سندس سالح سلێڤانه‌یی:

شێوه‌كار(دنیا ده‌هام) كو خه‌لكا پارێزگه‌ها دهۆكێ یه‌ و هه‌ڤژینێ وێ ژی شێوه‌كاره‌، د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: دژیه‌كێ بچووك دا من حه‌زا چێكرنا وێنه‌یان هه‌بوو، له‌ورا من به‌رده‌وام وێنه‌ ل سه‌ر كاغه‌ز و دیواران چێدكرن، مالا مه‌ د هاریكاربوون و هه‌رده‌م بۆ من كاغه‌ز و ره‌نگ دئینان، ل قوتابخانێ ژی ماموستا و هه‌ڤالێن من یێن قوتابحانێ كه‌یفا وان ب وێنه‌یێن من دهات و دگۆتنه‌ من ل پاشه‌رۆژێ تۆ دێ بیه‌ شێوه‌كاره‌كا باش و دڤێت تۆ یا به‌رده‌وامبی و ئه‌ڤ چه‌نده‌ بۆ ئه‌گه‌ر كو ده‌ستا ژ وێنه‌چێكرنێ به‌رنه‌ده‌م و پتر خوه‌ ماندی بكه‌م و هه‌لبه‌ت پشته‌ڤانێن هه‌ره‌ سه‌ره‌كی ل ده‌ستپێكێ مالا من بوون كو ئه‌وان ئاسانكاری و رێخۆشكرن بۆ من په‌یدادكرن و نوكه‌ ژی هه‌ڤژینێ منه‌، كو ئه‌و ژی شێوه‌كاره‌ و ئه‌وی هێزه‌كا دی دا من كو یا به‌رده‌وامبم و داهێنانێ دكارێ خوه‌ دا بكه‌م و نوكه‌ وه‌ك شێوه‌كاره‌كا ژن یا دلخۆش و ئارامم كو شیایمه‌ هه‌تا راده‌یه‌كی خزمه‌تا هونه‌رێ كوردی و پارێزگه‌ها دهۆكێ بكه‌م.
هه‌روه‌سا گۆت: كلتۆر و خه‌باتا ملله‌تێ كورد پتر ئاز هاندانم وێنه‌یێن سه‌ركرده‌ و قه‌هره‌مانێن كورد چێكه‌م و هه‌ر وێنه‌یه‌كی ته‌كنیكا خوه‌ یا جودا هه‌یه‌ و ل ده‌مێ چێكرنێ هه‌موو هزرا خوه‌ دده‌مێ، هه‌روه‌سا خوه‌ پێڤه‌ دوه‌ستینم داكو وێنه‌ ل دووف دلێ كه‌سێ داخوازكری هه‌روه‌سا ل دووف دلێ من ژی بهێت، چنكو ناڤ بۆ منه‌ و من نه‌ڤێت وێنه‌یێن ئه‌ز چێدكه‌م كوالیتیا وان یا باش نه‌بیت، یانژی د ئاسته‌كێ باش دا نه‌بیت.
د لایه‌كێ دی دا خانما شێوه‌كار(دنیا ده‌هام) گۆت: دپتریا كه‌ڤالێن خوه‌ دا ئه‌ز ره‌نگێ شین بكاردئینم، چونكۆ ره‌نگێ شین پتر هیڤیا د دلێ مندا چێدكه‌ت و من دڤێت بێژم ئه‌و ئاسته‌نگێن دكه‌ڤنه‌ درێكا مه‌ دا وه‌ك شێوه‌كارێن ژن پتر دارایی نه‌، چنكو ئه‌م به‌رده‌وام پێدڤی ب كه‌ره‌سته‌یێن چێكرنا وێنه‌ و كه‌ڤالان دبین وه‌ك (ره‌نگ، فرچه‌، بۆیاغ، قۆماش، … هتد) و هه‌كه‌ جهه‌ك بۆ مه‌ دابین بكه‌ت بێگۆمان دێ بارێ مه‌ سڤككتر لێ هێت، هه‌روه‌سا دێ هه‌ست پێ كه‌ین كو گرنگیا ب مه‌ دهێته‌ دان و هه‌كه‌ رێخۆشكرن و ئاسانكاری هه‌بوون ل وی ده‌می دێ پتر داهێنانێ كه‌ین و به‌رهه‌مێن باشتر و بهێزتر چێكه‌ین.
ده‌رباره‌ی ئاستێ هونه‌رێ شێوه‌كاری ب تایبه‌ت ل ده‌ڤه‌را به‌هدینان، شێوه‌كارا ناڤهاتی گۆت: ئه‌ز ئاستێ هونه‌رێ شێوه‌كاری ب باشی دبینم، چنكو مه‌ شێوه‌كارێن باش و خودان ئه‌زموون هه‌نه‌، لێ دیسان دێ بێژم ئه‌و ژی پێدڤی ب پشته‌ڤانیێ نه‌، چنكو ل وه‌لاتێ مه‌ هه‌موو هونه‌رمه‌ند پێدڤی ب پشته‌ڤانیێ نه‌، چنكو هه‌كه‌ هونه‌رمه‌ندی مووچه‌یه‌ك یان داهاته‌ك هه‌بیت ژی ب زۆری بشێت خێزان و زارۆكێن خوه‌ پێ بخودان بكه‌ت و گه‌له‌ك هونه‌رمه‌ند مه‌ هه‌بووینه‌ هنده‌ك كێماسی ل مالا خوه‌ هێلاینه‌ دا بشێت گۆژمه‌كێ پاره‌ی بدانه‌ لایه‌كی و كاره‌كێ هونه‌ری پێ ئه‌نجام بده‌ت و مخابن هه‌كه‌ پاره‌ك بۆ هاتبیت ژی گه‌له‌كێ كێم بوویه‌.
ل دووماهیێ گۆت: كه‌ڤالێن هونه‌رمه‌ند (ڤان كۆخ و كلودیۆ مونی) گه‌له‌ك كارتێكرن ل من كریه‌ و شێواز و ته‌كنیكێن وان ئه‌ز ب بوارێ شێوه‌كاری ڤه‌ بریمه‌ و په‌یا من بۆ وان كه‌سان ئه‌وه‌ ئه‌وێن ژنوو ده‌ست ب كارێ شێوه‌كاری دكه‌ن ب چاڤه‌كێ بچووك نه‌ سه‌حكه‌نه‌ كارێ خوه‌، به‌لكو هه‌رده‌وام خوه‌ مه‌زن ببینن و د به‌رده‌وامبن ل سه‌ر وێ هیڤیا دناڤ ناخێ هه‌وه‌ دا،چنكو به‌ردوامی دان د وێنه‌كێشانێ دا دێ بیه‌ ئه‌و كه‌س یێ كو ته‌ خه‌یالا خوه‌ وێنه‌كری.

