ب ئامادەبوونا شەمعون شلیمون ئیشۆ، جێگرێ پارێزگارێ دهۆكێ، دوهی 17/8/2025 د چارچوڤێ فەرمان و رێكارێن خانەنشینكرنێ، یێن حكومەتا هەرێما كوردستانێ دا ڕێوڕەسمێن گوهۆڕینا ڕێڤەبەرێ گشتی یێ گەشتوگوزارا دهۆكێ هاتنە گێڕان.
د رێوڕەسمان دا سەركار سەبغەتوللا سەعید، وەكو ڕێڤەبەڕێ نوو یێ گەشتوگوزارێ‌ ل پارێزگەها دهۆكێ‌ ب وەكالەت ل شوونا خەیری ئوسو دەست ب كاربوو، جێگرێ پارێزگاری بناڤێ پارێزگارێ دهۆكێ دەستخۆشی ل ڕێڤەبەرێ بەرێ كر، كو شیایە خزمەتەكا باش د وارێ پێشڤەچوونا كەرتێ گەشتیاری یێ پارێزگەهێ دا پێشكێش بكەت و هیڤیا سەركەفتنێ بۆ ڕێڤەبەرێ نوو خواست.

وەلاتێ ئیماراتێ چەندین پڕۆژە ل هەرێما كوردستان ئەنجامداینە و گرنگییەكا تایبەت ب هەرێما كوردستانێ ددەت، هەروەسا نوكە پتر ژ 10 پڕۆژەیان ل هەرێما كوردستانێ هەنە.
د. محەمەد شوكری، سەرۆكێ دەستەیا وەبەرهێنانێ ل هەرێما كوردستانێ، بۆ رۆژناما ئەڤرۆ گۆت: «پەیوەندیێن مە ل گەل كۆمپانیێن ئیماراتی گەلەك د باشن و هژمارەكا كۆمپانیێن ئیماراتی ل هەرێما كوردستانێ هەنە، د كەرتێن نەفت و غازێ و چاندنێ و پیشەسازی و گەشتوگوزارێ دا وەبەرهێنانێ و كارێ ڤەگوهاستنێ دكەن و گرنگییەكا زۆر ب هەرێما كوردستانێ ددەن».
ناڤهاتی گۆتژی: «ئەم بەردەوام د پەیوەندییان داینە، بۆ هندێ پتر كۆمپانیێن ئیماراتی بهێنە هەرێما كوردستانێ و كارێن باشتر بكەن، ئیمارات ئێكە ژ وان وەلاتان، كو زۆرترین كارێ وەبەرهێنانێ ل هەرێما كوردستانێ ئەنجام ددەت و ل سەر ڕاسپاردا سەرۆكێ حكومەتێ، پێدڤییە ئاسانكاریێن تەمام بۆ وەبەرهێنەرێن ئیماراتی بهێنە كرن».

هەولێر، قائید میرۆ:

رێڤەبەرێ گشتیێ بازرگانی رەتكر ئینانا ترۆمبێلێن چینی هاتبیتە قەدەغەكرن و دبێژیت: ئینانا ترۆمبێلێن چینی بۆ هەرێما كوردستانێ یا بەردەوامە و ل گورەی رێنمایان ترۆمبێل ژ دەرڤە دهێنە بازاڕێن هەرێما كوردستانێ.
نەوزاد شێخ كامل، رێڤەبەرێ گشتیێ بازڕگانی بۆ رۆژناما ئەڤرۆ دیاركر، بڕیارا راگرتنا ترۆمبێلێن چینی ژ لایێ وەزارەتا بازرگانیا ئیراقێ هاتیە دەركرن، بەلێ هێشتا ئەو بڕیار ب فەرمی نەگەهشتیە بازرگانیا هەرێما كوردستانێ، لەوڕا ژی ئینانا ترۆمبێلێن چینی ب رێیا دەرگەهێن سنۆری یێن هەرێما كوردستانێ یا بەردەوامە و نەهاتیە راگرتن و گۆت: «ئەم كار ل سەر نڤیسیارێن فەرمیی دكەین و ب تنێ ب رێیا دەزگەهێن راگەهاندنێ ئەم ئاگەهدارین بڕیار ل سەر راگرتنا ترۆمبێلێن چینی هاتیەدان».
نەوزاد شێخ كامل گۆتژی: «هەرسال رێنمایێن نوو بۆ ئینانا ترۆمبێلان دهێنە دەركرن، ل گورەی ئەڤان رێنمایان مۆهلەت ب ئینانا ترۆمبێلان دهێتەدان، كو بهێنە د ناڤا ئیراق و هەرێما كوردستانێ دا، د دەمێ نوكە رێك ناهێتەدان ترۆمبێلێن كەڤن بهێنە د ناڤا هەرێما كوردستانێ دا، ئەگەر بڕیار ل دۆر قەدەغەكرنا هەر جۆرەكێ ترۆمبێلێ بهێتەدان پێدڤیە ب نڤیسیارا فەرمی ئەم بهێینە ئاگەهداركرن».

