دوهی ب فەرمی پرۆسێسا هەلبژارتنێن یانەیێن وەرزشی یێن ل سنۆری پارێزگەها دهۆكێ‌ ب دووماهی هاتن ئەوا ل دووڤ خشتەیەكێ‌ ڕێكخستی هاتبوو دانان ژبۆ هەلبژارتنێن كارگێریێن نوو بۆ چار سالێن داهاتی ئەوا ژلایێ‌ لژنەیەكا هەڤپشك یا ڕێڤەبەرییا گشتی یا وەرزشی ل هەرێما كوردستانێ‌ و ڕێڤەبەرییا وەرزشی یا دهۆكێ‌ هاتبوو ئەنجامدان.
ئەو یانەیێن هەلبژارتنێن خوە كرین، هەر ئێك ژ یانەیا سێمێل، ئافرەتێن دهۆك، سەنحاریب، پۆلیتەكنیك، میدیا بۆ خودان پێدڤیێن تایبەت، فرۆكەڤانییا دهۆك، ئامێدیێ‌، شێلادزێ‌، شێخان، بەردەرەش و یانەیا بجێل، دەرئەنجامێ‌ هەلبژارتنان هەموو یانەیان سەرۆك یانەیێن خوە دوبارە هەلبژارتن پتنێ‌ یانەیا ئافرەتێن دهۆك نەبیت، لێ‌ گوهۆڕین د پرانییا ئەندامێن یانەیێن وان دا پەیدابووینە.
ژلایەكێ‌ دووڤە ژێدەرێن باوەرپێكری بۆ رۆژنامەیا ئەڤرۆ دیار كرن، هەلبژارتنێن یانەیا گارە نا هێنە ئەنجامدان بەلكو دێ‌ دەستەیەكا بەروەخت بۆ ماوەیێ‌ سێ‌ مەهان دانن، پشتی كو بڕیار هاتیە دان یانەیا گارە ببیتە پشكەك سەر ب ئێكەتیا لاوان پێخەمەت زێدەتر پشتەڤانی بۆ یانەیێ‌ هەبیت و بڕیارە دەستەیەك بۆ بهێتە دان و دەست ب كارێ‌ خوە بن.
هەمان ژێدەری ئەوچەندە ژی خۆیاكر یانەیا ئاكرێ‌ ژی دێ‌ دەستەیەكا بەروەخت بۆ هێتە دانان پشتی ل سەر داخوازییا دەستەیا گشتی یا یانەیێ‌ و پتر دەلیڤە دان بۆ ژێگرتنا كارگێرییەكا نوو، هەروەسان خۆیا كر هەلبژارتنێن یانەیا تەناهیێ‌ ژی هاتنە پاشئێخستن بۆ دەمەكێ‌ دی و دبیت ئەڤ هەلبژارتنە پشتی حەفتییەكا دی دگەل هەلبژارتنێن یانەیێن زاخۆ و باتیفا بهێنە كرن.
بۆ زانین ل گۆلانا بۆری یانەیا دهۆك هەلبژارتنێن خوە ئەنجامدابوون ئەوا دوبارە كارگێرییا چار سالێن بۆری هاتبوو نە هەلبژارتن دگەل زێدەبوونا دو ئەندامێن دی، ئەڤ چەندە ژی هات دەرئەنجامێ‌ ئەوان پێشكەڤتن و دەستكەڤتێن یانەیێ‌ ل سالێن بۆری دا هاتین تایبەت ناسناڤێ‌ كۆپا ئیراقێ‌ و كۆپا كەنداڤی ب سەرۆكاتییا د. عەبدوللا جەلال ئەوێ‌ گوهۆڕینەكا باش د یانەیێ‌ دا كری.

عەیشا عەجیب.

