سەرۆك مەسعود بارزانی د پەیوەندییەكا تەلەفۆنیدا ل گەل پارێزگەرێ دهۆكێ و سەرپەرشتێ ئیدارەیا سەربخوەیا زاخۆ پیرۆزباهییا سەركەفتنا هەردو یانەیێن دهۆك و زاخۆ لێكر.
سەرۆك بارزانی ب هەلكەفتا سەركەفتنا یانەیا دهۆك و یانەیا زاخۆ بۆ یارییا دوماهییا جاما ئیراقێ، پەیوەندییەكا تەلەفۆنی ل گەل د. عەلی تەتەر، پارێزگەرێ دهۆكێ و گوهدار شێخۆ، سەرپەرشتێ ئیدارەیا سەربخوەیا زاخۆ ئەنجامدا.
بارەگەهێ بارزانی بەلاڤكر» د هەردو پەیوەندیێن تەلەفۆنیدا سەرەرای پیرۆزباهیكرنێ، سەرۆك بارزانی دەستخوەشییا خوە گەهاندە پارێزگەرێ دهۆكێ و سەرپەرشتی ئیدارەیا سەربخوەیا زاخۆ و هەردو یانەیێن دهۆك و زاخۆ راهێنەرێن هەردو یانەیان و هەموو وەرزشڤانێن كوردستانێ و هیڤییا سەركەفتنێن زێدەتر د قەهرەمانییاندا بۆ هەردو یانەیان خواست و سوپاسییا وان كر».

پارتی و ئێكەتی د بەیاننامەیەكا هەڤپشكدا پشتی كۆمبوونا وان، دبێژن، هەردو ئالی هەڤڕابوون بزاڤێن ب لەز بۆ چارەسەرییا كێشەیان و دابینكرنا مووچە و شایستەیێن دارایی یێن هەرێما كوردستانێ، بهێنە كرن.
دوهی دوشەمبی 14/7/2025، پارتی دیموكراتی كوردستان و ئێكەتی نیشتمانی كوردستان ب بەرهەڤبوونا سەرۆك مەسعود بارزانی و بافل تالەبانی ل پیرمام كۆمبوون.
ب گۆڕەی بەیاننامەیا هەڤپشك» پشكەكا دی یا كۆمبوونێ یا تەرخانكری بوو بۆ زێدەتر ب هێزكرنا هەڤبەندییا پارتی و ئێكەتی بۆ دەربازكرنا ئاستەنگان و قەوارەیێ هەرێما كوردستانێ و دەستكەفتان بپارێزین».
د كۆمبوونێدا نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ كو جێگرێن سەرۆكێ پارتی نە، بەرهەڤ بوون.
ژ ئالیێ ئێكەتیێ ژی ڤە قوباد تالەبانی، جێگرێ سەرۆكێ حوكمەتا هەرێما كوردستانێ، كو ئەندامێ مەكتەبا سیاسییا وێ حزبێیە، بەرهەڤ بوو.
دەقێ بەیاننامەیا هەڤپشك یا پارتی و ئێكەتی:

ل 14 تەمووزا 2025 بەرێز سەرۆك مەسعود بارزانی پێشوازی ل بەرێز بافل تالەبانی سەرۆكێ ئێكەتی نیشتمانی كوردستان و شاندێ دگەلدا كر و كۆمبوونا هەردو مەكتەبێن سیاسی ئێكەتی نیشتمانی كوردستان و پارتی دیموكراتی كوردستان هاتە ئەنجامدان، سەبارەت روودان و پێشهاتو كێشە و گرفتێن هەرێما كوردستانێ و حوكمەتا فیدرال ب تایبەتی شایستەیێن دارایی و مووچەیێ فەرمانبەرێن هەرێما كوردستانێ، پشتی گەنگەشێ و لێكگۆهارتنا بیر و بۆچوونان و لێكدانا هەموو رەهەندان ژ روویێ سیاسی و ئابۆری و جڤاكیڤە، هەردو ئالی هەڤڕابوون هەموو بزاڤ بهێنە ب لەزكرن بۆ چارەسەرییا كێشەیان و دابینكرنا مووچە و شایستەیێن دارایی یێن هەرێما كوردستانێ و هەموو ئەو پێنگاڤێن پێدڤی د چارچۆڤەیێ دستووریدا ب ئاراستەیا چارەسەركرنێ ب هەماهەنگییا هەردو ئالییان بهێنە هاڤێتن.
