دهۆك، لەزگین جۆقی:

ل ژێر چاڤدێریا د. سامان بەرزنجی، وەزیرێ ساخلەمیێ و د. عەلی تەتەر، پارێزگارێ دهۆكێ و ب ئامادەبوونا د. نەوزاد عەبدوللا، بەرپرسێ لقێ ئێك یێ‌ پارتی و چەندین بەرپرسێن حزبی و ئیداری دوهی 17/2/2025 ل هولا كۆنفرانسان ل زانكۆیا دهۆكێ كۆنفرانسێ سالانە یێ‌ هەلسەنگاندن و پێداچوونێ بۆ سالا 2024ێ یێ رێڤەبەریا گشتی یا ساخلەمیا پارێزگەها دهۆكێ ل ژێر درووشمێ‌ (جڤاكێ‌ ساخلەم د پێشڤەبرنا خزمەتێن دەستپێكی و تەنگاڤیان دایە) هاتە سازكرن.
ل بەراهیێ د راپۆرتەكێ‌ دا ئەو كار و خزمەتێن ساخلەمیێ‌، ئەوێن د سالا 2024 دا هاتینە پێشكێشكرن، هاتنە بەرچاڤكرن.
د. ئەفراسیاب موسا، رێڤەبەرێ گشتی یێ‌ ساخلەمیا پارێزگەها دهۆكێ‌ د پەیڤەكێ‌ دا چەندین ئامار ل دۆر هژمارا نەخۆشخانە و بنگەهێن ساخلەمیێ‌ و نۆشدار و كارمەندان و ئەو خزمەتێن پێشكێش دكەن و كێماسیێن هەین؛ دیاركرن.
د. عەلی تەتەر، پارێزگارێ دهۆكێ د پەیڤەكێ دا دوپاتكر كو سەرۆكێ حكومەتا هەرێما كوردستانێ هەردەم داكۆكیێ ل سەر پێشئێخستنا كەرتێ ساخلەمیێ دكەت و گۆت: «ئەم وەكو پارێزگەها دهۆكێ دێ بەردەوام پشتەڤانیێ ل كەرتێ‌ ساخلەمیێ‌ كەین، دیسا دەستخوشیێ ل رێكخەرێن كۆنفرانسی دكەین و پشتەڤانیا پارێزگەهێ بۆ كەرتێ ساخلەمیێ‌ دیاردكەین».
پاشی پەنەلەكێ زانستی ل دۆر كارتێكرنا بۆرجێن پەیوەندیكرنێ ل سەر پەیداكرنا نەخۆشیا پەنجەشێرێ ژ لایێ چەند نۆشدار و بسپۆرێن تایبەتمەندڤە هاتە پێشكێشكرن.
د. سامان بەرزنجی، وەزیرێ ساخلەمیێ‌ د پەیڤا خۆ دا گۆت: «حكومەتا هەرێما كوردستانێ دێ بەردەوام پشتەڤانیێ ل كەرتێ ساخلەمیێ ل پارێزگەها دهۆكێ كەت و دەستخوشی ل رێكخەرێن كۆنفرانسی دكەین».
ل دووماهیێ رێز ل 248 نۆشدار و كارمەندێن ساخلەمیێ و فەرمانبەران، ئەوێن خانەنشین بووین هاتە گرتن و خەلاتێن رێزگرتنێ ل سەر هاتنە بەلاڤكرن.

رێڤەبەرێ بازرگانیا ئاهێن خوارنێ ل پارێزگەها دهۆكێ دیار كر، ل رۆژا پێنجشەمبی 2025/2/20 دەست ب بەلاڤكرنا پشكا ئێكێ یا ئاهێن خوارنێ ل سالا 2025ێ دێ هێتە كرن، ئەڤ پشكە ژ شەش ماددەیان پێك دهێت، هەتا نوكە چ پشكێن تایبەت یێن ئاهێن خوارنێ بۆ مەها رەمەزانێ نەهاتینە.
هەجەر تاهر عەلی، رێڤەبەرێ بازرگانیا ئاهێن خوارنێ بۆ رۆژناما ئەڤرۆ گۆت: «بۆ ڤێ‌ مەهێ‌ بۆ هەر كەسەكی (سێ كیلۆیێن برنجی، كیلۆیەكا شەكرێ، قودیكەكا دوشاڤا تەماتێ یا 400 گرامی، ئێك لێترا زەیتێ، 750 گرامێن نیسكان و 250 گرامێن ئالینۆكان) دێ هێنە بەلاڤكرن.
ناڤهاتی دەربارەی مەها ڕەمەزانێ ژی گۆت: «هەتا نوكە چو تشتەكێ فەرمی بۆ مەها ڕەمەزانێ نەگەهشتییە مە، هەر چەندە پار بەری ڕەمەزانێ ب مەهەكێ‌ كەرەستەیێن خوارنێ گەهشتبوون، بەلێ بۆ رەمەزانا ئەڤ سالە نەگەهشتینە».

