ب فەرمی لژنەیا ڕێكاری و یاسا و سزادان یا فدراسیۆنا فوتبۆلا كوردستانێ‌ كۆمبوونا خوە یا ئاسایی ئەنجامدا تێدا بڕیارێن سزایێ ل سەر چەند یانەیان دەركر ژ وانا یێن پارێزگەهێ‌، ئەڤچەندە هات پشتی ب دووماهی هاتنا یاریێن گەڕا سێیێ‌ ژ خولا پلا ئێكا كوردستانێ‌ و بڤی شێوەیی.
دەرئەنجامێ‌ ئالۆزی و روودانێن دیارییا دناڤبەرا یانەییا شێخان و بەردەڕەش ژ گەڕا دویێ‌ یا خولا پلا ئێك لژنەیا ناڤهاتی بڕیار دا ب سزادانا ڕاهێنەرێ‌ یانەیا بەردەڕەش سەلۆان محەمەد ب دووریئێخستنا وی بۆ دو یاریان، ژ ماددێ‌ شەش برگە(ئە) ژ سزایێن كارگێری و ڕاهێنەران، هەروەسان سزادانا یاریزانێ‌ شێخان نزار سەعید ب دوورئێخستنا وی بۆ ئێك یاری ژ مادێ‌ حەفت برگە(ئە).
ژلایەكێ‌ دووڤە لژنەیا سزایان سكالایا سەپەرشتێ‌ تیما یانەیا ئاكرێ‌ هۆزەڤان زاهد ڕەدكر و بڕیارا سزایێ ل سەر بەردەوام بمینیت، ژبەركو بڕیارا سزایێ 48 دەمژمێر بۆ تەانا تێهەلچوونێ‌ سەرڤەچووبوویە، هەر د سزایێن هاتینە دەركرن ستاڤێ‌ ڕاهێنەرێن یانەیا شەقلاوە وكارگوزارێ‌ تیمێ‌ سێیور سابر ب ڕاگرتن و پشكدارییا وان د هەرچالاكییەكا فدراسیۆنا فوتبۆلا كوردستانێ‌ بۆ دو وەرزان ئانكو هەتا وەرزێ‌ 2026-2027ێ‌، هژمارتنا یانەیا شەقلاوە ب خوسارەتی سێ‌ ب چنە بەرانبەر یانەیا بازیان، سزادانا یانەیا شەقلاوە ب دو ملیۆن دیناران، ئەڤ بڕیارە بۆ تێكەلهچوونێ‌ دهێتە دوبارەكرن.
ژلایەكێ‌ دووڤە فدارسیۆنا فوتبۆلا كوردستانێ‌ ب توندی ئیدانا هەموو ئەوان ڕەفتاران دكەت ئەوێن دوور ژ وەرزشێ‌ دناڤا چەند یاریگەهاندا هاتیە كرن تایبەت ئەوێن دەستدرێژیا جەستەیی و ئاخڤتنێن نەجوان بەرانبەر سەرپەرشت و دادڤانێن یاریێ و دوپاتكر ئەو دێ‌ ڕێكارێن توند هەبن بەرانبەر هەر ڕەفتارەكا كرێت و نا هێتە قەبوولكرن ژ هەر ئێكێ‌ تێكدانێ‌ بكەت.

رەمەزان زەكەریا

د داخویانیەكێ دا پەیڤدارێ یانەیا ئاكرێ یا وەرزشی ئاشكراكر ب فەرمی كارگێرییا یانەیێ‌ یونس سلێمان ل جهێ‌ ڕاهێنەرێ‌ پێشتر هیوار مستەفا هاتە دانان، پشتی وەكهەڤییا تیما وان یا فوتبۆلێ‌ بەرانبەر یانەیا پێشمەرگەیا هەولێرێ‌ ب گۆلەكێ‌ ژ گەڕا هەشتێ‌ یا خولا پلا نایابا كوردستانێ‌، ئێكسەر ڕاهێنەر هێور مستەفا دەست ژ كار كێشانا ‌خوە پێشكێشی كارگێریا یانەیێ كر و دەستەیا كارگێری دەست ژكاركێشانا وی پەسەندكر.
زێدەتر سوهەیب عەلی بۆ رۆژناما ئەڤرۆ گۆت: یونس سلێمان دێ‌ ئەركێ‌ ڕاهێنەراتییا تیما مە یا فوتبۆلێ‌ ڕابیت بۆ یاریێن مایی ژ خولا كوردستانێ‌ ل جهێ هێور مستەفا و كارگێریێ‌ باوەرییا موكم دایی، هیڤیدارین گوهۆڕینا ڕاهێنەری ببیتە ئەگەر كو ئەنجام باش بن و پشتەڤان دلخوەش ببن، چەندین یاریە یانەیا ئاكرێ پتریا یاریا وەكهەڤبوون هەبوویە و نەشیایە سەركەفتنێ تۆمار بكەت و مەباوەری ب شیانێن وی هەیە كو دێ‌ تیما مە بەر سەركەڤتنان بەت.
ژلایەكێ‌ دووڤە ناڤهاتی دیاركر تیما ئاكرێ‌ بێ‌ هیڤی نابیت و دێ‌ ل سەر ئارمانجا خوە یا ئێكێ‌ ڕژد بیت ئەوژی هەڤڕكی بۆ ناسناڤێ‌ خولێ‌ یە، دێ‌ هەموو بزاڤان كەت ئێدی چو خالان ژ دەست نەدەت بەلكو شەری بۆ سەركەڤتنان بكەن وەكو كارگێرییا یانەیێ‌ ژی یا پێدڤی دێ‌ بۆ كەت.
بۆ زانین تیما ئاكرێ‌ ب كۆمكرنا نەهـ خالان ل ڕێزا نەهێ‌ دهێت ژ سەركەڤتنەكێ‌ و شەش وەكهەڤی و ئێك خوسارەتی، یارییا بهێت دێ‌ ل رۆژا پێنچ شەمبی مێڤاندارییا یانەیا شێروانە كەت.

