دیدار: رەمەزان دەشتمری/ زاخۆ

3-4

ئەوی وەك زیندانی ئەم د ژورەكێ‌ دا هێلان و ل ڕۆژا دیتر ل سپێدێ‌ ئەم بۆ پارێزگەهێ‌ برن ژبەر كو چ ناسنامە و بەلگە دگەل مە نەبوون كو ئەم بۆ مالێن خۆە بێن و دا پارێزگار بۆ مە نڤیسنەكێ‌ ژ پارێزگاری وەربگرن و ئەم پێ‌ بین بۆ مالێن خۆە. دەمێ‌ ئەم گەهاندین بۆ حەوشا پارێزگاری هەر ل ئەوی دەمی تلفون بۆ پارێزگاری هات كو ل دویف بڕیارا سەرۆك كۆمارێ‌ ئیراقێ‌ لێبورینا گشتی هات دان و هەر كەسەك ئازادبی و دشێن قەستا مال و كەس و كارێن خۆە بكەن. جەنابێ‌ پارێزگاری ب خۆە هات بۆ دەرڤە و گوت: كورێن نوكە للیبەرینا گشتی ژ دەڤ سەروك كۆمارێ‌ ئیراقێ‌ بۆمە هات و هوین ئازادن و هەر ئێك ژ هەوە هەرن قەستا مال و مروڤێن خۆە بكەن. مە ژی گوت: جەنابێ‌ پارێزگار چ ناسنامە و پێناسە دگەل مە نینن و ژبەر زالگەهان ئەم دێ‌ چەوا شێن د زالگەهان ڕا بچین. پاریزگاری گوت: نوكە هەمی زالگەهێن حكومەتێ‌ هاتینە ئاگەهداركرن بۆ لێبورینا گشتی و هوین ب خێر بچن. ئەز بۆ گەراجا گشتی هاتم و من بەرێ‌ خۆە دایێ‌ ئێك خەلكێ‌ زاخۆ ب ناڤێ‌ هاشم موسا ل ئەوی دەمی قوتابیێ‌ خانەیا ماموستایان ل هەولێرێ‌ دخواند ئەوژی ل ل ئەوێ‌ گەڕاجێ‌ دێ‌ زاخۆ هێتن. مە ئێك و دوو ناسدكر و ئەم ل ترومبێلەكا تەكسی ژ جورێ‌ قەمارە سیاربین و بۆ باژێڕێ‌ زاخۆ هاتین. و ئێڤاری ئەز گەهشتیم بۆ زاخۆ و چووم بۆ دەف مالا پسمامێ‌ خۆە هایگاز داود و مە خۆە هاڤێت ئێك و ژ كەیفاندا ئەم گرین و ئەم ڕونشتن خوار و مە پرسیارا رەوشا ئێك و دوو كر، هەلبەت دەمێ‌ ئەز بۆ پێشمەرگایەتیێ‌ چویم هەڤژینا من دایكا حزبی یا ب دوو گیان بی و خودێ‌ كچەك دابویێ‌ و ناڤێ‌ وێ‌ كربی كەزیك یا نەخوشبی و هاتبی بو نەخوشخانێ‌. ئەو ماوێ‌ نیڤ دەمژمێرێ‌ بی ئەز گەهشتیم مالا پسمامێ‌ خۆە و ل دەمەكێ‌ من هوو بەرێ‌ خۆە دایێ‌ ئەڤە هەڤژینا من دایكا حزنی و دگەل كچا خۆە ئەوا پشتی چوونا من بۆ پێشمەرگایەتیێ‌ هاتن بۆ ناڤ حەوشا مالێ‌ و چەوا چاڤێ‌ هەژینا من ب من كەفت هەر ئێكسەر دلگرتی بی و كەفتە سەر ئەردێ‌ و بێ‌ هش بوو. ئەو دەمێ‌ ئەز بریندار بیم و بۆ ڕۆژهەلاتێ‌ كوردستانێ‌ چویم و بۆ مال و هەڤژین و كەس كارێن مە هاتبی گوت نكو ئەز یێ‌ هاتیم شەهیدكرن. پشتی هەڤژینا من ب سەر خۆەڤە هاتی و گوتە من : ئەورێ‌ تو چەوا هاتی و تو مری و مە تازیا تەژی یا ڕاكری. ل ئەوی دەمی نەخوشخانە ب شەڤێ‌ ل باژێرێ‌ زاخۆ نەبین و ل ئەو شەڤا ئەم ل مالا پسمامێ‌ خۆە ماین و كو ل ڕۆژا دیتر ئەم كچا خۆە ئەوا ناڤێ‌ وێ‌ كرین كەزیك بۆ نەخوشخانێ‌ ببین و چارەسەریا ئەوی بكەین. بەلێ‌ زور مخابن و هەر دئەوێ‌ شەڤێ‌ دا كچامە د لانكێ‌ دا ژ بەر نەخوشیا دژوار چوو بەردلوڤانیا خودایێ‌ مەزن و ئەم شكورداربین ئەڤا خودایی دگەل مە كری و هوسا بوو مە حەزكری. پشتی مە كچا خۆە كەزیك ل ناڤ گورستانێ‌ ڤەشارتی ئەز و دایكێ‌ ب تنێ‌ مە قەستا گوندێ‌ خۆە شكەڤدەلێ‌ كر. دەمێ‌ ئەم بۆ ناڤ گوندی گەهشتین كەس و كارێن مە ل مە كومبین و گەلەك كەیفا وان هات كو ئەز جارەكادیتر ب ساخی و سلامەتی بۆ ناڤ خێزان و مالا خۆە زڤڕیم. و ئاهەنگ بومە دەینان و كەیف كرن. پشتی