دهۆك، لەزگین جوقی:

دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ راگەهاند، دوهی 17/8/2025 ل دەڤەرا خەسفە ل پارێزگەها نەینەوا، دەست ب ڤەكرنا گۆڕێن ب كۆم هاتە كرن، كو رێكخراوا تیرۆرستیا داعشێ‌ خەلك ژ هەمی ئایین و نەتەوەیان كوشتینە و د ناڤ گۆڕێن ب كۆم دا ل وێ‌ دەڤەرێ‌ ڤەشارتینە.
شاكر میرانی، ئەفسەرێ دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ بۆ رۆژناما ئەڤرۆ خویا كر، هەتا نوكە دیارنینە، چەند روفات دێ د ناڤ گۆڕێن ب كۆم یێن خەسفە دا هەبن، ژ بەركو ژ نوو دوهی دەست ب ڤەكرنا گۆڕێن ب كۆم ل دەڤەرا خەسفە هاتە كرن و گۆت: «هەتا نوكە 129 گۆڕێن ب كۆم و تاكە كەسی ل دەستەیا ڤەكۆلین و كۆمكرنا بەلگەنامەیان هاتینە تۆماركرن، دیسا كار ل سەر ڤەكرنا گۆڕێن ب كۆم بەردەوامە، لێ‌ هەتا نوكە پتر ژ 68 گۆڕێن ب كۆم هاتینە ڤەكرن».

رەمەزان زەكەریا:

ئەڤ سالە ل دەڤەرداریا بەردەڕەشێ‌ پڕۆژەكێ مەزنێ ئاڤێ ب گوژمێ 305 ملیار دیناران دێ هێتە بجهئینان، كو سەنتەرێ‌ بەردەڕەشێ‌ و ناوچەداریا دارەتوو و 57 گوندێ دێ ژ پڕۆژەی مفاداربن.
ئاری ئەحمەد، رێڤەبەرێ ئاڤا هەرێما كوردستانێ راگەهاند: رازیبوون ل سەر پڕۆژەیێ ئاڤا دەڤەرداریا بەردەڕەشێ‌ هاتیەكرن و ئاڤ ژ زێیێ‌ مەزن بۆ ناڤ سەنتەرێ دەڤەرداریێ‌ و ناوچەداریا دارەتوو و 57 گوندان دێ هێتە راكێشان و گۆت: «بڕیارە د دەمەكێ نێزیك دا دەست بجهئینانا پڕۆژەی بهێتە كرن».
ناڤبری گۆتژی: «حكومەتا هەرێما كوردستانێ د چارچوڤێ دابینكرنا ئاڤێ بۆ وەلاتیان بەردەوامە و چەندین پڕۆژەیێن ستراتیژی یێن ئاڤێ ل دەڤەرێن كوردستانێ ئەنجام داینە و ئەنجام ددەت».

ئامێدیێ، مەحمود نهێلی:

پشتی بڕیارا سەرۆكێ حكومەتا هەرێما كوردستانێ ل دۆر بەلاڤكرنا پارچەیێن ئەردی ل سەر فەرمانبەران، پڕانیا باژێرڤانیێن سنۆرێ دەڤەرداریا ئامێدیێ كارێ پێدڤی ئەنجامدایە ژ بۆ بەرهەڤكرنا وان پارچەیێن ئەردی یێن رازی بوون ل سەر هاتیە كرن ب مەرەما بەلاڤكرنێ ل سەر فەرمانبەران.
دەڤەردارێ ئامێدیێ بۆ رۆژناما ئەڤرۆ دیار كر، ل دووڤ وێ ماستەرپلانا رێڤەبەرییا باژێرڤانیێن پارێزگەها دهۆكێ و هەڤكاری ل گەل باژێرڤانیێن دڤەرێ، بەرهەڤی دهێنە كرن، كو د دەمەكێ‌ نێزیك دا پارچەیێن ئەردی ل سنۆرێ باژێرڤانیێن سەر ب دەڤەردارییا ئامێدیێ ڤە بهێنە بەلاڤكرن.
وارشین سەلمان، دەڤەردارێ ئامێدیێ گۆت: «پارچەیێن ئەردی ل سنۆرێ هەموو باژێرڤانییان دێ‌ هێنە بەرهەڤكرن ل دووڤ وان رێنمایێن ژ لایێ وەزارەتا باژێرڤانییان ڤە، نوكە كار ل سەر كوژاندنا ئەردی دهێتە كرن، ل سنۆرێ هندەك باژێرڤانیان ژی كار ب دوماهی هاتیە».