دهۆك، لەزگین جوقی

ئەڤرۆ، بێوار حەمدی:
شێوەکارێ گەنج (ئەفسان مەهدی) د دیدارەکێ دا بۆ بەرپەرێ هونەری یێ ڕۆژناما ئەڤرۆ گۆت: پتری شەش سالایە ئەز کارێ هونەرێ شێوەکاریێ دکەم و من ب ئەکادیمی ژی خواندیە کو دەرچوویێ پەیمانگەها هونەرێن جوانم.
ناڤهاتی دبەردەوامیا ئاخفتنا خوە دا گۆت ژی، پتریا وێنەیێن من (سرۆشتی، ستیل، لایڤ، دیوار بەندن) لێ حەز ژێکرنا من بۆ وێنەیێن دیواربەندان گەلەکە و
ئەز دگەل دا کارێ پەیکەران ژی دکەم و ل سەر کارێ خوە یێ بەردەوامم.
ئەفسانی ئەو چەندە ژی دازانین کو پشکداری د گەلەک پێشانگەهێن شێوەکاری دا کریە و گەلەک کەڤاڵێن خوە فرۆتینە لێ ب مخابنی ڤە گەلەک کەس بهایێ هونەرێ شێوەکاریێ نوزانن و گۆت: ئەز گەلەک ب شێوەکارێ جیهانی «لویس داڤید» یێ داغبارم و کەڤالێن وی گەلەک کارتێکرن ل من کریە.

هیلین سالم:

زارڤەکەرێ كورد و كورێ باژێرێ دهۆکێ جاسم زەینەل یێ بەرنیاس ب جاسم مەمانی د دیدارەکێ دا بۆ روژناما ئەڤرۆ دیار کر هەر ژ زارۆکینی حەزا کارێ سینەمایی و فلم سازییێ هەبوویە و ئەڤ حەزە لدەف مەزن بوویە تا سالا ١٩٩٦ شیا هیڤیا خوە بجهـ بینیت و پشکداری د چەند پارچە زارڤەکرنێن چیرۆکێن باپیری دا کریە کو لوی دەمێ ل تەلەفزیۆنا KTV دهاتنە پەخشکرن.
جاسمی گوت ژی تا نوکە من گەلەک رول گێراینە و چ ئاستەنگ بۆ من دروست نەبووینە و ئەگەر گرنگی ب هونەرێ کوردی بهێتەدان هونەرمەند و زارڤەکەر دشێن خوە ئاڤابکەن و رۆل د سینەمایێن بیانی ژی دا بگێرن و هەر رەخنەکا لمن بهێتە گرتن ب سنگەکێ بەرفرەهـ وەردگرم و د نوکە دا درامایەک درێ دایە و روڵەک بۆ من هاتیە پێشینیارکرن ئەگەر من خوە دوی رولی دا دیت دێ گێرم، گۆت ژی تا نوکە من رۆل د هەشت درامایان دا گێرایە دگەل دوو فلمێن درێژ و سێ کورتە فلمان دا لێ د دراما خەمو خەم دا ئەس بەرنیاس بووم تا هێدی هێدی ل دراما بارۆڤە پتر بەرنیاس بووم.
ژ گرنگترین زارڤەکرنێن جاسمی کرین زارڤەکرن بۆ د بەرنامێ باغێ بینەران دا ل سالێن ١٩٩٧و ١٩٩٨ و ل سالا ٢٠٠١ ژی دا وەک هاریکارێ دەرهێنەری بویە د فلمێ بازەبەز دا و د فلمێ ئو نێرگز بشکڤین دا ل سالا ٢٠٠٤. ل سالا ٢٠٠٥ دەست ب کارەکێ نوی یێ هونەری کریە ئەوژی دوبلاژکرنا فلمێن هندی بۆ زمانێ کوردی بوویه و زارڤەکرن د سترانا بەیتا لالش یا حەسەن شەریفی ژی دا کریە. جاسمی گۆت هیڤیا من ئەوە پتر پشتەڤانی ل هونەر و سینەما کوردی بهێتە کرن چونکۆ ئەم ژی خودان زارڤەکەر و هونەرمەندێن گەلەک باشین.