شێخان، بارزان مزووری:

شاندەكێ ژوورا بازرگانی یا وەلاتێ توركیا دوهی 30/6/2025 سەرەدانا دەڤەرداریا شێخان كر و ل گەل بریكارێ وەزارەتا چاندنێ یا حكومەتا هەرێما كوردستانێ و دەڤەردارێ‌ شێخان و جۆتیارێن دەڤەرێ و بازرگان و خودان كاران كۆمبوو.
سەردار یەحیا، دەڤەردارێ‌ شێخان بۆ رۆژناما ئەڤرۆ دیار كر، ئەڤە جارا دویێ‌ یە ئەڤ شاندە سەرەدانا دەڤەرداریا شێخان دكەت و ل گەل وان كۆم دبیت و گۆت: «چەندین گرێبەستێن بازرگانی د ناڤبەرا هەردو لایان دا هاتنە ئیمزاكرن، ژ بەركو شێخان بۆ وەلاتێن جیران گەلەك یا گرنگە ژ روویێ چاندنێ و پترۆلێ، ب تایبەت بەرهەمێ پتاتان ڤە».
سەرۆكێ شاندێ بازرگانی یێ وەلاتێ توركیا بۆ رۆژناما ئەڤرۆ گۆت: «ئەز ل 16 باژێڕێن ئیراقێ گەریایمە، باژێڕێن كوردستانێ ژ باژێڕێن دی یێن ئیراقێ‌ پێشكەفتیترن و 10 سالان ل پێش باژێڕێن دی یێن ئیراقێ‌ نە، دیسا ل پێش چاڤێن من، شێخان وەلاتێ هۆلەندا یێ‌ بچووكە بۆ چاندێ، لەوما بۆ مە یا گرنگ بوو، سەرەدانا ڤێ دەڤەرێ بكەین».

زاخۆ، دلۆڤان هالۆ:

سەگڤان سەبری، دەڤەردارێ‌ باتیفا ب وەكالەت دوهی 30/6/2025 ل گەل دام و دەزگەهێن حكومی یێن پەیوەندیدار ل دۆر بابەتێن گەشتوگوزارێ ل سنۆرێ‌ دەڤەرداریێ‌ كۆمبوو.
دەڤەردارێ‌ باتیفا د كۆمبوونێ دا ئاماژە ب وێ چەندێ كر كو دەڤەرداریا باتیفا دەڤەرەكا گەشتیاری یە و نێزیكی پێنجی جهێن گەشتیاری لێ هەنە، لەورا دڤێت گرنگی پێ بهێتەدان، وەكو پێشوازیكرن ل گەشتیاران ب باشترین شێوە و پاقژ ڕاگرتنا باژێڕی و جهێن گەشیاری.
سەگڤان گۆت: «پێدڤیە دام و دەزگەهێن ئێمناهیێ و ساخلەمیێ 24 دەمژمێران د ئامادەباشیێ دابن و تیمێن نقۆمڤانی ژی ل جهێن گەشیاری بەرهەڤ بن بۆ هەر حالەتەكێ نەچاڤەرێكری».

هەولێر، قائید میرۆ:

پەیڤدارێ دەستەیا گشتیا وەبەرهێنانێ ئاشكرا كر، حوكمەت دێ پێداچوونێ بۆ خزمەتگوزاریێن یەكەیێن وەبەرهێنانێ كەت و ل گورەی بهایێ دیاركری، كرێیا خزمەتگوزاریان دێ‌ هێتە وەرگرتن و دبێژیت: ئەو كێماسیێن هەین، دڤێت بهێنە چارەسەركرن.
بەرگەشت ئاكرەیی، پەیڤدارێ دەستەیا وەبەرهێنانێ بۆ رۆژناما ئەڤرۆ دیاركر، لیژنە هاتینە پێكئینان و بڕیارە پێداچوون د خزمەتگوزاریێن پڕۆژەیێن وەبەرهێنانێ دا بهێتە كرن و ئاستێ خزمەت گوزاریان بهێتە باشتركرن و گۆت: «راستە هندەك جاران گازندە ژ لایێ وەلاتیانڤە دهێنە كرن، بەلێ ئەم وەكی دەستە رژدین ل سەر نەهێلانا وان كێماسیێن ل پڕۆژەیێن ئاكنجیبوونێ هەین و رێنمایی دێ دەركەڤن بۆ باشتركرنا رەوشا خزمەتگوزاریان ل یەكەیێن وەبەرهێنانێ».
بەرگەشت ئاكرەیی گۆتژی: «ل گەل پێداچوونێ د خزمەتگوزاریێن یەكەیێن ئاكنجیبوونێ دا، پێداچوون د بهایێ خزمەتگوزاریان ژی دا دێ هێتە كرن، ئانكو نابیت چو كۆمپانیەك پارەیێ زێدە وەربگریت، ئەڤ بهایێ ژ لایێ حوكمەتێ ڤە دهێتە دیاركرن و پشتی پێداچوونێ بهایێ گونجای دێ هێتە دانان و پێدڤیە هەموو پڕۆژە ب رێنمایی و بڕیارێن حوكمەتا هەرێما كوردستانێ پێگیربن».

