ڕاپۆرت: قەیس وەیس

دهێتە چاڤەڕێ‌ كرن ئەڤرۆ دەست ب هەڤڕكیێن گەڕا پێنجێ‌ ژ گەڕا ئێكێ‌ یا خولا ستێرێن ئیراقێ‌ یا فوتبۆلێ‌ ب ئەنجامدانا چەند یاریێن بهێز بهێنە كرن، د ڤێ‌ حەفتیێ دا سێ‌ یانەیێن كوردستانی د گرنترین یاری دا كو دهێتە هژمارتن گۆپیتكا یاریێن ڤێ‌ حەفتیێ بەرانبەر یانەیێن بەغدایی و جەماوەری،
شەڕێ‌ ئەلهۆییان د ناڤ یاریگەهێ‌ دایە
ئەڤرۆ ل دەمژمێر نەهی شەڤ جەماوەرێ‌ وەرزشی یێ یانەیا دهۆكێ‌ چاڤەڕێ‌ یارییەكا ئاگرینە یا تیما وان بەرانبەر یانەیا جەوییە یا بەغدایی هەلگرا ناسناڤێ‌ وەرزێ‌ بۆری كەت كو دهێتە هژمارتن ئێك ژ یاریێن بهێز بۆ ئەلهۆیێن چیا بەرانبەر ئەلهۆیێن جەویە، كاروانێ‌ تیما دهۆكێ‌ د چاریێن بۆری دا یا باش نینە ئەوا ب سەرپەرشتییا یێ ئیرانی یەحیا گۆلمحەمەدی ئەوا چار وەكهەڤی ل دووڤ ئێك ئینایین، بەرانبەر ئەلغراف 1-1 و تەلەبە 3-3 د ناڤ ئەردێ‌ خوە دا، ژدەرڤەیی یاریگەها خوە بەرانبەر نەفتێ‌ 1-1 و نەورۆز بێ‌ گۆل وەكهەڤبوو، ڕێزبەندییا نوكە یا 15ێ‌ دهێت، ژلایێ خوەڤە كاودانێن جەوییە ژی د باش نینن ئەوا ب هەمان ئەنجام كو جار وەكهەڤیێن لدووڤ ئێك ئیناین و دنوكە ل رێزا 14ێ‌ دهێت، ئامارێن باوەرپێكری ژ19 دیدارێن هەردو یانەیان، هەر ئێكی حەفت سەركەڤتن هەنە و پێنج وەكهەڤی هاتینە.
زاخۆ دێ‌ تەلەبە مێڤان كەت
ژلایێ خوەڤە تیما یانەیا زاخۆ ل شەمبییا بهێت دناڤ ئەرد و جەماوەرێ‌ خوە دا دێ‌ مێڤاندارییا یانەیا تەلەبە یا بەغدایی لدەمژمێر 6:45 بەری مەغرەب كەت، كوڕێن خابووری د كاودانەكێ‌ دەرۆنی یێ باش دا نینن تایبەت پشتی ئەوان ئەنجامێن نە جیگیر د خولێ‌ دا، ژ چار یاریێن بۆری سەركەڤتنەك هەیە ئەوژی بەرانبەر غاز ئەلشیمال دو خوسارەتی بەرانبەر مینا و زەورا و ئێك وەكهەڤی بەرانبەر دیالا، چار خال كۆمكرینە ل ڕێزا دهێت، ژلایێ خوەڤە یانەیا پێنج خال كۆمكرینە ژ سەركەڤتنەك، دو وەكهەڤی و خوسارەتیەك ل ڕێزا نەهێ‌ دهێت، دیدارێن پێشتر د بەرژوەندییا كوڕێن خابووری دانە، ژ 14 یارییان پێنج سەركەڤتن بۆ زاخۆ بوونە و سێ‌ بۆ تەلەبە و شەش یاری ب وەكهەڤی ب دووماهی هاتینە.
