ب هەلكەفتا بۆرینا 11 سالان ل سەر جینۆسایدا ئێزدیان ژ لایێ تیرۆرستێن داعشێ‌ ڤە، ب ئامادەبوونا نوونەرێ سەرۆكێ‌ حكومەتا هەرێما كوردستانێ‌ رێبەر ئەحمەد، سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارێزگەها دهـۆكێ و نەوزاد هادی، بەرپرسێ مەكتەبا رێكخستنا پارێزگەها نەینەوا و د. عەلی تەتەر، پارێزگارێ دهـۆكێ و بەرپرسێن لقێن پارتی و نوونەرێ میرێ ئێزدیان و بابە شێخ و كەسایەتیێن ئولی و جڤاكی و هەژمارەكا كچێن ڕزگاربوویێن ئێزدی، دوهی 3/8/2025 یازدەهەمین سالڤەگەڕا جینۆسایدا ئیزدیان ژ لایێ‌ بنگەهێ‌ لالشێ‌ ڤە ل هۆلا كۆنفرانسان ل زانكۆ یا دهۆك هاتە ساخكرن.
ل بەراهیێ 11 شەمالك ژ لایێ كچێن ڕزگاربووی ژ دەستێ داعشێ‌ هاتنە هەلكرن، پاشی پەیڤا بنگەهێ لالشێ‌ ژ لایێ سەعید جردۆ، سەرۆكێ بنگەهی ڤە هاتە خووندن، د دووڤ دا پەیڤێن پارێزگارێ دهۆكێ و نوونەرێ سەرۆكێ حكومەتا هەرێما كوردستانێ هاتنە خواندن و سەرەخۆشی و پێزانین گەهاندنە كەسوكارێن قوربانییان و ئەڤ تاوانا مەزن شەرمزار كر و داخواز كرن بكەرێن ڤێ تاوانا هۆڤانە بێنە دادگەهكرن و حكومەتا ئیراقێ دانپێدانێ ب جینۆسایدێ ل دژی ئێزدیێن شنگالێ بكەت و قەرەبوویا خەلكێ زیاندار بكەت و رێككەفتنا شنگالێ بجه بینیت و دەڤەرا شنگالێ ئاڤەدان بكە، دا خەلكێ ئاوارە ب ئارامی قەستا سەر جهـ و وارێن خۆ بكە.
د هێرشا تیرۆرستێن داعشێ‌ دا بۆ سەر شنگالێ ل 3ـی تەباخا سالا 2014، داعشێ‌ ئێزدی جینۆسایدكرن و شەش هەزار و 417 كەس ڕەڤاندن، هەتا نوكە سێ هزار و 591 ژ دەستێن داعشێ‌ هاتینە ڕزگاركرن و چارەنڤیسێ دو هزار و 500 كەسێن دی یێ دیار نینە و بزاڤێن ڕزگاركرنا وان دهێنە كرن.

شێخان، بارزان مزویری:

یازدە سال ل سەر جینۆسایدا شەنگالێ‌ ژ لایێ تیرۆرستێن داعشێ‌ ڤە بۆرین، هەتا نوكە كەسوكارێن دەستێ داعشێ‌ دا ژ نەڤەگەڕیانا كەسوكارێن خۆ بێ هیڤی نەبووینە، عادل كەسوكارەكێ‌ رەڤاندیانە بۆ ئەڤرۆ دبێژیت: ب تنێ دەیكا من هاتیە رزگاركرن و هێشتا باب و 10 كەس ژ مالباتا من د بێ سەرۆشوونن و رۆژانە چاڤەریێ خەبەرێ رزگاركرنا وانین.
عادل خەلەف، ئێك ژ كەسوكارێن رەڤاندیێن دەستێن داعشێ‌ بۆ رۆژناما ئەڤرۆ دیار كر، ئەڤە یازدە سال بۆرین و هەتا نوكە ژ ڤەگەڕیانا كەسوكارێن خۆ بێ‌ هیڤی نەبوویە و گۆت: «حكومەتا هەرێما كوردستانێ و نڤیسینگەها نێچیرڤان بارزانی گەلەك ل گەل مە دهاریكارن بۆ ڤەگەڕاندنا كەسوكارێن مە».
ناڤبری گۆتژی: «ئەم نزانین بۆچی حكومەتا ئیراقێ یا بێدەنگە بەرانبەری ڤەنەگەڕیانا كەسوكارێن مە، ئەگەر نەشێت كەسوكارێن مە ڤەگەڕینیت، بلا هەستیكێن قوربانیێن مە د گۆڕێن ب كۆم دا بینیتە دەرێ».

دهۆك، لەزگین جۆقی:

