هەولێر، قائید میرۆ:

سەرۆكێ ئێكەتیا مامۆستایێن كوردستان دیاركر، هەژمارەكا مامۆستایان ژ كڕینا ترومبێلان ب شێوەیێ قەر مفاداربووینە و داخوازكر كۆمپانیێن دی ژی ترومبێلان ب شێوەیێ قەر بدەنە مامۆستا و دبێژیت: سەقامگیریا مووچەی كاریگەری ل سەر مامۆستایان هەبوویە.
مامۆستا ئەحمەد گەرمیانی، سەرۆكێ ئێكەتیا مامۆستایێن كوردستانێ بۆ رۆژناما ئەڤرۆ دیاركر، مامۆستا دكارن ژ كڕینا ترومبێلان ب شێوەیێ قەر و ژ ئالیێ كۆمپانیا جێلی ڤە ل هەولێرێ مفاداربن، كو ترومبێل ب بهایەكێ گونجای و قەر بۆ مامۆستایان هاتینە دابینكرن و گۆت: «مامۆستایێن كارتێن بانكی هەین، ماف هەیە ژ كڕینا ترومبێلێ ب شێوەیێ قەر مفاداربن، پرۆسا بەلاڤكرنا ترومبێلان ل سەر تەخا مامۆستایان ب شێوەیێ قەر، پرۆسەیەكا گرنگە و هاریكاریەكا باشە بۆ مامۆستایان د ئەڤێ قووناغێ دا».
مامۆستا ئەحمەد گۆتژی: «هەتا نوكە هەژمارەكا مامۆستایان مفاداربووینە و داخواز دكەین كۆمپانیێن دی ژی پرۆسا فرۆتنا ترومبێلان ب شێوەیێ قەر بۆ مامۆستایان ئەنجام بدەن، ب تایبەتی پشتی رێككەفتنا د ناڤبەرا هەرێم و بەغدایێ‌ دا و هنارتنا مووچەی هاتیە گەرەنتی كرن».

سندس سالح سلێڤانەیی:

رێڤەبەرێ گشتیێ چاندنێ ل پارێزگەها دهۆكێ راگەهاند، ل سالا بۆری زیانەكا مەزن گەهشتیە جۆتیارێن هەرێمێ، حۆكمەتا ئیراقێ هاریكاریا جۆتیارێن خوە دكەت و گازوایل و تۆڤی بۆ دابین دكەت، لێ ئەو هاریكاری ژ جۆتیارێن هەرێما كوردستانێ ناگریت.

زێرەڤان عەلی، جۆتیارەكێ دەڤەرێ یە دبێژیت: ل سالا بۆری مە هەموویان گەلەك گەنم چاند و باران وەكو پێدڤی نەبارین، لەورا گەنمێ مە شین نەبوو و زیانەكا مەزن گەهشتمە مە هەموویان، سەبارەت گەنمێ ئاڤی ژی ل سالا بۆری من رێژەیەكا باش چاندبوو و هەموو ژلایێ مە ڤە دهاتنە ئاڤدان و مە گەلەك زەحمەت پێڤەبر، لێ هەتا نوكە حۆكمەتا ئیراقێ پارێ مە نەدایە، كو ئەو ژی نێزیكی (7) دەفتەرێن دۆلاری نە.
ئەیاد حسێن، جۆتیارەكێ دی یە دبێژیت: ئەڤ سالە مە هندەك جەهێ چاندی، لێ بۆ مەڕ و مالاتێ مەیە، سەبارەت یێ ئاڤی ژی، ئەو ژی بارەكێ گرانە و هەكە حكومەت هاریكاریا جۆتیاران نەكەت و گازوایل و تۆڤی ب بهایەكێ ئەرزان بۆ دابین نەكەت جۆتیارێن مە ئەو شیان نینن.
ئەندازیار ئەحمەد جەمیل رێڤەبەرێ گشتی یێ چاندنێ ل پارێزگەها دهۆكێ د بەرسڤا وان جۆتیاران دا گۆت: حۆكمەتا ئیراقا قیدرال بەردەوام هاریكاریا جۆتیارێن خۆ دكەت و گازوایل و تۆڤ و هەر كەرەستەیەكێ پێدڤی بۆ دابین دكەت، لێ مخابن ئەڤ چەندە ژ جۆتیارێن هەرێمێ ناگریت و ژێ د بێ بەهرن، لەورا پێدڤیە پەرلەمانتارێن كورد ل بەغدا ب رژدی ل سەر ڤی بابەتی ڕاوەستن و بچنە وەزارەتا چاندنێ ل حۆكمەتا فیدرال و داخوازا وان مافان بۆ جۆتیارێن كوردستانێ ژی بكەن، سەبارەت وەرزێ چاندنا گەنمی ب مخابنی ڤە ل سالا بۆری زیانەكا مەزن گەهشتە جۆتیارێن مە، چونكو باران وەكو پێدڤی نەهاتن و بەرهەمێ وان شین نەبوو، لێ بۆ ئەڤ سالە ب پشتەڤانیا حكومەتا هەرێما كوردستانێ ئەم شیاینە (2300) تەنێن تۆڤێ گەنمی ب دەینە جۆتیاران و مە گرنگی ب وان جۆتیاران دایە یێن كو دێ گەنمێ ئاڤی چینن و بۆ هەر كارەكێ هەبیت ل دووڤ شیانان دێ هاریكارێن جۆتیارێن خۆ بین و پشتەڤانیێ لێ كەین.