ئەرێ‌ تەلال دێ‌ بیتە قورتالكەر
ژبەر ئەوان ئەنجامێن نە جیگیر و ئاستێ‌ لاواز د هەر چار یاریێن بۆریدا و دیسان دەرئەنجامێ‌ گڤاشتنا جەماوەری كارگێرییا یانەیێ بڕیار دا ڕاهێنەرێ‌ خوە یێ فرەنسی لۆراند بانێت دووربێخیت و ل جهێ‌ وی ڕاهێنەرێ‌ قەتەری تەلال ئەلبلۆشی ڤەگەڕینتە زاخۆ ب هیڤیێن مەزن بۆ ئارمانجا خوە، زاخۆ ئەوا ب هەبوونا یاریزانێن ستێر وەكو ئاكام هاشم، هارۆن ئەحمەد ، عەلی جاسم، ئۆرینهۆ، ئەمجەد عەتوان، یێ ئۆزپاكستانی شیرۆز دیمترۆڤ گۆلكەرێ‌ وەرزێ‌ بۆری، لڤێرە پسیار ئەوە ئەرێ‌ تەلال ئەلبلۆشی دێ‌ شێت ب سەركێشا ڤان ستێرا ئارمانجێن زاخۆییان جهئینیت، هەر بۆ زانین ل وەرزێ‌ 2023ێ‌ هەتا نیسانا 2025ێ‌ ڕاهێنەرێ‌ زاخۆ بوو.
هەولێر ل بەغدا دێ‌ شەڕێ‌ شورتە كەت
سوبەهی ئەینی ل دەمژمێر نەهی شەڤێ‌ یانەیا هەولێر دێ‌ ل یاریگەها شورتە ل پایتەختێ‌ ئیراقێ‌ بیتە مێڤانا یانەیا شورتەد سێیەم یاریێن ئاگرین یێن یانەیێن كوردستانی د ڤێ‌ حەفتیێ دا، ئەنجامێن یانەیا كەلهە و منارە د خولێ‌ دا بۆ جەماوەری دلخوەشكەرن لێ‌ یارییا سوبەهی تاقیكرنا دورست یا بزەحمەتە، د هەر چار یاریێن بۆری دا سێ‌ سەركەڤتنان بەرانبەر یانەیێن كارەبا، كەرخ و مینا ئینایە و بەرانبەر جەوییە وەكهەڤ بوو، ل سەرێ‌ لیستێ‌ دهێت ب كۆمكرنا 10 خالان دێ‌ بزاڤێ‌ كەت جهێ‌ خوە پارێزیت، ژلایێ خوەڤە یانەیا شورتە حەفت خال كۆمكرینە ژ دو سەركەڤتن و ئێك وەكهەڤی ل ڕێزا شەشێ دهێت.
نەورۆز د ئەركێ‌ ب زەحمەت دایە
ژلایێ خوەڤە یانەیا نەورۆز یا سلێمانی كو نوونەرا چارێ یە یا كوردستانی د خولێ‌ دا دێ‌ سوبەهی ئەینی بینتە مێڤانا یانەیا نەفت میسان ل دەمژمێر نەهی شەڤ، نەورۆزێ‌ دو خوسارەتی هەنە بەرانبەر ئەلغراف و تەلەبە و دو وەكهەڤی بەرانبەر جەوییە و دهۆك هەنە، لدووڤ بڕیارا فدراسیۆنا فوتبۆلا ئیراقێ‌ ل سەر سكالایا یانەیا نەورۆزێ‌ دێ‌ سێ‌ خالێن تەلەبە ڤەگەرینیت، ژبەركو دو یاریزانێن تەلەبە ب ئێك هژمارەیا درێسی دەمێ‌ یاریێ ل بەرخوە كربوون ژلایێ خوەڤە یانەیا تەلەبە تانەدان ل سەر بڕیارێ‌ كرییە و ئەڤرۆ دێ‌ ئێكلا بیت، ژلایێ خوەڤە یانەیا نەفت میسان سێ‌ خال هەنە ژ سێ‌ وەكهەڤیان ل ڕێزا 17ێ‌ دهێت.
غاز ئەلشیمال یا كوردستانی ژی یاری هەیە
ژلایێ خوە یانەیا غاز ئەلشیمال یا كەركووكی دی سوبەهی ئەینی ل دەمژمێر 6:45 مێڤاندارییا یانەیا جەولان یا باژێرێ‌ رۆمادی كەت د یارییەكا بزەحمەت دا بۆ كەركووكیان ئەوێن سەركەڤتنەك هەیی بەرانبەر ئەلغراف و خوسارەتی بەرانبەر زاخۆ و دو وەكهەڤیێن بەرانبەر كارەبا و جەوییە، پێنج خال هەنە ل ڕێزا 11ێ‌ دهێت، ژلایێ خوەڤە جەولان ل ڕێزت 10ێ‌ دهێت ب هەمان خال پترییا گۆلان.
ژ یاریێن دی یێن ڤێ‌ گەڕێ‌
پێنچ شەمبی 3-9- 2026
دیالا- ئەلگەرمە، یاریگەها دیالا، دەمژمێر 6:45 بەری مەغرەب.
مووسل- زەورا، یاریگەها هەولێر، دەمژمێر 6:45 بەری مەغرەب.