میرێ ئێزدیان ل ئیراق و جیهانێ و سەرۆكێ جڤاتا رۆحانیا ئێزدیان راگەهاند: هەتا نوكە خەلكێ مە د ناڤ ئازارێن جینۆسایدێ دا د نالن، یا ژ ئالیێ ئەهریمەنێن سەردەم و تاریاتیێ، ڕێكخراوا تیرۆرستی یا داعشێ‌ ڤە، دژی ئێزدیان، كو د بێ تاوان بوون ل شنگالێ‌ هاتیە ئەنجامدان.
میر حازم تەحسین سەعید، میرێ ئێزدیان ئاشكرا كر، یازدە سال ل سەر جینۆسایدێ دەربازبوون، نێزیكی سێ‌ هزار كچ ژ سەرجەمێ شەش هزار و 417 كچێن ل دەمێ جینۆسایدێ هاتینە ڕەڤاندن ڕزگاربووینە، خێزانێن رەڤاندیان هێشتا چاڤەریێ‌ كچێن خۆنە و چو نیشانەك نینە و گۆت: «ل دەمێ دبێژین جینۆساید یا بەردەوامە، مەرەما مە ئەوە هەموو ئیراقیێن ئاوارە پشتی دەڤەرێن وان ڕزگاربووین ڤەگەڕیانە سەر جهـ و وارێن خۆ، بەلێ هێشتا پتری 20 هەزار خێزانێن د كەمپێن ئاوارەیان دا ماینە و دەڤەرێن ڕەسەنێن وان هاتینە پشتگۆهــ هاڤێتن و ژ نەبوونا سەقامگیریێ د نالن».
ژ ئەنجامێ ئەوێ جینۆسایدێ نێزیكی 200 هزار ئێزدی ژ وەلاتێ خۆ مشەختبووینە، بلا هەموو لایەك بزانیت، ل دەمێ سەرەدانێن مە بۆ حكومەت و پەرلەمانێ وەلاتێن عەرەبی و دەرڤە، ب ڕاستگۆیی و ب دلسۆزیا تەمام مە ئازارێن گەلێ خۆ گەهاندینە، هەروەسا دەستەبەركرنا مافێن مە وەكو ئاینەكێ دێرین و دەستەبەركرنا مافێن جانگۆریان و ژن و زەلامێن ڕەڤاندی و ئاوارەیان، مە پەیوەندی ب نەتەوەیێن ئێگكرتی و جڤاكێ نێڤدەولەتی و دەڤەرێ ڤە كرییە، چەند وەلاتان ئەوا ب سەرێ ئێزدیان هاتی ب هەموو یاسایێن نێڤدەولەتی ب جینۆساید ناسكریە.
هەروەسا دڤێت سوپاسیا هەموو ئەوان كەسان بكەین یێن هاریكاریا مە كرین و پشتەڤانیا دۆزا مە كرین و ل ڕۆژا ئێكێ یا كۆمكۆژیێ هەتا ئیرۆ د گەل مە راوەستیاین، هەروەسا داخوازێ ژ هەموو لایەنێن ئیراقی و نێڤدەولەتی دكەین دووڤچوونەكا رژد ل چارەنڤیسێ ئێزدیێن ڕەڤاندی بكەن، هەموو بزاڤەكێ بدەنە كاری بۆ ڤەكرنا گۆڕێن ب كۆم و لێپرسینێ ل تاوانباران، ب جهــهاتنا دادپەوەریێ و دابینكرنا ئاسایش و سەقامگیریێ بۆ ئێزدیان ل دەڤەرێن وان، داكو بشێن ڤەگەڕنە سەر مال و حالێ خۆ و رێز ل وان بێتە گرتن.
سلاڤ بۆ جانگۆریان، ئازادی بۆ ژنێن ڕەڤاندی، دادپەروەری بۆ بنەمالێن قوربانیان، ڤەگەڕیانا سلامەتیێ ب كەرامەت و شەرەف ڤە بۆ ئێزدیێن ئاوارە.

دهۆك، زنار تۆڤی:

هەر ژ دەستپێكرنا پڕۆژەیێ رۆناكی یێ كارەبا 24 دەمژمێری هەتا نوكە، 310 موەلیدە ل پارێزگەها دهۆكێ هاتینە راوەستاندن و هەژمارا پشكدارێن مفادار ژ ڤی پڕۆژەی گەهشتینە 81 هزار كەسان ل سەنتەرێ باژێرێ دهۆكێ.
رێڤەبەریا گتشی یا كارەبا پارێزگەها دهوكێ، بۆ رۆژناما ئەڤرۆ دیار كر، پڕۆژەیێ رۆناكی یێ كارەبا 24 دەمژمێری ل پارێزگەها دهۆكێ یێ بەردەوامە و هەتا نوكە هەژمارا پشكدارێن مفادار ژ پڕۆژەی ل پارێزگەها دهۆكێ 81 هزار كەسن و ب رێژەیا 68%ێ ئەڤ پڕۆژە ل سەنتەرێ دهۆكێ تەمام بوویە، هەروەسا هەژمارا موەلیدەیێن هاتینە راوەستاندن 310 موەلیدەنە ل باژێرێ دهۆكێ، دیسا ئەو تاخێن كارەبا 24 دەمژمێری هەی، هەژمارا وان نێزیكی 30 تاخانە، ل گەل هندەك كۆمەلگەهێن ئاكنجیبوونێ ل سەنتەرێ دهۆكێ.

زاخۆ، دلۆڤان هالۆ:

ئیبراهیم محەمەد، ئەندازیارێ پڕۆژەی بۆ ڕۆژناما ئەڤرۆ دیاركر كو ل سەر ڕووبەرێ هزار و 400 مەتران و ب گوژمێ ملیارەك و 207 ملیۆن دیناران، نەخوەشخانەیەك ل ناوچەداریا دەركارێ یا سەر ب ئیدارا سەربخوە یا زاخۆ ڤە دهێتە ئاڤاكرن و ب ڕێژەیا 65% كار تێدا هاتییە كرن.
ئەندازیارێ پڕۆژەی ئاماژە ب وێ چەندێ ژی كر كو ئەڤ نەخوەشخانە ژ گەلەك پشكان پێك دهێت، وەكو: پشكێن هەوارهاتنێ و تیشكێ و نشتەرگەرییان و ددانان و ژ دایك بوونێ و چەندین پشكێن دی، هەر دیسا ژوورێن زەلام و ژنان ژێكجوودانە و گۆت: «ڕۆژانە كار د ڤی پڕۆژەی دا دهێتە كرن، دا كو ب زووترین دەم بكەڤیتە د خزمەتا وەلاتیێن ناوچەداریا دەركارێ دا».