د دیدارەکێ دا ئەیهەم جامی سەرۆکێ یانەیا باتیفا بۆ ڕۆژنامەیا ئەڤرۆ بەحسی پڕۆژە و بەرھەڤییێن تیما فوتبۆلا یانەیێ بۆ خۆلا نوو یا پلە دو یا کوردستانێ کر و ئاماژە ب چەند خالان کر و گۆت: یانەیێ ل دویڤ شیانێن خۆ یێن دارایی یاریزانێن باش بەرھەڤکرینە و د نوکە دا دو یاریێن ھەڤالینییێ ئەنجامداینە.
هەروەسان ناڤهاتی گۆت: بۆ وەرزێ نوو یێ خولێ دێ پشت گەرمی ب کوڕێن باژێرێ خۆ کەین وەكو یانەیا باتیفا د ئەڤ سالە دا کار ل سەر هندی کەن پتر گرنگییێ بدەنە گەنجێن دەڤەرێ، ھەر چەندە دەم گەلەك یێ مایی ژی لێ ئەو پێشبینی دکەن ئەو گەنج دێ ھیڤیێن وان بجھ ئینن هەر ژ سالا ئیکی هەتا نوکە سەرکەفتنا یانەیێ ژ پلە دو بۆ پلە ئێك، ئەڤجا ئەو ناڕاوەستن هەتا بگەھنە ئارمانجا خۆ.
ئەیهەم جامی ئاشکرا ژی کر: ژ بەر ئەگەرێ گیرۆبوونا خۆلا پلە دویێ یا کوردستانێ ھەر چەندە ھێشتا گەلەک یامایی ژی ژ بەر خۆلا نایابا پلە ئێک دەست پێ دکەت پشتی ھنگێ یا پلە دویێ یا کوردستانێ یە، ژ بەر ڤی ئەگەری بۆ دەمەکێ دڕێژ چاڤەرێ بمینین ئەڤەژی دبیتە ئاستەنگ و ئاڕیشە بۆ یانەیێ دروست ببن و یاریزانێن باش کێم بمینن، سەڕەڕای ھندێ نەبوونا داھاتەکێ باش ژی کارتێکرنێ لمە دکەت، ئەگەر ھەیڤانە داھاتەك بۆ یانەیێ ھاتبایە مەزاختن دا باشتر بیت لێ ژ بەر ھندێ کارتێکرنێ د پلانێ دا دکەت ئەم نەشێن ١٠٠٪‏ پلان بجھ بینین. ھەر چەندە سۆز ب وان ھاتییە دان پشتەڤانییا وان بھێتە کرن و چاڤەڕێنە، مە گازندە گەھاندینە جھێن شولە ژێ خۆ ل قەزا باتیفا بکەنە خودان و قایمقامێ قەزا باتیفا و ھەروەسا ئیدارەیا سەربەخۆیا زاخۆ دکەن پشتەڤانییا یانەیێ بکەن ئەڤ سالە بشێن دلێ حەزژێکر و پشتەڤانێن خۆ خۆش بکەن.
سەرۆکێ یانەیێ گۆت: هەژی گۆتنێ یە ئەڤە چار سالە یانەیا باتیفا ھاتییە دامەزراندن و سوپاسدارێن حکومەتا ھەرێما کوردستانێ و سەرپەڕشتێ ئیدارەیا سەربەخۆیا زاخۆ گوھدار شێخۆ و قایمقامێ قەزا باتیفا و هەر کەسێ ھاریکار و پشتەڤانییا یانەیێ کری و بوویە دەرگەهەك هەتا نوکە یانە بڕێڤە بچیت.

د دیدارەكێ‌ دا هەژار ئیسماعیل دادڤانێ‌ نێڤدەولەتی بۆ یارییا تێنسا ل سەر مێزێ‌ و كوڕێ‌ باژێرێ‌ دهۆكێ‌ كەیفخوەشیا خوە دیار كر پشتی شیایی ب وەكو دادڤانەكێ‌ سەرەكی شیایی هەڤڕكیێن قارەمانییا رۆژئاڤا ئاسیا بۆ ژیێن جودا بڕێڤەبرییە، ئەوا ب پشكدارییا 160 یاریزانێن كوڕ و كچ یێن هەلبژارتیێن، كوردستان، ئیراقێ‌، هندستان، ئیران، ئوردن، قەتەر و لبنان ل باژێرێ‌ سلێمانیێ‌ هاتبوو كرن.
زێدەتر ناڤهاتی بۆ رۆژنامەیا ئەڤرۆ گۆت: هەرچەندە وەكو دادڤانێن نێڤدەولەتی پشكداری د چەندین قارەمانیێن دەرڤە دا كرییە و چەندین قارەمانیێن جودا ل ناڤخوەیا كوردستانێ‌، ئیراقێ‌ و دیسان ب سەركەفتیانە بڕێڤەبرینە لێ‌ قارەمانییا ئەڤجارە یا رۆژئاڤا ئاسیا جودا بوو ژبەركو قارەمانییەكا ب هێز بوو و دیسان وەكو دادڤان مە مفایەكێ‌ گەلەك باش ژێ‌ وەرگرت، تایبەت لایەنێ‌ پێزانین نوو و دووماهی پێشهاتەیێن یاسایی كو بەری دەستپێكرنا قارەمانیێ‌ پشكداری خولەكا نێڤدەولەتی بووین.
هەژار ئیسماعیلی ئارمانجا خوە بۆ پاشەرۆژێ‌ دا دیاركرن و گۆت: هەر وەرزشڤانەك حەز دكەت پێشكەفیت و پشكداری د قارەمانیێن مەزن دا بكەت ، ئارمانجا من ژی بشێم پشكداریێ‌ د قارەمانیێن مەزن دا بكەم وەكو ئۆلمپیادا و قارەمانیێن عەرەبی و ئاسیا سەرباری من چەندین پشكداری هەبوون لێ‌ گەشبینم دێ‌ یێن مەزنتر ژی پشكداربم و گۆت: ئەز ژی هەمی بزاڤان دكەت و خوە د وەستینم هەتا ئاستێ‌ خوە یێ‌ دادڤانیێ‌ ب وێرەكییا دانا بڕیاران و وەرگرتنا دووماهی پێشهاتەیێن یاسایا تێنسا ل سەر مێزێ‌ وەربگرم.