پشكەكا دی یا كۆمبوونێ یا تەرخانكری بوو بۆ زێدەتر ب هێزكرنا هەڤبەندییا پارتی و ئێكەتی بۆ دەربازكرنا ئاستەنگان و پاراستنا قەوارەیێ هەرێما كوردستانێ و دەستكەفتێن وێ.
كۆمبوونێ دوپاتی ل سەر ئێكبوونا هەلوەستێ هەموو ئالیێن سیاسی یێن كوردستانێ و ئیراقێ كر كو هاریكار و پشتەڤان بن د چارەسەرییا ڤێ كێشەیێدا.

سەرۆكێ هەرێما كوردستانێ ل گەل فەرماندەیێ هێزێن هەڤپەیمانییا نێڤدەولەتی ل ئیراقێ و سووریێ و شاندەكێ دگەلدا كۆمبوو و چەند پرس گەنگەشەكرن.
دوهی دوشەمبی 14/7/2025، نێچیرڤان بارزانی، سەرۆكێ هەرێما كوردستانێ ل گەل جەنەرال كیڤن لیهی، فەرماندەیێ هێزێن هەڤپەیمانییا نێڤدەولەتی ل ئیراقێ و سووریێ و شاندەكێ د گەلدا، كۆمبوو.
د كۆمبوونێدا وەزیرێ كاروبارێ پێشمەرگەی، سۆپاسالارێ پێشمەرگەی و قۆنسلێ گشتیێ ئەمریكا ل هەرێما كوردستانێ بەرهەڤبوون، ل دووگ بەیاننامەیەكا سەرۆكایەتییا هەرێما كوردستانێ، رەوشا سیاسی و ئەمنی یا ئیراقێ و هەرێما كوردستانێ، هەڤبەندیێن هەولێرب بەغدا، پرۆسەیا چاكسازیێ و ئێكخستنا پێشمەرگەی و گەف و مەترسیێن تیرۆرێ و لڤینێن داعشێ ل ئیراقێ و سووریێ، هاتنە گەنگەشەكرن.
وەكو د بەیاننامەیا سەرۆكایەتییا هەرێمێدا هاتی، هەردو ئالی د هەڤڕابوون ل سەر وێ چەندێ داعش هێشتا گەف و مەترسییەكا جدییە ل سەر ئارامییا ئیراقێ و سووریێ، سەبارەت ڤێ چەندێ داكۆكی ل گرنگییا بەردەوامییا هەماهەنگی و هاریكارییا هەڤپشك یا لەشگرێ ئیراقێ و پێشمەرگەی ل گەل هێزێن هەڤپەیمانییا نێڤدەولەتی بۆ بەرهنگاربوونا داعشێ.
نێچیرڤان بارزانی سوپاس و پێزانین بۆ رۆلێ هەڤپەیمانییا نێڤدەولەتی و هاریكارییا ئیراقێ و هەرێما كوردستانێ د روو ب رووبوونا مەترسیێن تیرۆرێ دوپاتكر، هەروەسا رۆل وبزاڤێن جەنەرال لیهی بلند هەلسەنگاندن ب تایبەتی بۆ پشتەڤانی و و هاریكاریێ د پرۆسەیا چاكسازیێ و ئێكگرتنا پێشمەرگەی دا و هیڤییا سەركەفتنێ بۆ خواست.
