دووڤە هەر ئێك ژ ڕاهێنەرێ‌ ئیتالیا گاتۆزۆ و كادرێ‌ ڕاهێنەرێ‌ ژی دەست ژ كارێ‌ خوە بەردان، ئەڤچەندە ژی هەموو لدووڤ داخوازا حوكمەتا ئیتالیا بوویە.
ل دووڤ ژێدەرێن رۆژنامەڤانی دبیت جیۆڤانی مالاگۆ ببیتە سەرۆكێ‌ فدراسیۆنێ‌ ئەوێ‌ پێتشر سەرۆكێ‌ لژنەیا ئۆلمپییا ئیتالیا بوو، هەروەسان ل سەر ئاستێ‌ هونەری، رۆبێرتۆ مانشینی بەربژارەكێ‌ بهێزە بۆ سەركێشییا هەلبژارتیێ‌ ئیتالیا ئەوێ‌ هەلبژارتیێ‌ وەلاتێ‌ خو ل 2021ێ‌ بەر ب ناسناڤێ‌ یۆرۆ بری.