بورینا حەفتیەكێ‌ ژنویكا دایكا پرسیار ژ هڤژینا من كر و گوتێ‌: دایێ‌ ئەوێ‌ پا كا نەڤیكا من كەزیكو یا دیار نینە. ڤێجا هەڤژینا من تازە كرە گری و گوت: هێشتا ڕۆژا ئێكێ‌ دەمی ئەم چوین بۆ زاخۆ كچا من كەزیك وەغەركر، و مە ل ناڤ گورستانا باژێرێ‌ زاخۆ یا ڤەشارتی. ئەوبی ل پایزا سالا 1975ی حكومەتا ئیراقێ‌ بریاردا دەست ب راكرنا گوندێن دەڤەرێ‌ كرن و ئەمژی ل سەر گوندێ‌ شكەڤدەلێ‌ راكرن و ئەم بۆ گوندێ‌ باگێرا ڤەگوهاستن. پاشی من مالا خۆە بۆ باژێرێ‌ زاخۆ ڤەگوهاست و ل تاخێ‌ عەباسیكێ‌ ئاكنجی بووین. ل ئەوی دەمی ماموستا نەجمەدین زوزانی هاریكارێ‌ ئامادیا چاندنێ‌ یا زاخۆ بی. دەمێ‌ ئەز دیتیم و گوتن من وەرە بەردەوامیێ‌ ب خواندنێ‌ بدە دا تو باروەرناما سیێ‌ ئامادەیێ‌ وەربگری. ئەوبی من بەردەوامی ب خواندنێ‌ دا و ل ئەوی دەمی عەبدوللا بشار ژی مە پێكڤە دخواند. ماموستا خەلات رەمەزان نەجار بۆ رێڤەبەرێ‌ ئامادەیا چاندنێ‌ ل زاخۆ و ل ئەوی دەمی من راپورتا نوشداری هەبی ژ بەر من دەستێ‌ من بێ‌ لایێ‌ راستێ‌ كار نەدكر و ئەز نە دچووم بۆ وانەیا پراكتیكی من نەدكر. ئەو ڕۆژا قوتابی بۆ ڕۆژا وانەیا پراكتیكی بۆ ناڤ پروژەیی چووین ئەز نەچوم ژ بەر كو من لێبورین هەبی. ل ڕۆژا پاشتر رێڤەبەرێ‌ مە ماموستا خەلات رەمەزان پرسیارا من ژ ماموستا نەجمەدین كربی و گوتێ‌: بوچی دوهی قوتابی ئارام ساهین داود بۆ وانەیا پراكتیكی نەهاتبی. ماموستا نەجەدین گوتێ‌: ئارام راپورتا نوشداری یا ل دەف دكتور شمعون هەیە و دەستەك وی سقەتە و كار ناكت. ماموستا خەلات هنارتە من و گوت: تو بوچی دوهی بۆ وانەیا پراكتیكی نەهاتبی؟ من گوتێ‌ ماموستا: تو دبینی دەستێ‌ من یێ‌ لایێ‌ ڕاستێ‌ كار ناكت و ئەز نەشیم ب دەستەكی شول بكەم، و من راپورتا نوشداری ژی ل سەر ئەڤێ‌ چەندێ‌ هەیە. ئێنا ماموستا خەلات رەمەزان ب توڕەیی ڤە گوت: ئەڤە نە ئەو زەمانە راپورتا نوشداری ل دەف من ناخوت و بۆ ڕۆژا وانەیا پراكتیكی تو دێ‌ دەیت دەیە مەسینی ئاڤێ‌ و ئەڤان گولێن دناف ئەڤان قافكاندا دێ‌ ئاڤ دی. من مادەم هوسا یە من قوتابخانە هێلا و ل مالێ‌ ڕوینشتم. بی سالا 1976ی من و كگەسەك دیتر ب ناڤێ‌ فەخری مەلا رەمەزان مە تێكەلی و پەیوەندی دگەل ئێك هەبین ل ئەوی دەمی ئەو ل باژێڕڤانیا زاخۆ فەرمانبەر بوو و هەر بۆ من ئاخفت و بەحسێ‌ ڕێكخستنا نهێنی یا پارتی دیموكراتی كوردستان كر، مە گروپەك هەیە و مە دەست ب رێكخستنا نهێنی ل زاخۆ مە یا دەستپێكری. بۆ من ژی قەناعەت چێبی و ئەزژی دگەل شانەیا وان هاتم رێكخستن و مە دەست ب كار و چالاكیان گرن. ل ئەوی دەمی ناڤێ‌ شانەیا مە ب ناڤێ‌ ئازادی یا نهێنی بووو گەلەك هەڤال هاتن دناڤ ئەڤێ‌ شانا پارتایەتیێ‌ دا.
ئەوبی ل ڕۆژا 7/3/1977ی ئەڤ گروپێ‌ شانایە ئەوا ب ناڤێ‌ ئازادی ژلایێ‌ حكومەتا ئیراقێ‌ ڤە هاتنە ئاشكراكرن، و هەژمارا حەفتێ‌ و دوو ئەندامان هاتن دەستەسەركرن. پشتی ئەز و عەبدوللا بشار دگەل ئێك هاتینە گرتن و بۆ دایرا ئەمنا زاخۆ هاتن رەوانەكرن و زیندانكرن. ل ئەوی دەمێ‌ كەسەك ب ناڤێ‌ كومیسەر جەمال خەشاف ئەوی ڤەكولین دگەل مە كرن و ئەم گەلەك ئێشاندن و قوتان و كەلامچەكرن.