ئامێدیێ، مەحمود نهێلی:

بەهرام عریف یاسین، بەرپرسێ لقێ 18 یێ پارتی ل ئامێدیێ‌ دیار كر، ئەڤ رەوشە ب ڤی رەنگی نامینت و ژین و ژیارا وەلاتیان دێ باشتر لێ هێت و پارتی هەموو بزاڤان ژ بۆ ڤێ ئارمانجی و پاراستنا دەسكەفتێن مللەتێ كورد و خوەشكرنا ژیارا وەلاتیان دكەت.
بەرپرسێ لقێ هەژدە د سمینارەكی دا ل هۆلا بیرەوەریان ل دێرەلۆكی، ب هەلكەفتا بەخشینا شەرەفا ئەندامەتیێ بۆ 532 پالێوران گۆت: «پارتیبوون شەرەفەكا مەزنە بۆ مە هەموویان، ژ بەر كو پارتی حزبەكە هەردەم د خزمەتا گەل و وەلاتێ خوە دا بوویە و هەر ژ بۆ ڤێ مەرەمێ ژی هاتیە دامەزراندن».
دیسا بەحسێ رەوشا نوكە كر و و گۆت: «ئێكڕێزی دێ مە گەهینیتە ئارمانجێن مە و دەستكەفتێن مە پارێزیت، پارتی دێ هەموو بزاڤان كەت، كو كەرامەتا خەلكێ مە یا پاراستی بیت».
گۆت: جەنابێ سەرۆك بارزانی گەلەك گرنگیێ ب ڤێ دەڤەرێ ددەت ژ بەر كو ئەڤ دەڤەرە بوویە لاندنا شورەشێن كوردی و ب هزارەها شەهید و قوربانی داینە ژ پێخەمەت ئازادیا گەلێ كوردستانێ.

دهۆك، دلۆڤان ئاكرەیی:

سەرۆكێ ژوورا بازرگانی یا زاخۆ دیاركر، بۆ ئێكەم جار ل ئیدارا سەربخۆ یا زاخۆ، پێشانگەهەكا نێڤدەولەتی ب پشكداریا زێدەتر ژ 70 كۆمپانیێن بیانی و ناڤخۆیی دێ هێتە ڤەكرن.
لەتیف عوسمان، سەرۆكێ ژوورا بازرگانی یا زاخۆ بۆ رۆژنامەیا ئەڤرۆ گۆت: «ل ڕێكەفتی 21ی چریا دویێ، ئەو پێشانگەهە دێ هێتە ڤەكرن، پتریا كۆمپانیێن پشكدار د بیاڤێن خوارنێ‌، ترومبێل، گەشتوگوزار و چەندین بیاڤێن دی دانە و هەتا نوكە زێدەتر ژ 80%یێ جهێن پێشانگەهێ هاتینە گرتن و چاڤەڕێ دهیتە كرن هەمی بهینە پڕكرن و پڕۆژەیێ هۆلا پێشانگەهێ و كۆنفرانسان ب گوژمێ پتر ژ 9 ملیۆن دۆلاران ل ناڤا ئاڤاهییێ زانكۆیا زاخۆ هاتیە دروستكرن، ڤەكرنا ڤێ پێشانگەهێ هەڤدەمە ل گەل سالیادا دامەزراندنا ئیدارا سەربخۆ یا زاخۆ».

هەولێر، قائید میرۆ:

ئەندامەكێ پەرلەمانێ ئیراقێ دیار كر، بڕیارە دو بانكێن دی ژی دەست ب دانا قەران بۆ دانانا سیستەمێ تێهنا رۆژێ یێ بەرهەمئینانا كارەبێ بكەن و دبێژیت: دانا ئەڤی قەری دێ كاریگەری ل سەر كەرتێ كارەبێ ل هەرێما كوردستانێ‌ هەبیت.
دكتۆر ئامانج مەحموود، ئەندامێ پەرلەمانێ ئیراقێ بۆ رۆژناما ئەڤرۆ دیاركر، هەتا نها سێ بانكێن ئەهلی قەرێ دانانا سیستەمێ تێهنا رۆژێ‌ بۆ بەرهەمئینانا كارەبێ ددەنە فەرمانبەران و گۆت: «بڕیارە ل رۆژێن بهێن دو بانكێن دی ژی دەست ب دانا قەران بكەن بۆ فەرمانبەران ژ بۆ دانانا سیستەمێ تێهنا رۆژێ، وەلاتی دشێن حەفت ملیۆن دیناران هەتا 30 ملیۆن دیناران وەربگرن، بەلێ بۆ كۆمپانیا و پڕۆژەیان 30 ملیۆن هەتا ئێك ملیار دیناران دشێن وەربگرن».
دكتۆر ئامانج گۆتژی: «هەتا نوكە ب تنێ ب رێیا ئێك كۆمپانی 400 وەلاتیێن هەرێما كوردستانێ ناڤێن خۆ تۆماركرینە و بڕیارە ب رێیا ئەڤان كۆمپانیان قەری بۆ بەرهەمئینانا كارەبێ ب رێیا تێهنا رۆژێ وەربگرن».