كارەبا- ئەلغراف، یاریگەها زەورا، دەمژمێر نەهی شەڤ.
یاریێن رۆژا ئەینی 4-9-2026.
كەربەلا- كەرخ، یاریگەها كەربەلا، دەمژمێر 6:45 بەری مەغرەب.
یاریێن رۆژا شەمبی 5-9-2026
مینا- نەفت، یاریگەها ئەلفەیحا، دەمژمێر نەهی شەڤ.

ب مه‌ره‌ما بهێزكرن و دانانا شه‌نگسته‌كێ بهێز و موكوم یێ فتبۆلێ ل سه‌رانسه‌ری پارێزگه‌هێ، ئێكه‌تییا فوتبۆلێ ب هه‌ڤكاری دگه‌ل لقێ دهۆك یێ لژنا ئولۆپی و رێڤه‌به‌ریا گشتی یا وه‌رزش و لاوان ل پارێزگه‌ها دهۆكێ رابوینه‌ ب ئه‌نجامدانا قاره‌مانیه‌كێ بۆ 30 ئه‌كادیمیێن دهۆك و ئیداره‌یا سه‌ربه‌خۆیا زاخۆ.
لدۆر ڤێ قاره‌مانیێ ئه‌حمه‌د حسێن جێگرێ سه‌رۆكێ فدراسیۆنا فوتبۆلێ ل پارێزگه‌ها دهۆكێ بۆ رۆژنامه‌یا ئه‌ڤرۆ دیاركر دو قاره‌مانی بۆ ژیێن جۆدا ڤه‌كرینه‌، یا ئێكێ 15 تیم پشكدارن بۆ فوتبۆلا ڤه‌كری ئانكو 11 یاریزانی بۆ ژیێ 14 و 15 سالی، هه‌روه‌سان قاره‌مانیه‌ك بۆ 15 تیمێن بچووككری كو ژیێ وان دناڤبه‌را 12 و 13 سالی دانە، ئەوا‌ ل ژێر سه‌رپه‌رشتییا كه‌سانێن شاره‌زا یێن فوتبۆلا مه‌ دهێته‌ برێڤه‌برن، ئه‌و ئه‌كادیمیێن پشكدار هه‌می ئه‌ون یێن مه‌ ده‌ستیردایێ كو هه‌می مەرجێن پێدڤی لده‌ف هه‌بووینه‌.
ژلایه‌كێ دویڤه‌ ناڤهاتی دیاركر به‌ری ڤێ قاره‌مانیێ 63 ئه‌كادیمی ل دهۆك و زاخۆ هه‌بوون لێ ژبه‌ر نه‌بوونا رینمایێن پێدڤی لده‌ف هنده‌ك ئه‌كادیمییان مه‌ 33ێ لادان و هاتینه‌ هه‌لوه‌شاندن، ژلایەکێ دووڤە یانه‌یێن پارێزگه‌ها دووڤچوونا یاریێن ڤێ قاره‌مانیێ دكه‌ن بۆ ده‌ستنیشانكرنا یاریزانێن خۆدان شیان، د یاریه‌كێ دا یانه‌یا دهۆك چار یاریزان بخۆ ده‌سنیشانكرن داكو ببه‌نه‌ ناڤ رێزێن تیمێن خۆ یێن ژیێن جودا و ئەڤ قارەمانییە دەلیڤەیە بۆ یانەیان بخوە ژێبگرن.
بۆ زانین یاریێن ڤێ قاره‌مانیێ بۆ ماوه‌یێ هه‌یڤه‌كێ دێ د به‌رده‌وام بن ئەوا دێ بشێوازێ كه‌فتنا کت ل یاریگه‌هێن زانكۆ، پۆلیته‌كنیك و سیروان ل باژێرێ دهۆکێ و یاریگه‌ها دومیز ده‌ستنیشانكریه‌ بۆ یاریێن ده‌ڤه‌رێن شێخان و به‌رده‌ڕه‌ش و ئاكرێ، زێده‌باری چه‌ند یاریگه‌هـ ل زاخۆ هاتینه‌ ده‌ستنیشانكرن. ‌

یێ‌ كوردستانی جوناسان مەنسۆر یایزانێ‌ یارییا بۆكسانێ‌ شیا دەستكەڤتەكێ‌ دی ل وەلاتێ‌ ئەمریكا ب دەستڤە بینیت، پشتی سەركەفتنەكا گرنگ ل سەر هەڤڕكێ خوە یێ‌ ئەمریكی ئارنێس بۆستۆ ب دربێ‌ ئێخستنێ‌، د چارچووڤەیێ قارەمانییا نێڤدەولەتی یا ڤەكری دا ل باژێرێ‌ دیترۆیێت ل ئەمریكا هاتیە كرن.
