دهۆك، لەزگین جوقی

رێڤەبەرێ گشتیێ وەبەرهێنانێ ل پارێزگەها دهۆكێ راگەهاند، ئەڤ سالە هەتا 40 پرۆژێن وەبەرهێنانێ ل پارێزگەها دهۆكێ دێ مۆلەتا وەبەرهێنانێ وەرگرن و گۆت: ل ساڵا 2024ێ ل پارێزگەها دهۆكێ 35 پرۆژێن وەبەرهێنانێ مۆلەت وەرگرتیە و دەست ب چێكرنا وان پرۆژان هاتیە كرن، ئەڤ سالە 2025ێ دێ 40 پرۆژە مۆلەتا وەبەرهێنانێ وەرگرن.

د.هەڤال سەدیق، رێڤەبەرێ گشتیێ وەبەرهێنانێ ل پارێزگەها دهۆكێ بۆ ئەڤرۆ دیار كر، ژێرخانا ئابوری یا هەرێما كوردستانێ ب رێیا وەبەرهێنانێ هاتیە ئاڤاكرن، چەندین پرۆژێن وەبەرهێنانێ هاتینە چێكرن و د كابینا نەهێدا گەلەك گرنگی ب وەبەرهێنانێ هاتیە دان، سال بۆ سالێ پرۆژێن وەبەرهێنانێ زێدە دبن، ل ساڵا 2024ێ ل پارێزگەها دهۆكێ 35 پرۆژێن وەبەرهێنانێ مۆلەت وەرگرتیە و دەست ب چێكرنا وان پرۆژان هاتیە كرن، ئەڤ سالە 2025ێ دێ 40 پرۆژە مۆلەتا وەبەرهێنانێ وەرگرن.
تەكەز كر، پرۆژێن ئاكنجیبوون و چاندن و پیشەسازی و گەشتیاری زێدەباری پرۆژێن وەرزش و پەروەردێ ل دهۆكێ هاتینە چێكرن، هژمارەكا مەزن یا دەرفەتێن كاری بۆ گەنجان پەیدابووینە ب تایبەت بۆ دەرچوویێن كولێژ و پەیمانگەها ب رێیا پرۆژێ چاندنێ و پێشەسازی بەرهەمێ جۆتیارێن پارێزگەها دهۆكێ هاتیە ساخكرن و پتر گرنگی ب چاندنێ هاتیە دان.

هەڤال سەدیق گۆتژی: د پلانا مە دایە د سالێن بهێت دا پتر پرۆژێن وەبەرهێنانێ ل دەڤەرێن كێم گەشە وەكۆ قەزا و ناحیا بهێنە چێكرن ل هەمی قەزا و ناحیێن سەر ب پارێزگەها دهۆكێ پرۆژێن وەبەرهێنانێ دێ هێنە چێكرن و هەمی ئاسانكاری بۆ وان وەبەرهێنەران دێ هێنە كرن یێن كۆ پرۆژە ل قەزا و ناحیا دروست بكەن دا كۆ گەشە بكەڤیتە هەموو دەڤەران.
رێڤەبەرێ گشتیێ وەبەرهێنانێ ل پارێزگەها دهۆكێ دیاركر، نوكە دەست ب پلانەكا باش هاتیە كرن بۆ چێكرنا پرۆژێن خزمەتگوزاری د ناڤ وان پرۆژێن ئاكنجیبوونێدا یێن كێم خزمەت.
گرتژی: ل پارێزگەها دهۆكێ 315 پرۆژێن وەبەرهێنانێ مۆلەت وەرگرتیە ب تنێ دكابینا نەهێدا 115 پرۆژان ل دهۆكێ مۆلەت وەرگرتیە و سال بۆ سالێ پرۆژێن وەبەرهێنانێ زێدە دبن ئەڤ سالە 40 پرۆژە دێ مۆلەتا وەبەرهێنانێ وەرگرن.
ئەو ژی خویاكر، د چارچوڤێ سیاسەتا حوكمەتا هەرێما كوردستانێ و گرنگیدان ب پێشڤەبرنا كەرتێ وەبەرهێنانێ نوكە ل قەزا سێمێل و ئاكرێ و تەناهی و ئامێدیێ و هەمی دەڤەران پرۆژێن وەبەرهێنانێ دهێنە چێكرن و نوكە چەندین پرۆژە د قۆناغێن چێكرنێدانە.

سندس سالح سلێڤانەیی:

پتریا ئاكنجیێن تاخێن دهۆكێ، ب تایبەت ژی تاخێن هەژارنشین گازندەیا ژ وێ چەندێ دكەن كو د ئەڤ سالەدا ئەرزاق گەلەك گیرۆ دبیت و ئەڤێ چەندێ كارتێكرنا ل ژیارا وان كریە و رێڤەبەرێ بەلاڤكرنا ئەرزاقی ژی ل دهۆكێ دبێژیت: ئومبارێن مە دپڕی بوون ژ هەموو جۆرێن ئەرزاقی، لێ ئەم ل هیڤیا رێڤەبەریا گشتی یا ئاهێن خوارنێ بووین ل بەغدا هەتا وان بڕیار دای و ل دووماهیا حەفتیا بۆری مە دا دەست ب بەلاڤكرنێ كریە.