ئاكرێ‌، رەمەزان زەكەریا:

ب بریارا مەسرور بارزانی، سەرۆك وەزیرێن هەرێما كوردستانێ سالانە بیرەوەریا نەورۆزێ ل ئاكرێ دێ هێتە ساخكرن، بۆ ڤێ مەرەمێ‌ ژی هەژمارەكا پڕۆژەیێن گەشتیاری ل ئاكرێ دێ هێنە ئەنجامدان و پەیكەرێ كاوەیێ ئاسنگەر ژی ل جهێ كەرنەڤالێ دێ‌ هێتە دروستكرن.
ئەمین سەلیم، رێڤەبەرێ گەشتوگوزارا ئاكرێ بۆ ئەڤرۆ گۆت: «پشتی ب فەرمانا مەسرور بارزانی، سەرۆكێ حكومەتا هەرێما كوردستانێ ئاكرێ بوویە پایتەختێ نەورۆزێ، بڕیارە سالانە ب بەرهەڤبوونا سەرۆكێ حكومەتێ و شاندێن بیانی بیرەوەریا نەورۆزێ ل ئاكرێ بهێتە ساخكرن، بۆ ڤێ مەرەمێ‌ ل سەرێ گری، كو جهێ ئاهەنگا نەورۆزێ یە، هندەك گوهۆڕین دێ هێنە كرن، ئاڤاهیێ‌ بزاڤا رەوشەنبیری و رادیۆیا ئاكرێ و بۆرج دێ‌ هێنە راكرن و هۆلەكا مەزن هێتە دروستكرن و پەیكەرێ كاوەیێ ئاسنگەر ژی وەكو هێمایێ نەورۆزێ دێ‌ هێتە دروستكرن».
ناڤبری گۆتژی: «سەرێ گرێ ئاكرێ ب رەنگەكێ رێكوپێك دێ هێتە رێكخستن، ژ بەركو سالانە سەرۆكێ حكومەتا هەرێما كوردستانێ و بالیۆز و سەرۆك و نوونەرێن وەلاتان بەرهەڤ دبن، لەو مە دڤێت كارەكی بكەین یێ هەژی بیت».
ئەمینی زێدەتر گۆت: «ل قەزا ئاكرێ بۆ راكێشانا گەشتیاران و دابینكرنا جهێ مانەڤەیا وان، پڕۆژەیەكێ مەزنێ گەشتیاری ل سەر رووبەرێ 446 دۆنەمێن ئەردی ب گوژمێ 150 ملیۆن دۆلاران د وارێ بجهئینانێ دایە».

زنار تۆڤی:

رێڤەبەریا گشتیا حەج و عومرێ ل هەرێما كوردستانێ، میكانزما وەرگرتنا كۆمپانیان بۆ حەجا سالا 2026ێ راگەهاند و هندەك ژ باشترین كۆمپانیێن حەجا ئەڤ سالە وەكو پاداشت و بێی پشككێشان، بۆ سالا بهێت دێ هێنە هەلبژارتن.
كاروان ستوونی، پەیڤدارێ رێڤەبەریا گشتیا حەج و عومرێ ل هەرێما كوردستانێ بۆ ئەڤرۆ دیار كر، ل هەرێما كوردستانێ 400 كۆمپانیێن حەج و عومرێ هەنە، سالانە ژ لایێ لژنەكێڤە هەلسانگاندن بۆ وان كۆمپانیان دهێتە كرن و ل دووماهیێ 112 كۆمپانی ژ وان بۆ حەجێ دهێنە هنارتن و ئەو كۆمپانیە دشێن حەجیان بهنێرنە حەجێ ل وەلاتێ سعوودیێ.
كاروان ستوونی گۆت: «ئەو كۆمپانیێن داخوازییێ پێشكێش دكەن، پشتی تۆماركرنا وان د سیستەمێ ئۆنلاین دا، ژ لایێ لژنەكێڤە هەلسەنگاندن دێ بۆ هێتە كرن و ب رێكا پشككێشانێ دێ هێنە هەلبژارتن».

دهۆك، لەزگین جۆقی:

دژی بڕیارەكا حكومەتا ئیراقێ ئاكنجیێن كەمپا چەممشكۆ ل ئیدارا سەربخۆ یا زاخۆ خرڤەبوونەكا نەرازیبوونێ ئەنجام دا.
نوونەرێ ئاوارەیێن شنگالێ ل كەمپا چەممشكۆ بۆ رۆژناما ئەڤرۆ دیار كر، بڕیارا حكومەتا ئیراقێ بۆ ئاكنجیكرنا ئاوارەیێن شنگالێ ل كەمپان، بڕیارەكا شاشە و پێدڤیە حكومەتا ئیراقێ هەڤكاری و پشتەڤانیا ئاوارەیان بكەت بۆ زڤڕینا شنگالێ و نابیت ئاوارە ب زۆری بهێنە نەچاركرن ل كەمپان بمینن، ئەڤە دێ زیانێ گەهینیتە جهێن رەسەن یێن ئاوارەیان.
پیر دەیان جەعفەر، ڕێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ ئەڤرۆ گۆت: «بڕیارا وەزارەتا كۆچ و كۆچبەرێن ئیراقێ ل دژی ئاوارەیێن شنگالێیە، ژ بەركو وەزارەتا كۆچ و كۆچبەرێن ئیراقێ بزاڤێ دكەت، كەمپ ببنە كۆمەلگەهێن ئاكنجیبوونێ و نابیت بڕیارا وەزارەتا كۆچ و كۆچبەرێن ئیراقێ بهێتە بجهئینان و پێدڤیە ئاوارە ب سەربلندی ڤەگەڕنە دە‌ڤەر‌ێن خۆ».