رەوشا سووریێ و كورد و پێكهاتەیان ل وێرێ، دوماهی پێشهاتێن دەڤەرێ و كاریگەری و ئەنجامێن وان ل سەر ئیراقێ و هەرێما كوردستانێ، گرنگییا پاراستنا ئارامییا رۆژهەلاتا ناڤین، ل گەل چەند پرسێن جهێ گرنگییا هەڤپشك، تەوەرێ دی یێ كۆمبوونێ بوو.

جێگرێ نەقیبێ رۆژنامەنڤیسێن ئیراقێ نڤیسینەك بەلاڤكر و تێدا ئاماژە ب وێ چەندێ كریە، هەرێما كوردستانێ سەرەرای هەموو رەوشێن تێدا دەرباز دبیت، یا سەركەفتی بوو د پێشكێشكرنا نموونەیەكا شارستانییا گەش د وەبەرئێنانێ و گەشەپێدانێ و ئارامیێدا، هەروەسا باژێرێن وی بووینە رووگەها گەشتیاری و وەبەرئێنانێ نەك هەر بۆ ئیراقییان، بەلكو بۆ گەشتیارێن دەرڤە ژی. چاوان ب خرابی باسێ پارچەیەكا گەش ژ ڤی وەلاتی بكەین؟ هەروەسا داخواز ژ سیاسەتەمەدارێن ئیراقی دكەت كو دەست ژ دروستكرنا ئالۆزی و شەڕی سیاسی بەردەن و ئاماژە كر كو پێدڤییە ئەزموونا هەرێما كوردستانێ بپارێزین، كو بوویە گرنگترین ئەزموون ل دەڤەرێ و جیهانێ.
محەمەد حەنوون، جێگرێ نەقیبێ رۆژنامەنڤیسێن ئیراقێ، د نڤیسینەكێدا دبێژیت» هەر ئالۆزییەكا ئەمنی و سیاسی ل هەرێما كوردستانێ نابیت وەكو رەوشەكا جودا ژ ئیراقێ بهێتە سەحكرن، چونكە هەرێما كوردستانێ پشكەكا هەرە رەسەنە ژ ڤی وەلاتی».
گوت ژی» هەرێما كوردستانێ، سەرەرای هەموو ئەو رەوشێن تێدا ژیای، بەلێ ل سالێن دووماهیێ یا سەركەفتی بوو د پێشكێشكرنا نموونەیەكا گەش یا شارستانی د وەبەرئێنانێ و پێشڤەبرنێ و ئارامیێدا، كو ب جۆرەكی سیمایێ باژێر و دەڤەرێن خوە گوهۆڕییە و خزمەتگوزاری پێشكیچش كرینە، كو هەولێر و سلێمانیێ و دهۆكێ بوونە رۆگەهێن گەشتیاری و وەبەرئێنانێ نەك تنێ بۆ ئیراقییان، بەلكو بۆ گەشتیارێن هەموو وەلاتان، ئەڤجا چاوان روو ب روویێ ڤێ سەركەفتنێ ببین؟».
محەمەد حەنوون، روو ل گەلێ كوردستانێ كر و گوت» دبێژمە برایێن خوە ل هەرێما كوردستانێ، دلێ مە ل گەل هەوەیە و لاڤایان بۆ هەوە دكەین د ئارامیێ و ئاسایشێ دا بمینن و هیڤیدارێن ئەڤ قۆناغ و مەینەتە ژی ب لەز دەرباز بكەن، ل گەل هەوەینە د كاروانێ ئاڤەدانی و پێشكەفتنا هەوە».
جێگرێ نەقیبێ رۆژنامەنڤیسێن ئیراقێ بۆ سیاەستمەدارێن ئیراقی ژی دبێژیت» بلا بەس بیت وەبەرئێنان د دروستكرنا گەفت و شەڕێ سیاسیدا، پێدڤییە كاری بۆ ئێكەتییا ئیراقێ بكەن، كێشەیا ئەڤرۆ گەلەك مەزنترە ژ ناكۆكییەكێ یان هەلوەستەكێ سیاسی، كێشە پاراستنا وەلاتییە ب ئێكگرتی، كو هەموو ئالییەك ب سەرفەرازی و پشتڕاستی تێدا بژین و ئەزموونا هەرێما كوردستانێ بپارێزین، كو بوویە گرنگترین ئەزموونا دەڤەرێ و جیهانێ».