جوناسان ییچ 26 سالی شیا بۆ كێشا 65كگم ناسناڤێ‌ قارەمانیێ ب دەستڤە بینیت (National Golden Gloves) بۆ جارا دویێ ل دووڤ ئێك و ب فەرمی بۆ هەلبژارتیێ ئەمریكا ل سەر ئاستێ‌ لاوان دێ‌ پشكداریێ د قارەمانییا كێشوەرێ‌ ئەمریكا باشۆر دا كەت هەروەسان بۆ ئۆلمپیادا جیهانی 2028ێ‌ پشكداریێ كەت كو دبیتە جارا ئێكێ‌ د دیرۆكا خوە دا یاریزانەكێ‌ ڕەڤەندا كوردستانی ژ ئۆلیێ مەسیحیان پشكداریێ بكەت.
بۆ زانین جوناسان مەنسۆر ژ بنەمالەكا كلدانیە ل ناحیا ئەلقووش خێزانا وی چوویە ئەمریكا ل ئەوی وەلاتی ژ دایكبوویە، كاروانێ‌ وی د ڤێ‌ یاریێ دا 140 سەركەڤتن بەرانبەر 16 خوسارەتیان هەیە، هەلگرێ‌ ناسناڤێ‌ قایشا زێری یە WBC ل سەر ئاستێ‌ كێشوەرێ‌ ئەمریكا باشۆر بەرانبەر هەڤڕكێ‌ خوە یێ مەكسیكی، لژنەیا ئۆلمپییا ئیراقێ‌ پشتەڤانییا وی دكەت بۆ هەر پشكدارییەكێ‌ .

د داخۆیانیەكێ دا جێگرێ سەرۆكێ یانەیا دینارتە ب ئستراتیژیەتەكا نوو و جودا دەست ب هەڤڕكیێن ئەڤسالە د خولا پلا دویێ یا كوردستانێ دا كرییە كو پشت بەستن ب تەمامی ل سەر بەهرە و شیانێن گەنجێن دەڤەرێ.
زێدەتر خەلیل حسێن بۆ رۆژناما ئەڤرۆ گۆت: جودا ژ وەرزێن بۆری ئەڤ سالە ب شێوازەكێ جودا پشكداری د خولا پلا دویێ یا كوردستانێ دا كرییە، ئەو ژی پشت گەرمی ب یاریزانێن ناڤخۆیی كو هەموو گەنجێن دەڤەرێنە و باوەری ب شیانێن وان دئینین كو بشێن ململانێ و هەڤڕكیێ دگەل یانەیێن دی بكەن.
ناڤبری گۆتژی: هەتا تا نوكە دو یاری هاتینە ئەنجامدان و یانەیا مە شیا ب دەستڤەئینانا سێ خالان تۆمار بكەت ئەم وەكۆ كارگێری ژ ئاستێ یاریزانێن خۆ ڕازینە كو ب گیانەكێ بلندێ وەرزشی و ب پێكهاتەیەكا ب هێز پشكداری د قارەمانیا ئەڤسالە دا كرییە، سوپاسیا پشتەڤانی و ئامادەبوونا جەماوەرێ خۆ دكەین كو ئەوان ب هێزا سەرەكی یا سەركەفتنێن یانەیا دینارتە هەژمار دكەین.

فدراسیۆنا فوتبۆلا ئالایان یا ئەمریكی ڕاگەهاند كو لژنەیا ئۆلمپییا نێڤدەولەتی ب فەرمی ڕازیبوو ل سەر زێدەكرنا یارییا وان دناڤ ئۆلمپییادا لۆس ئەنجلۆس 2028ێ‌ ئەوا بڕیارە ل 21 و 22ێ‌ تەمووزا سالا 2028ێ‌ دناڤ هەڤڕكیێن ئۆلمپیادا دا بهێتە كرن و ب شێوەیەكێ‌ راستەوخوە هاتییە پەسەندكرن.
د ڕاگەهاندنا خوە دا فدراسیۆنا ناڤهاتی گۆت: پشتی بەربەلاڤبوونا ڤێ‌ یاریێ‌ ل چەندین وەلاتێن ئەمریكا باشۆر، ئۆرۆپا و هندەك وەلاتێن ئاسیا ب فەرمی لژنەیا ئۆلمپییا نێڤدەولەتی ڕازیبوون ئەڤ یارییە ببیتە ئۆلمپی و بۆ جارا ئێكێ‌ بهێتە پەسەندكرن و بكەڤیتە دناڤ چالاكیێن نێڤدەولەتی دا و پێشبینی دكەین بەربەلاڤبوونەكا بەرچاڤ وەربگریت و ببیتە ئێك ژ خوشترین یاریێن ئۆلمپیادا.