حەسەن مشیر وەك وەلاتیەك دبێژیت: هەتا سالا بۆری ژی بەلاڤكرنا ئەرزاقی یا باش بوو و د دەمێ خوە دا دهات، لێ د ئەڤ سالەدا (2025) گەلەك گیرۆ دبیت، ب تایبەت ژی (ئار) و ڤێ چەندێ كارتێكرن ل ژیارا مە كریە، چونكو مووچە ژی گیرۆدبن و ئەرزاق ژی ل بازاڕی یێ گرانە ئەم نەشێین بكڕین، لەورا ئەم داخوازێ ژ پەرلەمانتەرێن كورد ل بەغدا دكەین هەر زوو بهێنە سەرخەت و چارەیەكێ ل ڤێ گیرۆكرنێ بكەن.
مەجید یاسین وەلاتیەكێ دی یە دبێژیت: هەر چەندە ئەو ئەرزاقێ دهات ژلایێ كوالیتیێ ڤە نەگەلەكێ باش بوو، ب تایبەت ژی (برنج) كو پتریا خەلكی گازندە ل سەر جۆرێ وی هەبووینە، لێ كەرەستەیێن دی هەتا رادەیەكی دباش بوون و پتریا خەلكێ مە د هەژارن خوە ل گەل دگونجاندن و فێری خوارنا وان ببوون، لێ مخابن ئەڤە چەند هەیڤە گیرۆ دبیت، ب تایبەت ژی (زەیت) و گیرۆكرنا هاتنا ئەرزاقی خەلكەك پەریشان كریە و داخوازا مە ئەوە ئەڤ ئاریشە یە بهێتە چارەكرن و ئەرزاقێ مە د دەمێ خوە دا بهێت.
هەجەر عەبدوللا، رێڤەبەرێ كۆمپانیا ئاهێن خوارنێ ل دهۆكێ دبێژیت: راستە مە ئاگەه ژ ڤێ چەندێ هەبوو و ئەم بەردەوام ل گەل رێڤەبەریا گشتی یا ئاهێن خورانێ ل بەغدا ل سەرخەت بووین دا بڕیارا بەلاڤكرنێ بدەن و ئەم ژی هەرزوو دەست ب بەلاڤكرنێ بكەین، ئەو ژی ژبەر دو ئەگەران، یا ئێكێ خەلكێ مە یێ پێدڤیە و یا دویێ ژی چونكو وەرزێ هاڤینێ یە مە نەڤێت زیان بگەهیتە ئەرزاقی چنكو ئومبارێن مە دپری نە و بهانەیا بەغدا ژی ئەو بوو ئەو مژوولی (جەردێ) بوون هەتا ب دووماهی هاتی ژ نوو بڕیارا بەلاڤكرنێ دان.

سولین سلێمان

دەست ب كۆمكرنا بەرهەمێن گەنمێ جوتیاران هاتیە كرن، وەكو سالێن دی، دێ‌ ل هەر دەڤەرەكا هەرێمی كوردستانێ گەنم ژ جوتیاران هێتە وەرگرتن. ل دووڤ پێزانینێن وەزارەتا چاندنا هەرێما كوردستانێ بەلاڤ كرین، هەر ل ڤێ هەیڤێ‌ دێ‌ دەست ب وەرگرتنا گەنمێن جوتیاران هێتە كرن.

هێمن سەید رێڤەبەرێ چاندنا هەولێرێ بۆ رۆژناما ئەڤرۆ گۆت «بەرهەمێن چاندنا ئەڤ سالە كوالێتیا وانا گەلەك یا باشە، دروینا گەنم و جەهی ل پارێزگەها هەولێرێ تمام بوویە و ئەڤ سالە چاڤ ل سالێن دی بەرهەم گەلەك پتر و باشترە.
ئاماژە كر» بەرهەمێ گەنمێ بنەتۆیا خوماڵی سالا بوریدا هزار و 500 تەن بۆینە و لێ ئەڤ ساڵە بۆینە سێ هزار و 500 تەن ، ب كوالێتیەكا زۆرباش بەرهەم هاتینە.
ئاشكراژی كر « هەر چەندە بارانێن ئەڤ سالە د كێم بوون، جوتیاران ترسا وێ چەندێ هەبوو كۆ بەرهەمێ گەنمێ وان زیان پێ بگەهیت، لێ خوشبەختانە گەلەك باش ڤێراگەهشتیە و گۆت: بۆ ئەڤ سالە 400 تەنێن گەنمێ جوتیاران دێ هێنە وەرگرتن، ئەم دگەل حكومەتا هەرێمێ ل سەر خەتین دا كو جوتیارێن مە ژی وەكی جوتیارێن ئیراقێ وەك هەڤدوو بن.
گۆت ژی «ل سالا بۆریدا وەزارەتا بازرگانیا ئیراقێ 700 هزار تەن گەنمێن جوتیارێن هەرێما كوردستانێ مە وەرگرتن، لێ بۆ ئەڤ سالە ب تنێ دێ 400 هزار تەن گەنمێن جوتیارێن كورد وەرگریت.