جێگرێ نەقیبێ رۆژنامەنڤیسێن ئیراقێ دیاركر ژی» كوردستان هەر دێ ب پشكەكا ئەزیز مینیت، هەرچەندە كەسێن شكەستی بزاڤێ دكەن مە ژ هەڤدو دوور بكەن، بەلێ ئەو كەسێن شكەستی دێ كەڤن و ئێكڕێزییا نیشتمانی ژ هەموو پلانەكێ ب هێزتر بیت».
دیاركر ژی» ئەوا ل كوردستانێ روو ددەت ئالۆزییەكا هەرێمایەتی نینە، بەلكو مەینەتەكی تووشی هەموو ئیراقییەكی دبیت، هەرێما كوردستانێ ب سەركردایەتی و گەلێ خوە یێ سەرفەراز ڤە هەر ب پارێزەرێن وەلاتی و ب سیمایێ شارستانی دێ مینن و ئەم هەموو شانازیێ پێ دكەین».
ل دوماهیێ گوت» ب راشكاوی و رۆهنی دبێژین، ئەم ل گەل گەلێ خوەینە ل هەولێرێ و دهۆكێ و سلێمانیێ و هەموو باژێر و باژێركێن كوردستانێ و دەنگێ خوە دئێخینە گەل وان دەنگێن دخوازن ئارامییا هەرێما كوردستانێ یا پاراستی بیت و ئەڤ ناكۆكییەژی دێ دەرباز بن و وەلات هەر دێ مینیت، بەلێ ئاخڤتنێن خراب بەرامبەر برایێن كورد بێ ئەخلاقییە و كارەكێ دوورە ژ ئیراقیێن رەسەن».

جێگرێ بەری یێ سەرۆكێ جڤاتا نوونەرێن ئیراقێ راگەهاند: حوكمەتا ئیراقێ ئارمانجەكا سیاسی ل پشت نەهنارتنا مووچەیێ فەرمانبەرێن هەرێما كوردستانێ هەیە، لەوما دەمێ وێ چەندێ یێ هاتی كو حوكمەتا هەرێما كوردستانێ بڕیارێ بدەت.
بەشیر حەداد، جێگرێ بەری یێ سەرۆكێ جڤاتا نوونەرێن ئیراقێگوت» بەغدا ئارمانجەكا سیاسی ل پشت نە هنارتنا مووچەیێ فەرمانبەرێن هەرێما كوردستانێ هەیە، لیژنەیا محەمەد شیاع سوودانی پێكئینای گارێن خوە راگرتن، هەموو ئاماژە ژی وێ چەندێ دیار دكەن، بەغدا ناخوازیت رێككەفتنێ بكەت».
بەشیر حەداد گوت ژی» پێدڤییە نوكە حوكمەتا هەرێما كوردستانێ بڕیارا خوە بدەت، بەلێ بڕیارەكا حەكیمانە بیت، بڕیارەكا هەموو ئالیێن سیاسی یێن كوردستانی بیت، ل گەل وێ چەندێ ژی دا لیژنەیەك ژ كەسایەتی و سیاسەتمەدار و ریهسپی یێن هەرێما كوردستانێ بهێتە پێكئینان و ببیتە لژنەیەكا نیشتمانی، بۆ وێ چەندێ چارەسەرییەكا نیشتمانی بهێتە دیتن، وی دەمی بڕیارەكا پێكڤەیی بەرانبەر بەغدایێ بدەن، بەلێ هەتا بڕیار دهێتە دان، ب هەر شێوەیەكێ هەبیت، حوكمەتا هەرێما كوردستانێ ب كێمی مووچەیەكی بەرهەڤ بكەت ب هەڤپشكییا زەنگین وسەرمایەدارێن كوردستانێ و كۆمپانییان و بدەنە فەرمانبەرێن هەرێما كوردستانێ».