دهۆك، لەزگین جوقی

رێڤەبەرێ سایلۆیا شێخان دیار كر، ئەڤە ساڵەك و شەش هەیڤن هندەك گەنمێ ساڵا 2024ێ دناڤ سایلۆیێن پارێزگەها دهۆكێ دا مایە، ئەم بەردەوام چاڤدێری و پاراستنا وی گەنمێ ساڵا 2024 ێ دكەین دا كۆ خراب نەبیت، ئەڤە دبیتە بارگرانی بۆ سایلۆیان، هەروەسا مەترسیا خرابوونێ ل سەر هەیە، ئەم بەردەوام چاڤدێریا گەنمێ ساڵا 2024ێ دكەین دا كۆ خراب نەبیت.

خالد بیبو، رێڤەبەرێ سایلۆیا شێخان دیار كر، ئەو گەنمێ ئەم وەردگرین دەمێ دروینا گەنمێ جوتیاران وەزارەتا بازرگانیان ئیراقێ ژ سایلویان دبەت و ل سەر كارگەهێن ئاری دابەش دكەت و هەمی دبیتە ئار ل سەر خەلكی ب رێیا پلێتا ئاهێن خوارنێ دێ هێتە دابەشكرن.
زێدەتر گۆت: سایلویێن پارێزگەها دهۆكێ گەنمێ جوتیاران ل سەر 13 كارگەهێن چێكرنا ئاری دابەش دكەن، لێ هندەك جاران حۆكمەتا ئیراقێ ل شوونا پشكا ئارێ 12 هەیڤان بدەتە خەلكێ هەرێما كوردستانێ، ب تنێ پشكا 9 هەیڤان ددەت، ب تنێ ئەڤ سالە دێ پشكا 10 یا ئاری ل سەر خەلكێ پارێزگەها دهۆكێ هێتە دابەشكرن كۆ گەلەك ساڵا گەنم دناڤ سایلۆیان دا دمینیت و ئەڤە دبیتە ئاریشە، چونكە دەمێ گەنم بەردەوام بمینیت، پێدڤیە ئەو گەنم بهێتە تافیلكرن دا كۆ خراب نەبیت.
خۆیا كر، ل سایلو زاخۆ هەتا هەشت هزار تەنێن گەنمێ ساڵا 2024 ل سایلویا فەیدیێ ماینە، هەتا 30 هەزار تەنێن گەنمێ ساڵا بووری ل شێخان هەبوون، نوكە ئەم پشكەكێ دابەش دكەین ل سەر كارگەهان و دێ بیتە ئار ل سەر خەلكێ پارێزگەها دهۆكێ و دێ هێتە دابەشكرن.
رێڤەبەرێ سایلۆیا شێخان تەكەزكر، ل ساڵا 2024 حۆكمەتا ئیراقێ گەنمی ژ سایلویێن نەینەوا بۆ كارگەهێن چێكرنا ئاری ل دهۆكێ دئینان، لەورا هندەك گەنمێ ساڵا 2024ێ دناڤ سایلویێن پارێزگەها دهۆكێ مایە، لێ ئەڤ سالە پتر گەنم ژ سایلویێن دهۆكێ بۆ كارگەهان دێ هێتە رەوانەكرن و نوكە ئەم بەرهەڤیێن بەلاڤكرنا پشكا 10 یا ئارێ ئەرزاقی دكەین.