رەمەزان زەكەریا:

بۆ جارا ئێكێ سیستەمێ نو یێ دەرئێخستنا مۆلەتا شوفێریێ ل دەڤەرداریا ئاكرێ كەفتە كاری و شوفێر ب رێكا وی سیستەمی دێ مۆلەتا هاژووتنا ترۆمبێلێ دەرئێخن.
ل دەستپێكا ئەڤ سالە وەزارەتا ناڤخۆ یا حكومەتا هەرێما كوردستانێ بڕیار دا شێوازێ وەرگرتنا مۆلەتا شوفێریێ بهێتە گوهۆڕین و ب شێوازەكێ نوو بهێتە دروستكرن، بۆ وێ چەندێ شوفێر پتر گەل ترافیكێ بمینیت، پشكداری كورسەكێ تیۆری و كورسێ راهێنەرێن شوفێریێ بیت بۆ دروستكرنا مۆلەتا شوفێریێ.
نوكە ل ئاكرێ دروستكرنا مۆلەتا شوفێریێ ب سیستەمێ نوو كەفتە كاری و پێدڤیە شوفێر پشكداری خۆلان ببیت، پاشی ترایێن شوفێریێ ئەنجام بدەت.

ئامێدیێ، مەحمود نهێلی:

ل سنۆرێ‌ ناوچەداریا چەمانكێ‌ هەژمارەكا جادەیێن ناڤخوەیی دهێنە چێكرن و نوكە پڕۆژە د قووناغێن دوماهیێ‌ دایە.
ئیسماعیل حەمید، رێڤەبەرێ ناوچەداریا چەمانكێ بۆ رۆژناما ئەڤرۆ دیاركر، نوكە هەژمارەكا پڕۆژەیێن خزمەتگوزاری ل سنۆرێ‌ ناوچەداریا چەمانكێ‌ دهێنە بجهئینان، ژ وان ژی: پڕۆژەیێ‌ چێكرنا جادەیێن ناڤخوەیی یە ل سەنتەرێ‌ ناوچەداریێ‌ و گۆت: «پڕۆژە ژ چێكرنا جادەیێن ناڤخوەیی یێن سەنتەرێ ناوچەداریێ‌ و دەوروبەران پێك دهێت و پڕۆژە د قووناغا دوماهیێ‌ دایە».
ناڤهاتی ئاشكرا ژی كر، پڕۆژە ب گوژمێ نێزیكی 191 ملیۆن دیناران دهێتە بجهئینان و گۆت: «د بەرنامەیێ‌ مە دایە چەندین پڕۆژەیێن دیترێن خزمەتگوزاری بهێنە بجهئینان».

دهۆك، لەزگین جۆقی:

سەرۆكێ ژوورا بازرگانی و پیشەسازی ل دهۆكێ بۆ رۆژناما ئەڤرۆ دیار كر، ئەو ل گەل بازرگان و كۆمپانیان دێ كاركەن بۆ داشكاندنا بهایێ هەمی كەلوپەلێن رۆژانە وەلاتی پێدڤی دبنێ‌ و دكرن.
شوكری جەمیل، سەرۆكێ ژوورا بازرگانی و پیشەسازی ل دهۆكێ گۆت: «ئەم ل گەل بازرگان و كۆمپانیان دێ كاركەین، داشكاندن ل سەر بهایێ كەلوپەلێن رۆژانە وەلاتی ژ ماركێتان دكرن؛ بهێتە كرن، ئەم داخوازێ ژ ماركێت و بازرگانان دكەین بهایێ پێدڤیێن رۆژانە بۆ وەلاتیان ئەرزان بكەن».
گۆتژی: «گرنگە نوكە پتر هەڤكاریا خەلكێ خۆ بكەین، بازرگان و ماركێت د گەل ئێك دا هەڤكاربن و داشكاندن ل سەر كەلوپەلێن رۆژانە وەلاتی پێدڤی دبنێ‌ بهێتە كرن».