ژلایێ‌ خوەڤە بیێر ترۆچێ‌ سەرۆكێ‌ لژنەیا ئۆلمپییا نێڤدەولەتی بۆ رۆیتەرز گۆت: ئەڤ ئێك ژ یاریێن جوانن و یا نوویە، پێنەڤێت دێ‌ بیتە یارییەكا ب هەڤڕكی، شێوازێ‌ یارییا وێ‌ هند هێز پێنەڤێت بەلكو لەز و چەستەیێ‌ یاریزانی یێ‌ بلند و باش بیت، ڕازیبوونا دەستەكا گشتی یا ئۆلمپییا جیهانی ژی دۆپات دكەت ئەم یێ‌ بەر ب پێشڤە دچین و دەلیڤە بۆ هەموو وەرزشا دهێتە دان.‌‌‌‌‌‌‌‌‌‌‌

د داخویانیەكێ‌ دا عەلی حەمید سەرۆكێ‌ فدراسیۆنا یارییا پایسكلان ل ئیراقێ‌ دوپاتی ل سەر بڕیارا پێشتر دا كو هەر ڕاهێنەرەكێ‌ خودان باوەرنامەیا باوەرپێكری و نێڤدەولەتی نەبیت مان نینە ل هیچ یانەك یان ئاكادیمی و هەلبژارتیان كار بكەت.
زێدەتر ناڤهاتی گۆت: ژبۆ پێشئێخستنا وەرزشا پایسكلان و باشترنا ئاستێ‌ یاریزانان و ڕاهێنەران خولەكا ڤاڤارتن و پلەكرنا ڕاهینەرێن ڤێ‌ یاریێ دێ‌ ل پایتەختێ‌ ئیراقێ‌ بەغدا هرە ژ شەش بۆ نەهێ‌ ڤێ‌ مەهێ‌ هێتە ڤەكرن ئەوا دێ‌ ژلایێ وانەبێژێ‌ نێڤدەولەتی یێ ئیرانی ئۆمێد سیراجی هێتە كرن، ئەڤ خولە بۆ هەموو ڕاهێنەرێن ئیراقێ‌ و هەرێما كوردستانێ‌ یە ئەوێن بێ باوەرنامە، ل دووڤ پلانەكا ڕێكخستی هاتیە دانان كو ل دووڤ یاسا فدراسیۆنێن وەرزشی و پەیرەوێ‌ ناڤخوە هاتیە ڕێكخستن.
هەروەسان عەلی حەمید گۆت: ئەڤ خولەك گەلەك یا گرنگە بۆ هەموو ڕاهێنەران ژبۆ وەرگرتنا مفایی و پلەكرنا وان د ڕێزبەندیێ دا بۆ لیستەیا ئاسیا و نێڤدەولەتی، هەروەسان دێ‌ بیتە پیڤەرەك بۆ كاركرنا ڕاهێنەران، ژبەركو هەر ڕاهێنەرەكێ‌ باوەرنامەیا باوەرپێكری نەبیت، ب هیچ شێوەیەكی ماف نینە كار بكەت ل گەل هیچ تیمەكا ئەكادیمی، یانە و هەلبژارتیێن ئیراقێ‌، ئەڤە ژی پێنگاڤەكا سەردەمانە و بەر ب ڕێكخستن و پیشەكاریێ و چوونا دناڤ چڤاكێ‌ مەزن یێن یارییا پایسكلڤانێن جیهانی دایە.
بۆ زانین ل پارێزگەها دهۆكێ‌ زێدەتری پێنج ڕاهێنەرێن خودان شیان بۆ ئاستێن جودا یێن ڤێ‌ یاریێ هەنە، ڕاهێنەر تارق سەعید كوڕێ‌ باژێرێ‌ دهۆكێ‌ بۆ سالا نەهێ‌ یە ل دووڤ ئێك ئەركێ‌ ڕاهێنەراتییا هەلبژارتیێن ئیراقێ‌ وەردگریت و كۆمەكا باش یا ریزانێن پارێزگەهێ‌ ژی نوونەراتییا ئیراقێ‌ و كوردستانێ‌ د قارەمانیێن دەرڤە دا كرینە.