ئامێدیێ، مەحمود نهێلی:

ژ ئەگەرێ گوهۆڕینا ناڤێ نەخۆشخانەیا 100 تەختی یا هێتووت بۆ ناڤێ شۆڕەش، هەژمارەكا خەلكێ كۆمەلگەها هێتووتێ یا سەر ب ناوچەدارییا دێرەلۆكێ‌ ڤە خرڤەبوونەك ئەنجام دا و رێیا سەرەكی یا دێرەلۆكێ‌ بۆ شێلادزێ دائێخستن و پتر ژ دو هزار ترۆمبێلان ل هەردو لایان ئاسێ مان.
ئێك ژ رێكخەرێن وێ خرڤەبوونێ بۆ رۆژناما ئەڤرۆ دیار كر، وان ئەڤ خرڤەبوونە ئەنجامدایە، ژ بەر كو ژ گەلەك لایان ڤە ئەو مەغدۆر بووینە و گۆت: «ژ بەر كو ئەڤ نەخۆشخانە یا ل سەر ئەردێ مە هاتیە دانان و هەتا نوكە ئەم نەهاتینە قەرەبووكرن، دیسا مە رێككەفتن ل سەر گەلەك بابەتان كربوو، ژ وان ژی ناڤێ نەخۆشخانەیێ هێتووت بیت، لێ‌ نوكە بڕیارەك هاتیە كو دێ‌ ناڤێ وێ بیتە نەخۆشخانەیا شۆڕەش و ناڤێ هێتووت ل سەر نامینت».
هەروەسا دیار ژی كر، وان وەسا رێككەفتن كربوو، كو رێژەیا دامەزراندنێ، بەهرا وان پتر تێدا بیت، لێ ئەڤە ژی نەهاتیە بجهئینان و هندەك ناڤێن بۆ نەخۆشخانەیێ هاتین هەر خەلكێ دەڤەرێ نینن. وی رێكخەری كو نەدڤیا ناڤێ خوە ئاشكرا بكەت گۆت: «ئەم هیڤی دكەین؛ داخوازیێن مە بهێنە بجهئینان، داكو ئەم ژی بشێین خەلكێ خوە رازی بكەین و ڤێ رێكێ ڤەكەن».

رەمەزان زەكەریا:

ل دەڤەرا ئاكرێ سالانە رووبەرەكێ بەرفرەهـ بۆ چاندنا پتاتان دهێتە تەرخانكرن و هەر نوكە جۆتیارێن دەڤەرێ دەست ب چاندنێ كریە.
ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: «ل دەڤەرا ئاكرێ سالانە رووبەرەكێ مەزن ب پتاتان دهێتە چاندن و هەر نوكە جۆتیاران دەست ب چاندنا پتاتێن وەرزێ بهارێ كریە».
ناڤبری گوتژی: «ئاخ و هەوایێ دەڤەرا ئاكرێ گەلەك یێ گونجایە بۆ كەرتێ چاندنێ، لەورا سالانە جۆتیارێن دەڤەرێ بەرهەمێن هەمەجۆر دچینن و بەرهەمەكێ باش یێ هەی».

زاخۆ، دلۆڤان هالۆ:

كەلحێ نعمەت، بەرپرسێ پشكا چالاكیێن قوتابخانەیان ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو ل ئامادەیا هەڤال یا كوڕان و ئامادەیا پەیڤین یا كچان پێشانگەهەكا شێوەكاری و فۆلكلۆری و كارێن دەستی هاتە ڤەكرن.
بەرپرسێ پشكا چالاكیێن قوتابخانەیان ل زاخۆ ئاماژە ب وێ چەندێ ژی كر كو د ڤێ پێشانگەهێ دا چەندین كەڤالێن هەمەجۆر و كەرەستەیێن فۆلكلۆری و كارێن دەستی و خوارنێن كوردەواری و ڕەوشت و تیتالێن باب و باپیران هاتنە نیشادان.
كەلحێ‌ گۆت: «ئەڤ چالاكییە هەموو ژ لایێ قۆتابیێن كوڕ و كچێن هەردو قۆتابخانەیان و ب سەرپەرشتیا مامۆستایێن وان هاتبوونە دروست كرن و بەرهەڤكرن، ئەڤ چالاكیێن ب ڤی شێوەیی دەلیڤەنە، كو قوتابی بشێن بەهرەیێن خوە تێدا دیار بكەن».