چاڤەڕێ‌ دهێتە كرن ئەڤرۆ دەست ب هەڤڕكیێن كۆپا نەتەوەیێن ئافریقیا بۆ گەڕا 35ێ‌ یا فوتبۆلێ‌ بهێتە كرن و یارییا مەغرب بەرانبەر كۆمۆرس(جزرالقمر) بكەت ئەوا 24 هەلبژارتی پشكدارن و بەردەوامبیت هەتا 18ێ‌ كانوونا دویێ‌ یا سالا 2026ێ‌، هاتینە بەلاڤكرن ل سەر چار كۆمان بڤی شێوەیی.
كۆما ئێكێ‌: مەغرب، مالی، زامبیا، كۆمۆرس.
كۆما دویێ‌: مسر، باشۆرێ‌ ئەفریقیا، ئەنگۆلا، زیمبابۆی.
كۆما سێیێ‌: نێجیریا، تۆنس، ئۆگەندا، تەنزانیا.
كۆما چارێ‌: سینیگال، كۆنگۆ، بەنین، بۆتسۆانا.
كۆما پێنجێ‌: جەزائیر، بۆركینا فاسۆ، گینیا، سۆدان.
كۆما شەشێ‌: كۆتیڤۆار، كامیرۆن، گابۆن، مۆزەنبیق.
یاریێن سوبەهی: مالی-زامبیا، پێنجێ‌ ئێڤاری، باشۆرێ‌ ئەفریقیا- ئەنگۆلا ل هەشتی شەڤ، مسر-زیمبابوی ل 11ێ‌ شەڤێ‌ هێتە كرن.
د ماوەیێ‌ گەڕا ئێكێ‌ دا 36 یاری دێ‌ هێنە كرن، ئێكەم و دوەمێن هەر كۆمەكێ‌ دگەل باشترین چار هەلبژارتیێن ڕێزێن سێیێ‌ دهێن دێ‌ دەربازبنە قۆناغا 16ێ‌، ئەوا دێ‌ یاریێن وان ب شێوەیێ كەتنا ئێكجاركر هەتا یارییا دووماهیێ‌ بەردەوامبن.
هەژی گۆتنێ‌ یە هەلبژارتیێ‌ مسرێ‌ خودانا پترترین ناسناڤە ئەوا حەفت جاران بوویە قارەمان، هەلبژارتیێ‌ كامیرۆن پێنچ ناسناڤ هەنە، غانا چار، هەر ئێك ژ نێجیریا و كۆتیڤۆارێ‌ سێ‌ ناسناڤ هەنە.

پەروین سەلاح

گواردیۆلا ڕاهێنەرێ مانچستەر ستی دیارکربوو د ڤی دەمی دا چوونا وی ژ تیمێ نە ل سەر مێزێ یە، چونکی وی گرنگی دایە ڤەگەراندنا قارەمانییا خولا ئنگلتەرایێ، ئەوێ گرێبەستا وی هەتا دووماهییا وەرزی 2026-2027، لێ راپۆرتان ئاماژە ب وێ چەندێ کریە کو کارگێرییا ستی ناڤێن جێگر دبینیت ئەگەر گواردیۆلایی بریار دا ل دووماهییا ڤی وەرزی بچیت.
ئینتسو مارێسکا هاریکارێ بەری یێ گواردیۆلا و ڕاهێنەرێ نوکەیێ چێلسی ژ گرنگترین بەربژاران بۆ وەرگرتنا ڤێ ئەرکێ، ژلایەکێ دووڤە غواردیۆلا، د دەمێ ئاخفتنا خوە دگەل رۆژنامەڤانان چ نیشانەک لسەر چوونا نەدا.
گواردیۆلا د ئاخفتنا خوە دەربارەی پاشەرۆژا خوە گۆت: یانە دڤێت ئامادە بیت، لێ ئەڤ بابەتە نها نەهاتیە بەحسکرن، هێشتا 18 مەهێن دی ماینە، گەلەک دلخۆشم ب هیڤیمە بۆ پێشکەفتنا تیمێ و هەبوونا خوە ل ڤێرێ سەرفەرازم.

رۆژنامەیا لاگازیتا دیلۆ سپۆرت یا ئیتالی دیار كر یانەیا رۆما بڕیار دایە گرێبەستا ستێرێ‌ خوە یێ‌ ئەرجەنتینی پاولۆ دیبالایی بۆ وەزەكێ‌ دی نوو نەكەت، ئەڤچەندە بوویە ئەگەر یاریزان نەچاركرییە هزر دچوونێ‌ دا بكەت.
هەروەسان دیاركر ڤێ‌ دەنگۆباسی دەرگەهێ‌ دانۆستاندنێ‌ بۆ دو یانەیێن سعۆدیێ‌ ڤەكەن و ئۆفەرێن مەزن پێشكێشی دیبالایی بكەن ژ وانا 30 ملیۆن یۆرۆ، ئەڤ ئۆفەرە بوویە ئەگەر یاریزانێ‌ ئەرجەنتینی ژ بەرزەبوونێ‌ قۆرتالبكەت كو ددەمەكی دا گرێبەستا وی وەكو مووچە بتنێ‌ بوو دگەل رۆما ئەوژی هەشت ملیۆن یۆرۆ بوون، هەروەسان دهاتە پێشبینیكرن دیبالا بچیتە خولا ئەرجەنتینی پشتی ب دووماهی هاتنا گرێبەستا وی ئەوا دێ‌ ل هاڤینی ب دووماهی هێت.